AKP ភ្នំពេញ ថ្ងៃទី២២ ខែមិថុនា ឆ្នាំ២០២៦--កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានសហការជាមួយមជ្ឈមណ្ឌលជាតិផ្តល់ឈាម ប្រារព្ធទិវាពិភពលោកនៃអ្នកបរិច្ចាគឈាម ១៤ មិថុនា រៀបចំឡើងនៅទីស្នាក់ការកណ្តាលកាកបាទក្រហមកម្ពុជា នាព្រឹកថ្ងៃទី២២ ខែមិថុនា ឆ្នាំ២០២៦ នេះ។

ព្រឹត្តិការណ៍មនុស្សធម៌ដ៏មានសារៈសំខាន់នេះ មានការអញ្ជើញចូលរួមយ៉ាងកុះករ និងដោយស្ម័គ្រចិត្ត ពីសំណាក់សិស្ស និស្សិត យុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សារហូតដល់ ២៥ ក្នុងរាជធានីភ្នំពេញ ព្រមទាំងបងប្អូនជាមន្ត្រី អ្នកស្ម័គ្រចិត្ត មកពីអនុសាខាកាកបាទក្រហមកម្ពុជា និងអាជ្ញារធរដែនដី ទាំង ១៤ខណ្ឌ សរុបជិត៤០០នាក់ និងទទួលបានការបរិច្ចាគឈាមចំនួន២២៦ប្លោក។

លោកស្រីវេជ្ជបណ្ឌិតឯកទេស ហេង សុខចម្រើន អនុប្រធានមជ្ឈមណ្ឌលជាតិផ្ដល់ឈាម បានថ្លែងអំណរគុណយ៉ាងជ្រាលជ្រៅចំពោះកាកបាទ្រហមកម្ពុជា ជាពិសេស សប្បុរសជនទាំងអស់ និងបានគូសបញ្ជាក់ពីសារៈសំខាន់ដ៏អស្ចារ្យនៃការបរិច្ចាគឈាម។ លោកស្រីបានបញ្ជាក់ថា បច្ចុប្បន្ន តម្រូវការឈាមនៅក្នុងមន្ទីរពេទ្យនានា ក្នុងរាជធានីភ្នំពេញ មានការកើនឡើងគួរឱ្យកត់សម្គាល់ ដោយត្រូវការឈាមប្រមាណពី ៤០០ ទៅ ៤៥០ ប្លោក ក្នុងមួយថ្ងៃ ខណៈចំនួនអ្នកបរិច្ចាគដោយស្ម័គ្រចិត្តនៅមិនទាន់គ្រប់គ្រាន់នៅឡើយទេ។

លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា ក៏បានថ្លែងកោតសរសើរចំពោះស្មារតីសាមគ្គីភាព និងការទទួលខុសត្រូវចំពោះសង្គមរបស់យុវជនយើង។ លោកជំទាវមានប្រសាសន៍បន្តថា៖ “ការបរិច្ចាគឈាម គឺជាសកម្មភាពមនុស្សធម៌ដ៏ថ្លៃថ្នូរ និងជាទានដ៏ប្រពៃតាមទស្សនៈព្រះពុទ្ធសាសនា។ សូមចងចាំថា ឈាមតែមួយប្លោក អាចជួយសង្គ្រោះជីវិតមនុស្សបានរហូតដល់ទៅ ៣នាក់។ លើសពីនេះ ការបរិច្ចាគឈាមមិនប៉ះពាល់ដល់សុខភាពឡើយ ផ្ទុយទៅវិញ គឺជួយឱ្យរាងកាយបង្កើតកោសិកាឈាមថ្មី កាត់បន្ថយជាតិដែកលើស និងកាត់បន្ថយហានិភ័យជំងឺបេះដូងថែមទៀតផង”។

ថ្នាក់ដឹកនាំនៃស្ថាប័នទាំងពីរ បានអំពាវនាវយ៉ាងទទូចដល់បងប្អូនប្រជាពលរដ្ឋ មន្ត្រីរាជការ និងយុវជនទាំងអស់ សូមបន្តចូលរួមបរិច្ចាគឈាមដោយស្ម័គ្រចិត្ត និងជាប្រចាំ ដើម្បីឱ្យសកម្មភាពដ៏ឧត្តុង្គឧត្តមនេះ ក្លាយទៅជា “វប្បធម៌នៃការចែករំលែកនៅក្នុងសង្គមជាតិយើង” ក្នុងគោលដៅផ្តល់ឱកាសរស់រានមានជីវិត និងក្តីសង្ឃឹមជាថ្មី ដល់អ្នកជំងឺដែលកំពុងត្រូវការឈាមសង្គ្រោះបន្ទាន់នៅទូទាំងប្រទេស៕

ដោយ ពេជ្រ សំអឿន(ប្រភព៖កាកបាទក្រហមកម្ពុជា)