AKP ភ្នំពេញ ថ្ងៃទី២១ ខែមិថុនា ឆ្នាំ២០២៦--

ក្រោមកិច្ចសហប្រតិបត្តិការទ្វេភាគីរវាងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន ជាមួយក្រសួងអប់រំ និងបណ្ដុះបណ្ដាល នៃសាធារណរដ្ឋសង្គមនិយមវៀតណាម នាយកដ្ឋានបានរៀបចំដំណើរការសំណេរ នៃការប្រឡងជ្រើសរើសនិស្សិតអាហារូបករណ៍ថ្នាក់បរិញ្ញាបត្រទៅសិក្សានៅសាធារ ណរដ្ឋសង្គមនិយមវៀតណាម សម្រាប់ឆ្នាំសិក្សា ២០២៦-២០២៧ ដែលបានប្រព្រឹត្តទៅនៅថ្ងៃទី២១ ខែមិថុនា ឆ្នាំ២០២៦ នៅវិទ្យាល័យព្រះស៊ីសុវត្ថិ ដោយមានបេក្ខជនដាក់ពាក្យចូលរួមសរុបចំនួន ៣៤៣នាក់ ក្នុងនោះស្រី ១៧៧នាក់។

ឯកឧត្តមបណ្ឌិត ជួន ជីវិន រដ្ឋលេខាធិការ តំណាងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញបើកវិញ្ញាសា និងពិនិត្យតាមដានដំណើរការប្រឡងសំណេរនេះ ដោយបេក្ខជនទាំងអស់ត្រូវឆ្លងកាត់ការប្រឡងលើវិញ្ញាសាចំនួនពីរ គឺ វិញ្ញាសាវប្បធម៌ទូទៅ និងវិញ្ញាសាគណិតវិទ្យា។

សម្រាប់ការប្រឡងនេះ គណៈកម្មការទទួលខុសត្រូវរួម គណៈកម្មការអប្បមាទ គណៈមេប្រយោគមណ្ឌលសំណេរ គណៈកម្មការកណ្តាលសំណេរ គណៈកម្មការអនុរក្ស ក្រុមសុវត្ថិភាពមណ្ឌលសំណេរ និងគណៈកម្មការពាក់ព័ន្ធផ្សេងទៀត បានបំពេញការងារប្រកបដោយការយកចិត្តទុកដាក់ និងទំនួលខុសត្រូវខ្ពស់ ដោយដំណើរការនៃការប្រឡងបានប្រព្រឹត្តទៅដោយរលូន និងប្រកបដោយភាពស្ងប់ស្ងាត់ មានសណ្ដាប់ធ្នាប់ល្អ និងគោរពតាមបទប្បញ្ញត្តិនៃការប្រឡងយ៉ាងម៉ឺងម៉ាត់៕

ដោយ៖ ចាន់ សុភឿន (ប្រភព៖ ក្រសួងអប់រំ)