AKP កំពង់ឆ្នាំង ថ្ងៃទី២០ ខែមិថុនា ឆ្នាំ២០២៦-- 

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានមានប្រសាសន៍នៅក្នុងវេទិកាស្ដីពីពិគ្រោះយោបល់ភាពជាដៃគូរវាងរដ្ឋបាលខេត្ត និងអង្គការមិនមែនរដ្ឋាភិបាល សមាគម សហគមន៍នានានៅក្នុងខេត្ត កាលកពីថ្ងៃទី១៩ ខែមិថុនា ឆ្នាំ២០២៦  នៅសាល់ប្រជុំសាលាខេត្តកំពង់ឆ្នាំង ពិធីនេះដោយ មានការអញ្ជើញចូលរួមពីឯកឧត្ដម ស៊ីវ រុន ប្រធានក្រុមប្រឹក្សាខេត្ដ លោកនាយកប្រតិបត្ដិគ្រប់គ្រងសេវាធនាគារសាធា រណ: លោក លោកស្រីតំណាងមន្ទីរ-អង្គភាពជុំវិញខេត្ត អភិបាល ក្រុង-ស្រុក និងតំណាងអង្គការ សមាគមនានាជាច្រើននាក់ផងដែរ។

នៅក្នុងឱកាសនោះឯកឧត្តម ស៊ុន សុវណ្ណារិទ្ធិ បានមានប្រសាសន៍ថា សមាគមនិងអង្គការមិនមែនរដ្ឋាភិបាលក្នុងស្រុកក្ដីក្រៅស្រុកក្ដីចូរគោរពច្បាប់ការងារឱ្យបានត្រឹមត្រូវតាមគោលការណ៍ច្បាប់របស់រដ្ឋកំណត់ ដើម្បីធានាបាននូវការអនុវត្តសកម្មភាពប្រតិបត្តិការ និងការពារបាននូវផលប្រយោជន៍ស្របច្បាប់របស់ខ្លួន និង ផលប្រយោជន៍សាធារណៈ ព្រមទាំងចូលរួមលើកកម្ពស់កិច្ចសហប្រតិបត្តិការក្នុងភាពជាដៃគូរវាងសមាគម និងអង្គការមិនមែនរដ្ឋាភិបាលជាមួយអាជ្ញាធរសាធារណៈប្រកបដោយតម្លាភាពនិងគណនេយ្យភាព។

ទន្ទឹមនឹងនេះឯកឧត្តមបានបន្តថា សមា គមក្នុងស្រុកសំដៅដល់អង្គការសមា ជិកភាព ដែលត្រូវបង្កើតឡើងក្រោមច្បាប់កម្ពុជាដោយរូបវន្តបុគ្គល ឬនីតិបុគ្គល ក្នុងគោលបំណងធ្វើជាតំណាង និងការពារផលប្រយោជន៍សមាជិករបស់ខ្លួន ដោយមិនទាញយកចំណេញ ឬមិនយកកម្រៃមកចែកគ្នា។ ចំណែកឯអង្គការមិនមែនរដ្ឋាភិបាលសំដៅដល់អង្គការមិនមែនសមាជិកភាពរួមទាំងមូលនិធិ ដែលត្រូវបានបង្កើតឡើងក្រោមច្បាប់របស់កម្ពុជាដោយរូបវន្តបុគ្គល ឬនីតិបុគ្គលក្នុងគោលបំណងផ្តល់មូលនិធិ ឬសេវាកម្មលើវិស័យមួយ ឬច្រើនដើម្បីប្រយោជន៍សាធារណៈដោយមិនទាញយកចំណេញ ឬមិនយកកម្រៃជាប្រយោជន៍បុគ្គល។

ថ្លែកក្នុបរិបទនេះឯកឧត្តមភិបាលខេត្តបានបញ្ជាក់ទៀតថា ដើម្បីអាចបង្កើតសមាគម និងអង្គការមិនមែនរដ្ឋាភិបាល មាត្រា៥នៃច្បាប់ដដែលបានកំណត់ថា សមាគមតម្រូវឱ្យមានសមាជិកស្ថាបនិកយ៉ាងតិច៣រូបដែលមានអាយុគ្រប់១៨ឆ្នាំឡើងទៅ និងអង្គការមិនមែនរដ្ឋាភិបាលតម្រូវឱ្យមានសមាជិកស្ថាបនិកមានសញ្ជាតិខ្មែរចំនួនយ៉ាងតិច៣រូប ដែលម្នាក់ៗមានអាយុគ្រប់១៨ឆ្នាំឡើងទៅដូចគ្នា។ សមាគម និងអង្គការមិនមែនរដ្ឋាភិបាលត្រូវតែមានប្រធានជាជនជាតិខ្មែរបង្កើតឡើងជាមួយ ក្រសួង ស្ថាប័នមានសមត្ថកិច្ច និងរដ្ឋបាលថ្នាក់ក្រោមជាតិក្នុងពេលធ្វើ សកម្មភាពលើវិស័យជំនាញនីមួយៗ ស្របតាមច្បាប់កំណត់ លើកស្ទួយជីវភាពប្រជាពលរដ្ឋសំដៅលើការអភិ វឌ្ឍន៍តាមមូលដ្ឋាន៕

ដោយ ៖បៃ ស៊ីថុន