AKP ភ្នំពេញ ថ្ងៃទី១៩ ខែមិថុនា ឆ្នាំ២០២៦--លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានអនុសាខាកាកបាទក្រហមកម្ពុជាខណ្ឌឫស្សីកែវបានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះសាលាអនុគណខណ្ឌខណ្ឌឫស្សីកែវ ដែលតែងតែជួយទំនុកបម្រុងដល់សកម្មភាពមនុស្សធម៌របស់អនុសាខាកាកបាទក្រហមកម្ពុជាខណ្ឌ តាមរយៈការផ្តល់អំណោយជាបន្តបន្ទាប់នាពេលកន្លងមកនេះ។

ក្នុងពិធីប្រគល់ និងទទួលអំណោយរបស់សាលាអនុគណខណ្ឌឫស្សីកែវ នៅវត្តញាណរង្សី នារសៀលថ្ងៃទី១៩ ខែមិថុនា ឆ្នាំ២០២៦ លោក ជិន ប៊ុនធឿន បានថ្លែងថា អំណោយដែលអនុសាខាកាកបាទក្រហមកម្ពុជាខណ្ឌបានទទួលពីសាលាអនុគណខណ្ឌ ជាចំណែកមួយយ៉ាងសំខាន់ក្នុងការឧបត្ថម្ភបន្តទៅដល់ពលរដ្ឋទីទ័លក្រ ពលរដ្ឋរងគ្រោះ ពិសេសពលរដ្ឋរងគ្រោះដោយគ្រោះអគ្គិភ័យនៅក្នុងខណ្ឌឫស្សីកែវ ខណៈនៅក្នុងខណ្ឌរបស់លោកក៏មានផងដែរនូវជនភៀសសឹក ដែលរត់មកពីទល់ដែនកម្ពុជា-ថៃ ហើយថ្វីដ្បិតតែពួកគាត់បានត្រឡប់ទៅវិញក៏ដោយក៏បានទុកកូនចៅរបស់ពួកគាត់ឱ្យនៅសិក្សារៀនសូត្រនៅភ្នំពេញ រួមទាំងគ្រួសារកងទ័ពមួយចំនួនដែលមានជីវភាពខ្វះខាតក៏ត្រូវការជំនួយឧបត្ថម្ភ ពីអាជ្ញាធរខណ្ឌ ពីកាកបាទក្រហមខណ្ឌផងដែរ។

លោកអភិបាលខណ្ឌបានគូសបញ្ជាក់ថា ការណ៍ដែលអាជ្ញាធរខណ្ឌបានផ្តល់នូវការឧបត្ថម្ភចំពោះគ្រួសារកងទ័ពនៅក្នុងមូលដ្ឋានខណ្ឌដែលមានជីវភាពខ្វះខាត គឺមានន័យថា អាជ្ញាធរបានតបស្នងសងគុណចំពោះការលះបង់សាច់ស្រស់ឈាមស្រស់របស់វីរកងទ័ពរបស់យើង។

ក្នុងឱកាសនេះ ព្រះគ្រូរតនប្បជ្ជោតិ ខឹម សម្បត្តិ ព្រះអនុគណខណ្ឌឫស្សីកែវ បានសម្តែងនូវទឹកព្រះទ័យរីករាយ ដែលបានរួមចំណែកក្នុងការផ្តល់អំណោយជូនដល់អនុសាខាកាកបាទក្រហមកម្ពុជាខណ្ឌឫស្សីកែវ ដើម្បីយកទៅចែកជូនចំពោះពលរដ្ឋខ្វះខាតជាបន្តបន្ទាប់។ ដោយឡែកក្នុងថ្ងៃនេះអំណោយដែលបានផ្តល់ជូនដល់អនុសាខាកាកបាទក្រហមកម្ពុជាខណ្ឌ រួមមាន៖ អង្ករ ១តោន ទឹកក្រូច ១០កេស មី ១០កេស ទឹកស៊ីអ៊ីវ ១០យួរ ទឹកត្រី ១០យូរ ទឹកសុទ្ធ ១០កេស ត្រីខ ១០យូរ ទឹកដោះគោ ៣០កំប៉ុង ស្ករស ៣០គីឡូក្រាម តែ ២០០កញ្ចប់ សម្ភារប្រើប្រាស់ផ្ទះបាយ ៤សម្រាប់ ព្រមទាំងបច្ច័យ បើសរុបជាថវិកាជិត ៨លានរៀល៕

ដោយ ចាន់ សុភឿន