AKP ភ្នំពេញ ថ្ងៃទី១៩ ខែមិថុនា ឆ្នាំ២០២៦--ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បានថ្លែងថា ជំនួបប្រកបដោយភាពស្និទ្ធស្នាល និងផ្តល់ទំនុ​ក​ចិ​ត្តគ្នាទៅវិញទៅមក រវាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពជា និង ឯកឧត្តម វ្លាឌីមៀ ពូទីន ប្រធានាធិបតី នៃសហព័ន្ធរុស្ស៊ី ផ្ដោតលើវិស័យសំខាន់ៗចំនួន៣។

ឯកឧត្តម តាន់ ហ្សង់ហ្វ្រង់ស័រ  បានថ្លែងឱ្យដឹងដូច្នេះ ក្នុងសន្និសីទសារព័ត៌មាន នៅអាកាសយានដ្ឋានអន្តរជាតិតេជោ ក្រោយពេល សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដឹកនាំគណៈប្រតិភូរាជរដ្ឋាភិបាល មកដល់អាកាសយានដ្ឋានអន្តរជាតិតេជោ នៃខេត្តកណ្តាល នាព្រឹកថ្ងៃទី១៩ ខែមិថុនា ឆ្នាំ២០២៦ បន្ទាប់ពីបានអញ្ជើញទៅចូលរួមកិច្ចប្រជុំកំពូលរម្លឹកខួបអនុស្សាវរីយ៍អាស៊ាន-រុស្ស៊ី ក្នុងឱកាសខួបអនុស្សាវរីយ៍លើកទី៣៥ នៃទំនាក់ទំនងអាស៊ាន-រុស្ស៊ី នៅទីក្រុងកាហ្សាន សហព័ន្ធរុស្ស៊ី។ 
រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បានបន្តថា វិស័យសំខាន់ៗចំនួន៣គឺទី១.កិច្ចសហប្រតិបត្តិការនយោបាយ និងការទូត ,ទី២. ពាណិជ្ជកម្ម កសិកម្ម និងថាមពល , និងទី៣. ការតភ្ជាប់ពិសេស រវាងប្រជាជននិងប្រជាជន។ សម្ដេចធិបតី បានស្នើរុស្ស៊ី ឱ្យពង្រីកនិងពង្រឹងការវិនិយោគនៅកម្ពុជា ឱ្យពិចារណាទៅលើសំណើរបស់កម្ពុជា ក្នុងការបង្កើតពាណិជ្ជកម្មសេរីមួយរវាងកម្ពុជា និងសហភាពសេដ្ឋកិច្ចអឺរ៉ាស៊ី ដែលមានរុស្ស៊ី បេឡារុស កាហ្សាក់ស្តង់ គៀកហ្ស៊ីស្តង់ និអាមេនី ជាសមាជិក។

ជាមួយគ្នានេះ សម្ដេចធិបតី ក៏អំពាវនាវដែរឱ្យកម្ពុជា និងរុស្ស៊ីបន្តកិច្ចសហប្រតិបត្តិការលើវិស័យថាមពល កសិកម្ម អប់រំ ទេសចរណ៍ និងសុខាភិបាល។

បើតាម ឯកឧត្តម តាន់ ហ្សង់ហ្វ្រង់ស័រ  ជារួម ជំនួប កម្ពុជា-រុស្ស៊ី រវាងសម្ដេចធិបតី ហ៊ុន ម៉ាណែត និង ឯកឧត្តម វ្លាឌីមៀ ពូទីន នៅកាហ្សាន ប្រទេសរុស្ស៊ីស្ដែងឱ្យឃើញនូវសារៈសំខាន់បីយ៉ាង សារៈសំខាន់ម្យ៉ាងទី១. គឺគុណភាពទំនាក់ទំនង កម្ពុជា រុស្ស៊ី ៧០ឆ្នាំកន្លងមកហើយ ដែលកម្ពុជា និងរុស្ស៊ីឈរនៅជាមួយគ្នា ពិសេសក្នុងគ្រាដែលកម្ពុជា ឆ្លងកាត់ទុក្ខវេទនាខ្លាំង(ពេញ១ទសវត្ស៨០)មិត្តភាពប្រកបដោយគុណភាព និងមានលក្ខណៈយូរអង្វែងនេះ ស្ដែងឡើងជាអាទិ៍តាមរយៈ ចំនួននិស្សិតខ្មែរជាច្រើននាក់ និងជាច្រើនជំនាន់ដែលបាននិងកំពុងបន្តទទួលបានការសិក្សានៅសូវៀត និងក្រោយមកទៀតនៅរុស្ស៊ី មន្ទីរពេទ្យមិត្តភាពខ្មែរ សូវៀត នៅភ្នំពេញដែលបានសាងសង់ឡើងនៅឆ្នាំ ១៩៦០ ជាជំនួយរបស់រុស្ស៊ី ក្នុងសម័យសង្គមរាស្ត្រនិយម គឺជានិមិត្តរូបមួយនៃមិត្តភាពយូរអង្វែងនិងប្រកបដោយគុណភាពរវាងកម្ពជានិងរុស្ស៊ីដែរ។

សារៈសំខាន់ម្យ៉ាងទី២នៃជំនួបទ្វេភាគីរវាងសម្ដេចធិបតី ហ៊ុន ម៉ាណែត និង ឯកឧត្តម វ្លាឌីមៀ ពូទីន ថ្ងៃ១៨ មិថុនា ម្សិលមិញនេះ ជាឱកាលមួយថ្មីដើម្បីឱ្យកម្ពុជា និងរុស្ស៊ី សម្លឹងទៅមុខទៅរកទិសរួមគ្នា និងគោលដៅបន្តស្វែងរកផលប្រយោជន៍ជាក់ស្ដែងរួមគ្នា សម្រាប់ប្រជាជនកម្ពុជា និងសម្រាប់ប្រជាជនរុស្ស៊ី។

រីឯសារៈសំខាន់ម្យ៉ាងទី៣ នៃជំនួបកម្ពុជារុស្ស៊ីកាលពីល្ងាចមិញ គឺសារនយោបាយៗ ដ៏ច្បាស់លាស់របស់សម្ដេចធិបតី គឺកម្ពុជាត្រូវតែបន្តពង្រឹងមិត្តភាពចាស់ និងពង្រីកមិត្តភាពថ្មី នៅលើពិភពលោកតទៅថ្ងៃមុខទៀត គឺជាទិសដៅនៃគោលនយោបាយការបទេសឯករាជ្យ និងប្រកបដោយតុល្យភាពរបស់កម្ពុជានិងនៅក្នុងបរិបទពិភពលោកមួយមិនជាក់លាក់ ស្មុគស្មាញ និងមិនស្ថិតស្ថេរទាល់តែសោះ៕

ដោយ៖ គង់ សិរីរ័ត្ន, រូបថត៖ គល់ រ៉េននី