AKPភ្នំពេញថ្ងៃទី១៩ ខែមិថុនា ឆ្នាំ ២០២៦– ក្រសួងអប់រំ យុវជន និងកីឡា សហការរៀបចំកម្មវិធី កម្មវិធី «Access Summit 2026» ផ្តល់ការអប់រំភាសាអង់គ្លេសប្រកបដោយគុណភាពខ្ពស់ដល់សិស្សានុសិស្ស និងជួយឱ្យពួកគេអភិវឌ្ឍទំនុកចិត្ត ជំនាញភាពជាអ្នកដឹកនាំ សមត្ថភាពរិះគិតពិចារណា ព្រមទាំងការយល់ដឹងកាន់តែទូលំទូលាយអំពីពិភពលោក។

ក្នុងគោលបំណងផ្តល់ការអប់រំភាសាអង់គ្លេសប្រកបដោយគុណភាពខ្ពស់ ដល់សិស្សានុសិស្ស និងជួយឱ្យពួកគេអភិវឌ្ឍទំនុកចិត្ត ជំនាញភាពជាអ្នកដឹកនាំ សមត្ថភាពរិះគិតពិចារណា ព្រមទាំងការយល់ដឹងកាន់តែទូលំទូលាយអំពីពិភពលោក បង្កើនឱកាសដល់សិស្សានុសិស្សនៅតាមបណ្តាខេត្តឱ្យទទួលបានការអប់រំភាសាអង់គ្លេសឱ្យមានប្រសិទ្ធភាព បង្កើតឱកាសឱ្យសិស្សានុសិស្សមកពីកម្ពុជា ឡាវ វៀតណាម និងសហរដ្ឋអាមេរិក បានរៀនសូត្រពីគ្នា ផ្លាស់ប្តូរបទពិសោធន៍ វប្បធម៌ និងកសាងចំណងមិត្តភាពអន្តរជាតិដ៏រឹងមាំទៅថ្ងៃអនាគត និងជួយឱ្យយុវជនបង្កើនសមត្ថភាពប្រកួតប្រជែង ស្របតាមផែនការយុទ្ធសាស្ត្រវិស័យអប់រំ ២០២៤-២០២៨ របស់ក្រសួងអប់រំ យុវជន និងកីឡា ដែលផ្តោតសំខាន់លើការអប់រំភាសាបរទេស ការធ្វើអន្តរជាតូបនីយកម្ម និងការអភិវឌ្ឍជំនាញដែលចាំបាច់សម្រាប់ការចូលរួមក្នុងកិច្ចការអន្តរជាតិ កម្មវិធីមួយដែលមានឈ្មោះថា «Access Summit 2026» ត្រូវបានរៀបចំឡើងនៅខេត្តសៀមរាប ដែលមានការចូលរួមពីគណៈគ្រប់គ្រង លោកគ្រូ អ្នកគ្រូ អ្នកជំនាញផ្នែកអប់រំ សិស្ស និស្សិតជាច្រើននាក់ ។

ក្នុងពិធីបើកដែលមានការចូលរួមពីលោក Benjamin Chiang ភារធារីស្តីទីនៃស្ថានទូតសហរដ្ឋអាមេរិកប្រចាំកម្ពុជា លោកស្រី Meloney Lindberg ប្រធានតំណាងអង្គការមូលនិធិអាស៊ីប្រចាំកម្ពុជា នាថ្ងៃទី១៨ ខែមិថុនា ឆ្នាំ២០២៦ ឯកឧត្តមបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡាបានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះស្ថានទូតសហរដ្ឋអាមេរិកប្រចាំកម្ពុជា ព្រមទាំងអង្គការមូលនិធិអាស៊ី ដែលបានសហការរៀបចំកម្មវិធីដ៏មានសារៈសំខាន់ និងមានអត្ថន័យជ្រាលជ្រៅនេះឡើង។

ឯកឧត្តមបណ្ឌិតបានគូសបញ្ជាក់ថា ស្ថានទូតសហរដ្ឋអាមេរិកតែងតែជាដៃគូដ៏មានស្មារតីលះបង់ និងរឹងមាំក្នុងការជួយពង្រឹងការអប់រំភាសាអង់គ្លេសនៅកម្ពុជា តាមរយៈការបណ្តុះបណ្តាលគ្រូ ការបញ្ជូនអ្នកជំនាញភាសាអង់គ្លេស កម្មវិធីផ្លាស់ប្តូរការអប់រំ និងវគ្គសិក្សាអនឡាញឥតគិតថ្លៃ ដែលកិច្ចខិតខំប្រឹងប្រែងទាំងនេះ មិនត្រឹមតែស្របតាមចក្ខុវិស័យ និងអាទិភាពរបស់ក្រសួងអប់រំ យុវជន និងកីឡាប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងសំខាន់ក្នុងការកសាងមូលធនមនុស្ស និងពង្រឹងចំណងមិត្តភាពរវាងប្រជាជន និងប្រជាជននៃប្រទេសទាំងពីរឱ្យកាន់តែជិតស្និទ្ធ និងយូរអង្វែង ថែមទៀតផង៕

ដោយ៖ ចាន់ សុភឿន (ប្រភព៖ ក្រសួងអប់រំ)