AKP បន្ទាយមានជ័យ ថ្ងៃទី១៩ ខែមិថុនា ឆ្នាំ២០២៦--ដើម្បីត្រួសត្រាយផ្លូវឆ្ពោះទៅរកភាពជោគជ័យក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី១០ ខែសីហា ឆ្នាំ២០២៦ នាពេលខាងមុខ សហភាពសហព័ន្ធយុវជនកម្ពុជា (ស.ស.យ.ក) ខេត្តបន្ទាយមានជ័យបានប្រកាសបើកវគ្គបំប៉នចំណេះដឹងដោយឥតគិតថ្លៃជូនដល់សិស្សានុសិស្សទូទាំងខេត្ត។

នេះគឺជាកិច្ចខិតខំប្រឹងប្រែងដ៏សំខាន់មួយ ដែលសហការយ៉ាងជិតស្និទ្ធជាមួយមន្ទីរអប់រំ យុវជន និងកីឡាខេត្តបន្ទាយមានជ័យ ក្នុងគោលបំណងពង្រឹងសមត្ថភាព និងបង្កើនទំនុកចិត្តដល់បេក្ខជនប្រឡងគ្រប់រូប។មុខវិជ្ជាគោលសម្រាប់បំប៉ននេះនឹងផ្ដោតសំខាន់លើមុខវិជ្ជាវិទ្យាសាស្ត្រ និងមុខវិជ្ជាសំខាន់ៗចំនួន ៥ រួមមាន៖ ភាសាខ្មែរ,គណិតវិទ្យា,គីមីវិទ្យា,រូបវិទ្យា,ជីវវិទ្យា។    

នៅក្នុងសេចក្តីប្រកាសនេះបានឱ្យដឹងថា វគ្គសិក្សាបំប៉ននេះ ចាប់ផ្តើមដំណើរការពីថ្ងៃទី១៩ ខែមិថុនា ឆ្នាំ២០២៦នេះតទៅដោយសិស្សានុសិស្សអាចចូលរួមរៀនសូត្របានតាមបណ្តាវិទ្យាល័យនានា ដែលស្ថិតក្នុងក្រុង-ស្រុកទាំង ៩ នៃខេត្តបន្ទាយមានជ័យ។

គម្រោងដ៏មានសារៈសំខាន់នេះ ទទួលបានការឧបត្ថម្ភ និងគាំទ្រយ៉ាងពេញទំហឹងពីសំណាក់ឯកឧត្តម កែ គឹម យ៉ាន និងលោកជំទាវ ម៉ៅ ម៉ាល័យ; ឯកឧត្ដម ស សុខា អនុប្រធានសហភាពសហព័ន្ធយុវជនកម្ពុជា ទទួលបន្ទុក៣ខេត្ត (បាត់ដំបង ព្រៃវែង និងបន្ទាយមានជ័យ); រួមជាមួយលោកជំទាវ កែ សួន សុភី និងលោក កែ សួន សុភាព ប្រធានសហភាពសហព័ន្ធយុវជនកម្ពុជា ខេត្តបន្ទាយមានជ័យ និងលោកស្រី ព្រហ្ម រដ្ឋា។

ជាមួយគ្នានោះ សហភាពសហព័ន្ធយុវជនកម្ពុជា ខេត្តបន្ទាយមានជ័យបានធ្វើការអំពាវនាវដល់ប្អូនៗសិស្សានុសិស្សទាំងអស់ សូមមេត្តាឆ្លៀតពេលចូលរួមសិក្សាឱ្យបានគ្រប់ៗគ្នា ដោយប្រកាន់ខ្ជាប់នូវវិន័យ និងការតាំងចិត្តខ្ពស់។ ការចូលរួមវគ្គបំប៉ននេះ មិនត្រឹមតែជាឱកាសសម្រាប់ពង្រឹងចំណេះដឹងដែលខ្លួននៅមានចន្លោះប្រហោងប៉ុណ្ណោះទេ ប៉ុន្តែវាក៏ជាការត្រៀមលក្ខណៈផ្លូវចិត្តដ៏ល្អ ដើម្បីដណ្ដើមយកជោគជ័យក្នុងការប្រឡងបាក់ឌុបនាពេលខាងមុខនេះផងដែរ។

ស.ស.យ.ក ខេត្តបន្ទាយមានជ័យសង្ឃឹមយ៉ាងមុតមាំថា តាមរយៈកិច្ចខិតខំប្រឹងប្រែងនេះ សិស្សានុសិស្សនឹងទទួលបានលទ្ធផលជាទីមោទនៈ សម្រាប់ជាទុនទៅបន្តការសិក្សានៅថ្នាក់ឧត្តមសិក្សា និងចូលរួមអភិវឌ្ឍន៍សង្គមជាតិទៅថ្ងៃអនាគត៕

ដោយ ឈុន សារ៉ាត