AKPបន្ទាយមានជ័យថ្ងៃទី ១៩ ខែមិថុនា ឆ្នាំ២០២៦–ការកសាងនិងរៀបចំទីក្រុងមួយឱ្យមានភាពធន់ មិនមែនត្រឹមតែជាការចាក់បេតុង ឬពង្រីកផ្លូវនោះទេ ប៉ុន្តែវាគឺជាការបង្កើត «ខឿនសេដ្ឋកិច្ច និងគុណភាពជីវិត» សម្រាប់ប្រជាពលរដ្ឋគ្រប់រូប។ 

នេះជាស្មារតីស្នូលនៃកិច្ចប្រជុំដ៏មានសារសំខាន់ កាលពីរសៀលថ្ងៃទី ១៨ មិថុនា ២០២៦ នេះ នៅសាលាខេត្តបន្ទាយមានជ័យ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងជំនួបពិនិត្យវឌ្ឍនភាព និងប្រមូលធាតុចូលលើការងាររៀបចំនគរូបនីយកម្មក្រុងសិរីសោភ័ណ។

នៅក្នុងកិច្ចប្រជុំនោះ ឯកឧត្តម ឧបនាយករដ្ឋមន្ត្រី សាយ សំអាល់បានសង្កត់ធ្ងន់យ៉ាងច្បាស់ៗថា ការរៀបចំដែនដី និងនគរូបនីយកម្ម មិនមែនជាការងារបច្ចេកទេសដាច់ដោយឡែកនោះទេ ប៉ុន្តែវាជាឧបករណ៍យុទ្ធសាស្ត្រក្នុងការបង្កើនចំណូល និងបង្កើតឱកាសសេដ្ឋកិច្ចដល់មូលដ្ឋាន។

«យើងត្រូវគិតគូរពីការរៀបចំក្រុងសិរីសោភ័ណ ឱ្យទៅជាទីក្រុងដែលមានការប្រកួតប្រជែង មានភាពទាក់ទាញ និងផ្តល់ភាពកក់ក្តៅដល់ការរស់នៅ។ ផែនការមេរៀបចំនិងអភិវឌ្ឍទីក្រុង (Master Plan) ត្រូវតែឆ្លុះបញ្ចាំងពីតម្រូវការជាក់ស្តែង និងការរៀបចំផ្ទះសម្បែងឱ្យមានសណ្តាប់ធ្នាប់ ដើរទន្ទឹមនឹងការជំរុញសេដ្ឋកិច្ចគ្រួសាររបស់ប្រជាពលរដ្ឋ»។ នេះជាប្រសាសន៍បញ្ជាក់ របស់ឯកឧត្តមឧបនាយករដ្ឋមន្ត្រី សាយ សំអាល់។

ឯកឧត្តមបានណែនាំឱ្យមានការពិនិត្យលើ ផែនការកែលម្អទីក្រុងនិងទីប្រជុំជន ដោយផ្តោតលើសសរស្តម្ភសំខាន់ៗភាពធន់របស់ទីក្រុង ការទប់ទល់នឹងការប្រែប្រួលអាកាសធាតុ ទឹកជំនន់ និងការធានាថាក្រុងអាចបន្តដំណើរការសេដ្ឋកិច្ចបានទោះជាស្ថិតក្នុងកាលៈទេសៈណាក៏ដោយ។

ហេដ្ឋារចនាសម្ព័ន្ធមូលដ្ឋាន ការពង្រឹងប្រព័ន្ធទឹកស្អាត, ការគ្រប់គ្រងសំណល់ និងប្រព័ន្ធអនាម័យ ឱ្យបានត្រឹមត្រូវតាមស្តង់ដារ បរិស្ថាន។ប្រព័ន្ធធ្វើដំណើរនិងចរាចរណ៍ ការរៀបចំបណ្តាញផ្លូវថ្នល់ដែលតភ្ជាប់ប្រកបដោយប្រសិទ្ធភាព កាត់បន្ថយការកកស្ទះ និងបង្កលក្ខណៈងាយស្រួលដល់ការដឹកជញ្ជូនពាណិជ្ជកម្ម។

មានប្រសាសន៍ក្នុងឱកាសនោះដែរ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានសម្តែងនូវការគាំទ្រយ៉ាងពេញទំហឹងចំពោះអនុសាសន៍ណែនាំរបស់ឯកឧត្តមឧបនាយករដ្ឋមន្ត្រី។ ឯកឧត្តមអភិបាលខេត្តបានរាយការណ៍ពីវឌ្ឍនភាព និងបញ្ហាប្រឈមមួយចំនួនក្នុងក្រុងសិរីសោភ័ណ ដោយបានលើកឡើងថា រដ្ឋបាលខេត្តកំពុងខិតខំកែលម្អមុខមាត់ទីប្រជុំជនជាប្រចាំ។

ឯកឧត្តម អ៊ុំ រាត្រី បានបញ្ជាក់ថា ដើម្បីឱ្យផែនការមេនេះជោគជ័យទៅបាន រដ្ឋបាលខេត្តនឹងពង្រឹងអភិបាលកិច្ចទីក្រុង   ឱ្យកាន់តែមានតម្លាភាព និងគណនេយ្យភាព។ អ្វីដែលជាចំណុចគន្លឹះ គឺការបង្កើតភាពជាដៃគូនិងមូលនិធិរវាងរដ្ឋ វិស័យឯកជន និងដៃគូអភិវឌ្ឍន៍ ដើម្បីកៀរគរទុនមកវិនិយោគលើប្រព័ន្ធលូ ប្រព័ន្ធចម្រោះទឹកកខ្វក់ និងការគ្រប់គ្រងសំណល់រឹង-រាវ ឱ្យមាននិរន្តរភាព។

លទ្ធផលនៃកិច្ចប្រជុំពិគ្រោះយោបល់នេះ បានបើកផ្លូវឱ្យមានការរៀបចំឡើងវិញនូវរចនាសម្ព័ន្ធក្រុងសិរីសោភ័ណ ដោយមិនបណ្តោយឱ្យទីក្រុងរីកដុះដាលដោយគ្មានសណ្តាប់ធ្នាប់នោះឡើយ។ ធាតុចូលសំខាន់ៗដែលទទួលបាន នឹងត្រូវយកទៅបញ្ចូលក្នុងផែនការសកម្មភាពជាក់ស្តែង ដើម្បីធានាថា ប្រជាពលរដ្ឋមានផ្ទះសម្បែងរស់នៅប្រកបដោយសេចក្តីថ្លៃថ្នូរ និងសុវត្ថិភាព។

ទីក្រុងមានប្រព័ន្ធទឹកស្អាតប្រើប្រាស់គ្រប់គ្រាន់ និងមានការគ្រប់គ្រងអនាម័យ-បរិស្ថានល្អស្រឡះ។ បង្កលក្ខណៈងាយស្រួលដល់ការធ្វើអាជីវកម្ម និងទាក់ទាញវិនិយោគិនតាមរយៈប្រព័ន្ធចរាចរណ៍ខ្វាត់ខ្វែងដ៏វៃឆ្លាត។

ជំនួបយុទ្ធសាស្ត្ររវាងក្រសួងរៀបចំដែនដី និងរដ្ឋបាលខេត្តបន្ទាយមានជ័យនៅថ្ងៃនេះ មិនត្រឹមតែជាការជជែកពីប្លង់មេនៅលើក្រដាសនោះទេ ប៉ុន្តែវាគឺជាការបោះជំហានយ៉ាងរឹងមាំក្នុងការកសាង ខឿនសេដ្ឋកិច្ចទីក្រុង ដែលយកផលប្រយោជន៍ និងសុភមង្គលរបស់ប្រជាពលរដ្ឋក្រុងសិរីសោភ័ណជាស្នូល និងជាអនាគតដ៏រឹងមាំនៃខេត្តជាប់ព្រំដែនមួយនេះ៕

ដោយ៖ ឈុន សារ៉ាត