AKP សៀមរាប ថ្ងៃទី១៩ ខែមិថុនា ឆ្នាំ២០២៦--ដើម្បីអបអរសាទរខួបលើកទី ២៥០ នៃការបង្កើតសហរដ្ឋអាមេរិក ស្ថានទូតអាម៉េរិកប្រចាំនៅកម្ពុជា និងមន្ត្រីការិយាល័យភាសាអង់គ្លេសថ្នាក់តំបន់ នៃស្ថានទូតអាម៉េរិក ប្រចាំនៅរដ្ឋធានីហាណូយ សហការជាមួយអង្គការមូលនិធិអាស៊ី បានធ្វើជាម្ចាស់ផ្ទះរៀបចំកិច្ចប្រជុំកំពូល សម្រាប់កម្មវិធីបង្រៀនអង់គ្លេស Access ថ្នាក់តំបន់នៅក្នុងខេត្តសៀមរាប។ នេះបើយោងតាមសេចក្ដីប្រកាសព័ត៌មានរបស់ស្ថានទូតអាម៉េរិកប្រចាំកម្ពុជា។

ក្នុងសេចក្ដីប្រកាសបានឱ្យដឹងថា ព្រឹត្តិការណ៍រយៈពេលបីថ្ងៃនេះ ធ្វើឡើងក្រោមប្រធានបទ «ការគិតគូរឡើងវិញ លើវិស័យអប់រំ» ដែលប្រមូលផ្តុំសិស្សានុសិស្ស និង លោកគ្រូ-អ្នកគ្រូ ដែលទទួលបានអាហារូបករណ៍ភាសាអង់គ្លេស ក្រោមកម្មវិធី Access មកពីប្រទេសកម្ពុជា ឡាវ វៀតណាម រួមទាំងអ្នកជំនាញវិស័យអប់រំ មកពីសហរដ្ឋអាមេរិក ដើម្បីបង្កើតបណ្តាញទំនាក់ ទំនងក្នុងតំបន់ ពង្រឹងសមត្ថភាពភាសា និងអភិវឌ្ឍសមត្ថភាពដឹកនាំ។ កិច្ចប្រជុំកំពូលនេះ ផ្តោតសំខាន់លើការរៀនសូត្រ តាមរយៈការអនុវត្តផ្ទាល់ និងវិធីសាស្ត្របង្រៀនបែបអាមេរិក ដោយបង្ហាញឱ្យឃើញពីទំនាក់ទំនងអប់រំ និងបង្កើនទំនាក់ទំនងប្រជាជន រវាងសហរដ្ឋអាមេរិក និងតំបន់អាស៊ីអាគ្នេយ៍។

លោក Benjamin Chiang ភារធារីនៃស្ថានទូតអាម៉េរិកប្រចាំនៅកម្ពុជា និងឯកឧត្តមបណ្ឌិត សោម រតនា អនុរដ្ឋលេខាធិការ ក្រសួងអប់រំ យុវជន និងកីឡា បានអញ្ជើញចូលរួមបើកកិច្ចប្រជុំកំពូល Access ថ្នាក់តំបន់នេះ ក្នុងខេត្តសៀមរាប កាលពីថ្ងៃទី១៨ ខែមិថុនា ឆ្នាំ២០២៦។

លោក Benjamin Chiang មានប្រសាសន៍ថា៖ «ការជួបជុំគ្នានៅថ្ងៃនេះ គឺឆ្លុះបញ្ចាំងពីការប្តេជ្ញាចិត្តរួមគ្នា របស់យើងក្នុងការលើកកម្ពស់ឧត្តមភាពអប់រំ ពង្រឹងការបណ្តុះបណ្តាលសមត្ថភាពភាសា និងត្រៀមយុវ ជនជំនាន់ក្រោយ សម្រាប់ទីផ្សារការងារនាពេលអនាគត។ ខ្ញុំសូមលើកទឹកចិត្តដល់សិក្ខាកាមទាំងអស់ឱ្យ ចេះចាប់យកឱកាសនេះ ដើម្បីពង្រឹងសមត្ថភាពភាសាអង់គ្លេស ជំនាញទំនាក់ទំនង និងជំនាញដឹកនាំរបស់ខ្លួន ព្រមទាំងចូលរួមយ៉ាងសកម្មក្នុងការស្វែងរកដំណោះស្រាយប្រកបដោយអត្ថន័យសម្រាប់សហ គមន៍របស់ពួកគេ»។

សូមជម្រាបជូនថា កម្មវិធីអាហារូបករណ៍ភាសាអង់គ្លេស Access បានគាំទ្រដល់អ្នកសិក្សាវ័យក្មេងរាប់ពាន់នាក់នៅទូទាំងតំបន់ តាមរយៈការបង្កើនឱកាស ដើម្បីទទួលបានការអប់រំភាសាអង់គ្លេស និងការបង្កើតឱកាស សម្រាប់ ការរីកចម្រើនផ្នែកសិក្សាធិការ និងវិជ្ជាជីវៈ។

សិស្សានុសិស្ស នឹងចូលរួមក្នុងសកម្មភាពផ្សេងៗ មានដូចជាការអនុវត្តគម្រោងរួមគ្នា សិក្ខាសាលាស្តីពី ភាពជាអ្នកដឹកនាំ និងកម្មវិធីវប្បធម៌ ដែលរៀបចំឡើង ដើម្បីជំរុញការតភ្ជាប់ទំនាក់ទំនងក្នុងតំបន់ និងការ ត្រៀមខ្លួនសម្រាប់ទីផ្សារការងារ៕ដោយ៖ រិទ្ធី