AKP កំពង់ធំ ថ្ងៃទី១៨ ខែមិថុនា ឆ្នាំ២០២៦--ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានអំពាវនាវដល់ប្រជាពលរដ្ ឋនិងយុវជនទាំងអស់ចូលរួមថែរក្សាអនាម័យបរិស្ថានឱ្យបានល្អ ធ្វើជាគំរូល្អនៅក្នុងសង្គម និងដាំដើមឈើនៅលើដីលំនៅដ្ឋាន ដីទំនេរ និងតាមដងផ្លូវសាធារណៈឱ្យបានច្រើន បន្ថែមសម្រស់បៃតង ការផ្តល់បរិយាកាសបរិសុទ្ធ ភាពត្រជាក់គួរជាទីគយគន់ ជាទីសំចតរបស់ភ្ញៀវទេសចរណ៍ជាតិ និងអន្តរជាតិដែលឆ្លងកាត់ខេត្តកំពង់ធំ។

ឯកឧត្តម នួន ផារ័ត្ន បានអំពាវនាវដូចនេះនៅក្នុងពិធីអបអរសាទរទិវាបរិស្ថានជាតិ និងបរិស្ថានពិភពលោក ០៥ មិថុនា ឆ្នាំ២០២៦ ក្រោមប្រធានបទ "សំណល់សូន្យ" នៅវិទ្យាល័យ ហ៊ុន សែន ក្រុងស្ទឹងសែន ខេត្តកំពង់ធំ កាលពីថ្ងៃទី១៧ ខែមិថុនា ឆ្នាំ២០២៦ ក្នុងគោលបំណងដើម្បីលើកកម្ពស់ការយល់ដឹងអំពីបរិស្ថាននិងជំរុញការចូលរួមពីគ្រប់ភាគីក្នុងការកាត់បន្ថយសំណល់ ការគ្រប់គ្រងសំរាម និងការពារភពផែនដីឱ្យកាន់តែស្អាត មានភាពបៃតងនិងមានចីរភាព។

ឯកឧត្តមអភិបាលខេត្តមានប្រសាសន៍បញ្ជាក់ថា ការប្រារព្ធទិវាបរិស្ថានជាតិ និងបរិស្ថានពិភពលោក ០៥ មិថុនា នៅថ្ងៃនេះ ជាការផ្តោតលើការយកចិត្តទុកដាក់លើការប្រែប្រួលអាកាសធាតុ និងការថែរក្សាអនាម័យបរិស្ថានតាមទីប្រជុំជន និងជនបទ តាមរយៈការរក្សាអនាម័យ និងគ្រប់គ្រងសំណល់ ដែលរដ្ឋបាលខេត្តកំពង់ធំបានកំពុងយកចិត្តទុកដាក់យ៉ាងខ្លាំង ជាពិសេសជំរុញការអភិវឌ្ឍវិស័យទេសចរណ៍ ភាពស្អាត ភាពបៃតង នៅក្នុងខេត្តកំពង់ធំឱ្យកាន់តែមានលក្ខណៈល្អប្រសើរ។

លើសពីនេះទៀត ខេត្តកំពង់ធំបានទទួលសមិទ្ធិផលមួយទាក់ទងនឹងអនាម័យ បរិស្ថាន និងការកែលម្អសោភ័ណភាពក្រុងស្ទឹងសែន ហើយក្រុងស្ទឹងសែនត្រូវបានប្រកាសថាជា "ទីក្រុងទេសចរណ៍គ្មានផ្សែងបារី"។ ឯកឧត្តមបានសង្កត់ធ្ងន់ថា សព្វថ្ងៃនេះ ដោយផ្អែកលើទិដ្ឋភាពជាក់ស្តែងនៅតាមទីសាធារណៈ យើងនៅឃើញមានសំណល់រឹង ជាពិសេសថង់ប្លាស្ទិក ដបទឹកសុទ្ធ បានបោះចោលរាយប៉ាយនៅតាមដងផ្លូវ និងនៅលើដីទំនេរនៅតាមទីប្រជុំជន និងជនបទមួយចំនួន។ ឯកឧត្តម បានណែនាំដល់មន្ទីរបរិស្ថាន សហការជាមួយរដ្ឋបាលក្រុងស្រុកដាក់ធុងសំរាម និងផ្លាកសញ្ញា ហាមចោលសំរាម នៅតាមទីសាធារណៈឱ្យបានច្រើនទីតាំង និងបន្តការផ្សព្វផ្សាយដល់ប្រជាពលរដ្ឋនៅតាមមូលដ្ឋាន ដើម្បីបង្កើនការយល់ដឹង និងការចូលរួមពីមហាជនទាំងអស់ក្នុងការគ្រប់គ្រងសំណល់ ជាពិសេសសំណល់ប្លាស្ទិក ដែលត្រូវបានពិភពលោកចាត់ទុកថា ជាការបង្កគ្រោះថ្នាក់លាក់មុខដល់សុខភាពមនុស្ស សត្វ និងរុក្ខជាតិ។

ការប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោកឆ្នាំ២០២៦ នៅក្នុងខេត្តកំពង់ធំ ត្រូវបានបង្កើតឱ្យមានសកម្មភាពសំខាន់ៗដូចជា ការជួបជុំគ្នាផ្សព្វផ្សាយ "សំណល់សូន្យ" ដែលជាប្រធានបទនៃទិវាបរិស្ថានឆ្នាំនេះ មានសំណួរចម្លើយ លើកកម្ពស់ចំណេះដឹងជាមួយយុវជន សិស្សានុសិស្ស ដើម្បីរួមចំណែកធ្វើឱ្យសាលារៀន វត្តអារាម និងសហគមន៍ទាំងមូលក្លាយជាទីតាំងស្អាត បៃតង និងមានការរស់នៅប្រកបដោយសុខុមាលភាព និងជីវភាពមានការរីកចម្រើន៕

ដោយ៖ ស៊ុម វណ្ណា