AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦-- ប្រភពពីអង្គការ Oxfam បានឱ្យដឹងនៅថ្ងៃទី១៥ ខែមិថុនា ឆ្នាំ២០២៦ ថា អង្គការអុកស្វាម Oxfam បានសហការជាមួយអង្គការ Good Return ក្រោមការគាំទ្រដោយធនាគារអភិវឌ្ឍន ហុឡង់ដ៍ (FMO) និងកំពុងរៀបចំវគ្គបណ្តុះបណ្តាលគ្រូបង្គោលរយៈពេល៥ថ្ងៃ ស្តីពីការលើកកម្ពស់និងពង្រឹងការយល់ដឹងផ្នែកហិរញ្ញវត្ថុសម្រាប់អតិថិជន ដល់សិក្ខាកាមចំនួន២៥រូប។

វគ្គបណ្តុះបណ្តាលនេះជាផ្នែកមួយនៃគម្រោងការទទួលបានជម្រើសយុត្តិធម៌ដើម្បីដោះស្រាយវិវាទបំណុលក្រៅប្រព័ន្ធតុលាការ ដឹកនាំអនុវត្តដោយអង្គការអុកស្វាម ក្រោមកិច្ចសហការជាមួយដៃគូចំនួន៥ អនុវត្តក្នុងខេត្តចំនួន៥។ បន្ទាប់ពីវគ្គបណ្តុះបណ្តាលនេះទី គ្រូបង្គោលទាំង២៥ រូបនេះ នឹងបន្តចែករំលែកចំណេះដឹងហិរញ្ញវត្ថុ នៅតាមមូលដ្ឋានទៅកាន់ក្រុមគោលដៅរបស់ខ្លួន ទៅតាមកម្មវិធីសិក្សាដែលបានរៀបចំ។

ក្រៅពីការផ្តល់ចំណេះដឹងលើផ្នែកហិរញ្ញវត្ថុ គម្រោងក៏នឹងធ្វើការផ្សព្វផ្សាយអំពីយន្តការដោះស្រាយវិវាទក្រៅប្រព័ន្ធតុលាការ សម្របសម្រួលដោះស្រាយករណីវិវាទជាក់ស្តែងទាក់ទង និងបញ្ហាហិរញ្ញវត្ថុ ដោយអជ្ញាធរជាតិដោះស្រាយវិវាទក្រៅប្រព័ន្ធតុលាការផងដែរ៕

ដោយ ណយ នឿន (ប្រភព៖ Oxfam)