AKP កំពង់ធំ ថ្ងៃទី១៣ ខែមិថុនា ឆ្នាំ ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ កាលពីររសៀលថ្ងៃទី១២ ខែមិថុនា ឆ្នាំ២០២៦បានដឹកនាំសហការីទៅជួយជួសជុលជម្រកស្នាក់នៅជូនយោធិនរងគ្រោះងគ្រោះដោយខ្យល់កន្ត្រាក់បណ្ដាលឱ្យខូចខាតផ្ទះទាំងស្រុងកាលពីថ្ងៃទី១០ខែមិថុនាឆ្នាំ២០២៦កន្លងទៅនេះគឺលោកពលបាលឯកគង់ សុខុម នាយទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងមានភារកិច្ចការពារបូរណភាពទឹកដីនៅខ្សែបន្ទាត់ព្រំដែនកម្ពុជា-ថៃ ។

ឧត្តមសេនីយ៍ទោ សោម​ ស៊ុន បានបញ្ជាក់ថា លោកពលបាលឯក គង់ សុខុម មានម្ដាយដែលមានវ័យចំណាស់​ និងភរិយាព្រមទាំងមានកូនតូចៗចំនួនពីរនាក់នៅក្នុងបន្ទុក រស់នៅក្នុងផ្ទះតៀមផ្ទាល់ដី ជញ្ជាំង និងដំបូលប្រក់ស័ង្កសី។ តែជាអកុសល នៅរសៀលថ្ងៃទី១០ ខែមិថុនាឆ្នាំ ២០២៦ កន្លងទៅនេះ​ ជម្រក​ស្នាក់​នៅ​របស់​គាត់​ត្រូវភ្លៀងមួយមេ និងខ្យល់កន្ទ្រាក់បោកបក់បណ្ដាលឱ្យប៉ើងរបើកដំបូលផ្ទះរងការខូចខាតទាំងស្រុង ។ ហើយលោកពលរបាលឯកគង់សុខុម ជាយោធិន​នៃ​បញ្ជាការ​ដ្ឋាន​តំបន់​ប្រតិបត្តិការ​សឹក​រង​កំពង់​ធំ​ដែលមានភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែនកម្ពុជា-ថៃ។

ដើម្បីដោះស្រាយនូវការលំបាកនេះ ឧត្តមសេនីយ៍ទោសោមស៊ុន បាននាំយកនូវ ស័ង្កសីចំនួន៦០ សន្លឹក អំណោយមនុស្សធម៌របស់សម្ដេចមហាបវរធិបតីហ៊ុន ម៉ាណែតនិងលោកជំទាវ ព្រមទាំងស្បៀងអាហារគ្រឿងឧបភោគបរិភោគ គ្រឿង​ឈេី​ និងថវិកាមួយចំនួន របស់​សប្បុរសជន​ និង​របស់​អង្គភាព​ យកទៅជួយឧបត្ថម្ភជូនក្រុមគ្រួសារគាត់ ហើយនឹងបានដឹកនាំកងកម្លាំងជួយជួសជុល ជម្រកស្នាក់នៅជូនក្រុមគ្រួសារគាត់បានរួចរាល់ទាំងស្រុងដែលជាការបង្ករនូវភាពកក់ក្តៅជូនដល់គ្រួសារយោធិននៅក្រោមឱវាទក្នុង​ពេល​ដែល​កំពុងមាន​ភារកិច្ច​ការពារ​បូរណភាព​ទឹកដី​ ។

ក្រុមគ្រួសារលោកពលបាលឯក គង់ សុខុម បានគោរពថ្លែងអំណរគុណដ៏ជ្រាលជ្រៅជាទីបំផុតចំពោះឧត្តមសេនីយ៍ទោសោម ស៊ុន ដែលបានជួយដោះស្រាយការលំបាកនេះជូនដល់ក្រុមគ្រួសារគាត់បានទាន់ពេលវេលា ដែល​នេះ​ជាគុណធម៌​ដែល​មិន​អាច​បំភ្លេច​បាន​ឡើយ​ និងសូមគោរពជូនពរលោកមេបញ្ជាការ និងសហការីទាំងអស់សូមទទួលបាននូវពុទ្ធពរទាំង ៤ ប្រការកុំបីឃ្លៀងឃ្លាតឡើយ៕

ដោយ ស៊ុម វណ្ណា