AKP ភ្នំពេញ ថ្ងៃទី១៣ ខែមិថុនា ឆ្នាំ២០២៦– ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា ថ្ងៃទី១២ ខែមិថុនា ឆ្នាំ២០២៦ បានអញ្ជើញបំពាក់កន្សែងជូនដល់មេដឹកនាំកាយរឹទ្ធិក្រសួងអប់រំ យុវជន និងកីឡា និងវិស័យឯកជន សរុបចំនួន ៥០នាក់ ដោយបានស្វាគមន៍យ៉ាងកក់ក្ដៅចំពោះមេដឹកនាំកាយរឹទ្ធិថ្មីទាំងនេះ ដែលត្រូវបានទទួលស្គាល់ជាសមាជិកពេញសិទ្ធិនៃក្រុមគ្រួសារកាយរឹទ្ធិជាតិកម្ពុជា។

ឯកឧត្តមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់ថា ការចូលរួមនេះ គឺជាការបង្ហាញនូវឆន្ទៈដ៏មុតមាំក្នុងការរួមចំណែកអភិវឌ្ឍន៍សង្គមជាតិ តាមរយៈការបណ្ដុះបណ្ដាលខ្លួនឱ្យក្លាយជាពលរដ្ឋល្អ ប្រកបដោយសីលធម៌ ចំណេះដឹង និងស្មារតីទទួលខុសត្រូវខ្ពស់។

បន្ថែមលើនេះ ឯកឧត្តមបានសម្ដែងនូវកតញ្ញូតាធម៌ និងថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាព្រឹទ្ធាចារ្យគរុគណ នៃកាយរឹទ្ធិជាតិកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាគរុគណនៃកាយរឹទ្ធិជាតិកម្ពុជា ដែលបានជួយឧបត្ថម្ភគាំទ្រដល់ដំណើរការចលនាកាយរឹទ្ធិនៅព្រះរាជាណាចក្រកម្ពុជាឱ្យមានការរីកចម្រើន និងមានសកម្មភាពខ្លាំងក្លារហូតមកដល់បច្ចុប្បន្ននេះ៕

ដោយ៖ ចាន់ សុភឿន (ប្រភព៖ ក្រសួងអប់រំ)