AKP បន្ទាយមានជ័យ ថ្ងៃទី១៣ ខែមិថុនា ឆ្នាំ២០២៦--ការចុះហត្ថលេខាលើកិច្ចសន្យាផលិតកម្មកសិកម្ម លើការផ្គត់ផ្គង់ស្រូវបាយរឹងពូជអ៊ីអ៊ែរ៥០៤ (IR504) រវាងសហគមន៍កសិកម្ម និងក្រុមហ៊ុនឯកជន គឺជាភស្តុតាងស្តែងឱ្យឃើញយ៉ាងច្បាស់ពីការយកចិត្តទុកដាក់ដ៏ខ្ពង់ខ្ពស់របស់រាជរដ្ឋាភិបាលកម្ពុជា ក៏ដូចជាក្រសួងកសិកម្ម រុក្ខាប្រមាញ់ និងនេសាទ ក្នុងការគិតគូរស្វែងរកទីផ្សារ និងស្ថិរភាពតម្លៃ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

នេះជាការលើកឡើងរបស់ លោករុន សុផាន់ណារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត តំណាងឱ្យលោកស្រីប្រធានស្តីទីមន្ទីរកសិកម្មខេត្តបន្ទាយមានជ័យ ក្នុងពិធីចុះហត្ថលេខាលើកិច្ចសន្យាផលិតកម្មកសិកម្ម ស្ដីពីការផ្គត់ផ្គង់ស្រូវបាយរឹងពូជអ៊ីអ៊ែរ៥០៤ (IR504) ចំនួន ០៥ កិច្ចសន្យា រវាងសហគមន៍កសិកម្ម/ក្រុមផលិត ជាមួយក្រុមហ៊ុន ស៊ីកនេត ឈ័រ រាយស៍ ឯ.ក (Signatures Rice Co., Ltd) កាលពីថ្ងៃទី១២ ខែមិថុនា ឆ្នាំ២០២៦ ម្សិលមិញនេះ។

នៅក្នុងពិធីដែលបានរៀបចំឡើងនៅមន្ទីរកសិកម្មខេត្ត ក្រោមការសម្របសម្រួលរបស់ការិយាល័យកសិ-ឧស្សាហកម្ម និងដោយមានកិច្ចសហការរវាងមន្ទីរកសិកម្ម និងអង្គការអភិវឌ្ឍន៍ជនបទកម្ពុជា (CIRD) លោករុន សុផាន់ណារ៉ា បានថ្លែងសង្កត់ធ្ងន់ពីសារប្រយោជន៍ដ៏មានតម្លៃនៃយន្តការកិច្ចសន្យាផលិតកម្មកសិកម្មនេះថា កិច្ចសន្យានេះមិនមែនគ្រាន់តែជាក្រដាសស្នាមមួយសន្លឹកនោះទេ ប៉ុន្តែវាជាខែលការពារដ៏រឹងមាំសម្រាប់បងប្អូនកសិករក្នុងការធានាបាននូវទីផ្សារពិតប្រាកដ និងតម្លៃមួយដែលច្បាស់លាស់មិនប្រែប្រួលតាមការបង្អាប់ថ្លៃពីឈ្មួញកណ្តាល។ នេះជាយុទ្ធសាស្ត្រគន្លឹះដែលរាជរដ្ឋាភិបាល និងក្រសួងកសិកម្ម តែងតែរុញច្រាន ដើម្បីកាត់បន្ថយហានិភ័យលើទីផ្សារ និងជួយឱ្យកសិករអាចទាញរកប្រាក់ចំណេញបានអតិបរមាពីរបរដាំដុះរបស់ខ្លួន។

លោកអនុប្រធានមន្ទីរបានបន្តអំពាវនាវ និងក្រើនរំលឹកដល់ភាគីទាំងពីរ (ខាងសហគមន៍កសិករ និងខាងក្រុមហ៊ុន) ត្រូវតែប្រកាន់ខ្ជាប់នូវគោលការណ៍ស្មោះត្រង់ និងរក្សាឱ្យបាននូវបរិមាណ ព្រមទាំងគុណភាពស្រូវទៅតាមបទដ្ឋានបច្ចេកទេសដែលបានព្រមព្រៀងគ្នា ដើម្បីរក្សាបាននូវកិច្ចសហប្រតិបត្តិការយូរអង្វែង និងប្រកបដោយនិរន្តរភាព។

សូមបញ្ជាក់ផងដែរថា នៅក្នុងពិធីចុះហត្ថលេខាដ៏មានសារៈសំខាន់នេះ មានការអញ្ជើញចូលរួមពីតំណាងក្រុមហ៊ុន, តំណាងអង្គការ CIRD, ប្រធានសហគមន៍កសិកម្ម, ប្រធានក្រុមផលិត និងសមាជិកពាក់ព័ន្ធ សរុបចំនួន ២២ នាក់ (ក្នុងនោះស្ត្រី ០៣ នាក់)។
បើតាមការបញ្ជាក់ពីមន្ទីរកសិកម្មខេត្តបន្ទាយមានជ័យ កិច្ចសន្យាចំនួន ០៥ នេះ ត្រូវបានចុះហត្ថលេខារវាងសហគមន៍ចំនួន ៣ និងក្រុមផលិតចំនួន ២ មកពីស្រុកព្រះនេត្រព្រះ ជាមួយក្រុមហ៊ុន ស៊ីកនេត ឈ័រ រាយស៍ ឯ.ក ដែលគ្រប់ដណ្តប់លើផ្ទៃដីដាំដុះសរុបចំនួន ៩០៦,២ ហិកតា មានសមាជិកផលិតចូលរួមសរុប ១៣៥ នាក់ ដោយរំពឹងថានឹងប្រមូលផលស្រូវផ្គត់ផ្គង់ជូនក្រុមហ៊ុនបានសរុបចំនួន ៥,៤៤០,៨ តោន នាពេលប្រមូលផលខាងមុខនេះ។

ពិធីនេះ ត្រូវបានគេមើលឃើញថា ជាជំហានវិជ្ជមានថ្មីមួយទៀតក្នុងការអនុវត្តន៍គោលនយោបាយអភិវឌ្ឍន៍វិស័យកសិកម្មជាតិ ក្នុងការចងក្រងសហគមន៍កសិកម្មទំនើប និងការតភ្ជាប់ខ្សែច្រវាក់ផលិតកម្មពីចម្ការទៅកាន់ទីផ្សារអន្តរជាតិ ប្រកបដោយទំនុកចិត្តនិងប្រសិទ្ធភាពខ្ពស់៕

ដោយ ឈុន សារ៉ាត