AKP កំពង់ឆ្នាំង ថ្ងៃទី១៣ ខែមិថុនា ឆ្នាំ២០២៦-- ឯកឧត្តមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បានអញ្ជើញពិនិត្យវឌ្ឍនភាពនៃការជួសជុលនិងបើកការដ្ឋានស្តារឡើងវិញផ្លូវក្រាលដីល្បាយគ្រួសចំនួន ១ខ្សែ និងស្ថាបនាស្ពានបេតុង ១កន្លែង ស្ថិតក្នុងឃុំក្រាំងស្គារ ស្រុកទឹកផុស ខេត្តកំពង់ឆ្នាំង កាលពីថ្ងៃទី១២ ខែមិថុនា ឆ្នាំ២០២៦។

ក្នុងឱកាសនោះឯកឧត្តមបណ្ឌិត ជ្រុន ថេរ៉ាវ៉ាត បានមានប្រសាសន៍ថា នេះគឺជាសមិទ្ធផលដ៏អស្ចារ្យ ​មួយ​ទៀតនូវហេដ្ឋារចនាសម្ព័ន្ធ ដែលជាសសៃឈាមសេដ្ឋកិច្ចដ៏មានសក្តានុពលរបស់ខេត្តកំពង់ឆ្នាំង។ ក្លាយជា​ផ្លូវ​ដ៏សំខាន់ជាមួយការតភ្ជាប់តំបន់ដទៃក្នុងការអភិវឌ្ឍន៍ខេត្តក៏ដូចជានៅទូទាំងប្រទេសកម្ពុជា ​​មានសក្តានុពលក្រោមក្របខណ្ឌនៃគំនិតផ្តួចផ្តើមខ្សែក្រវ៉ាត់ និងផ្លូវនិងគំនិតផ្តួចផ្តើមពីប្រមុខ ដឹកនាំរដ្ឋាភិបាលកម្ពុជា។

ឯកឧត្តមបណ្ឌិតបានបន្តថា រាជរដ្ឋាភិបាលកម្ពុជាក្រោមការដឹកនាំរបស់សម្តេចបវរធិបតី ហ៊ុន ម៉ាណែត
បានធ្វើឱ្យប្រទេសជាតិមានសុខសន្តិភាពពេញផ្ទៃប្រទេស ដែលបង្កបរិយាកាស ដល់ការសហការជាមួយដៃគូនានា ដោយស្មើមុខស្មើមាត់លើឆាកអន្តរជាតិ និងបានខិតខំប្រឹងប្រែងដោះស្រាយនូវរាល់ការលំបាក និងសំណូមពររបស់ប្រជាពលរដ្ឋ ព្រមទាំងបានធ្វើឱ្យប្រទេសជាតិរីកចម្រើនលើគ្រប់វិស័យ ជាពិសេសហេដ្ឋារចនាសម័ន្ធរូបវ័ននានា ផ្លូវ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ ជាដើម។

ថ្លែងក្នុងឱកាសនោះ ឯកឧត្តមបណ្ឌិត ជ្រុន ថេរ៉ាវ៉ាត បានគូសបញ្ជាក់ថា ប្រជាពលរដ្ឋដែលជាអ្នកទទួលផលសូមចូលរួមសហការ ជាមួយក្រុមការងាររាជរដ្ឋាភិបាល អាជ្ញាធរមូលដ្ឋានភូមិ ឃុំ ស្រុក និងជួយថែទាំផ្លូវនេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង អាចបម្រើផលប្រយោជន៍ជូនប្រជាពលរដ្ឋនិងចូលរួមដាំដើមឈើប្រកបដោយសោភ័ណភាព មានបរិស្ថានល្អ សំដៅលើកកម្ពស់សោភ័ណភាពខេត្ត កំពង់ឆ្នាំងឲ្យកាន់តែស្រស់បំព្រងថែមទៀតដើម្បីទាក់ទាញភ្ញៀវទេសចរនិងទទួលបានកំណើនសេដ្ឋកិច្ចដល់ប្រជាពលរដ្ឋយើងផងដែរ៕

ដោយ បៃ ស៊ីថុន