AKP ឧត្តរមានជ័យ ថ្ងៃទី១២ ខែមិថុនា ឆ្នាំ២០២៦-- លោក រិន សាគរ អភិបាលរងនៃគណៈអភិបាលក្រុងសំរោង បានអញ្ជើញចូលរួមក្នុង «ពិធីបង្ហាញពីដំណាំសាគូ» របស់កសិករគំរូ ឈ្មោះ លោក ថូ ដី ដែលជាម្ចាស់ចម្ការ និងជាកសិកររស់នៅភូមិភ្នៀត សង្កាត់សំរោង ក្រុងសំរោង ខេត្តឧត្តរមានជ័យ កាលពីថ្ងៃទី១១ ខែមិថុនា ឆ្នាំ២០២៦។

លោក រិន សាគរ បានថ្លែងថា ការជំរុញនិងលើកទឹកចិត្តដល់បងប្អូនកសិករក្នុងការដាំដុះដំណាំយុទ្ធសាស្ត្រ និងដំណាំប្លែកៗដែលមានទីផ្សារ គឺជាផ្នែកមួយយ៉ាងសំខាន់ក្នុងការបង្កើនចំណូល និងពង្រឹងសេដ្ឋកិច្ចមូលដ្ឋាន សកម្មភាពគាំទ្រផ្នែកកសិកម្មនេះ តែងតែទទួលបានការយកចិត្តទុកដាក់ និងជំរុញជាប្រចាំពីរដ្ឋបាលក្រុងសំរោង។

លោកបានថ្លែងបន្តថា គោលបំណង និងការវាយតម្លៃលើសក្តានុពលដំណាំ គឺការស្វែងយល់ពីបច្ចេកទេសដាំដុះ ការលើកទឹកចិត្តកសិករក្នុងមូលដ្ឋាន ការពិភាក្សាលើឱកាសទីផ្សារ ។ក្រុមការងារ ក៏បានចុះពិនិត្យផ្ទាល់ដល់ចម្ការ ដើម្បីសិក្សាស្វែងយល់ពីការលូតលាស់ បច្ចេកទេសថែទាំ និងការប្រមូលផលដំណាំសាគូ ដែលជាប្រភេទដំណាំមួយមានលក្ខណៈពិសេស និងផ្ដល់ទិន្នផលល្អលើដីនៃភូមិសាស្ត្រក្រុងសំរោង។

លោកអភិបាលរងក្រុងបានសម្តែងនូវការកោតសរសើរយ៉ាងខ្លាំងចំពោះ លោក ថូ ដី ដែលមានគំនិតច្នៃប្រឌិត ហ៊ានសាកល្បងដាំដុះដំណាំប្រភេទថ្មីនេះ រហូតទទួលបានជោគជ័យ ចេះកែច្នៃស្រទាប់ផ្កា ឬមើមសាគូ ដើម្បីបានបង្កើនតម្លៃបន្ថែមនិងអាចក្លាយជាគំរូដ៏ល្អសម្រាប់កសិករដទៃទៀតក្នុងសហគមន៍។ ហេតុនេះបងប្អូនកសិករខិតខំដាំដុះកាន់តែច្រើន ដើម្បីមានជីវភាពកាន់តែធូរធា។

លោកបន្តថា រដ្ឋបាលក្រុងសំរោងនឹងបន្តសហការជាមួយការិយាល័យជំនាញកសិកម្ម ដើម្បីចុះជួយគាំទ្រផ្នែកបច្ចេកទេសបន្ថែម និងជំរុញការផ្សព្វផ្សាយផលិតផលកសិកម្មក្នុងស្រុកឱ្យកាន់តែទូលំទូលាយ សំដៅប្រែក្លាយវិស័យកសិកម្មនៅក្នុងក្រុង ឱ្យទៅជាកសិកម្មទំនើប មានការច្នៃប្រឌិត និងមានតម្លៃសេដ្ឋកិច្ចខ្ពស់៕

ដោយ ទិត ស្រ៊