AKP ភ្នំពេញ ថ្ងៃទី១២ ខែមិថុនា ឆ្នាំ២០២៦ -- ប្រទេសកម្ពុជាកំពុងពង្រឹងភាពធន់ថាមពល និងពន្លឿនការផ្លាស់ប្តូររបស់ខ្លួនឆ្ពោះទៅរកថាមពលកកើតឡើងវិញ ដើម្បីកាត់បន្ថយផលប៉ះពាល់នៃការកើនឡើងនៃតម្លៃប្រេងឥន្ធនៈជាសកល។ នេះបើយោងតាមឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល នៅក្នុងបទសម្ភាសន៍ថ្មីៗនេះជាមួយសារព័ត៌មាម Channel News Asia (CNA)។

ថ្លែងទៅកាន់សារព័ត៌មាន CNA ដែលមានមូលដ្ឋាននៅប្រទេសសិង្ហបុរី ឯកឧត្តម កែវ រតនៈ បានមានប្រសាសន៍ថា ប្រទេសកម្ពុជានៅតែងាយរងគ្រោះដោយសារការរំខានពីទីផ្សារខាងក្រៅ ជាពិសេសការកើនឡើងយ៉ាងខ្លាំងនៃតម្លៃប្រេង និងឧស្ម័នអន្តរជាតិ ដែលបានប៉ះពាល់ដល់ប្រេងម៉ាស៊ូត សាំង និងឧស្ម័នប្រេងរាវ (LPG) ដែលដាក់សម្ពាធទៅលើគ្រួសារ និងសេដ្ឋកិច្ចយ៉ាងទូលំទូលាយ។

ឯកឧត្តមបានមានប្រសាសន៍ថា “យើងប្រឈមមុខនឹងការប៉ះទង្គិចពីខាងក្រៅនេះយ៉ាងខ្លាំង ហើយវាបានធ្វើឱ្យតម្លៃប្រេងម៉ាស៊ូត សាំង និងសូម្បីតែ LPG កើនឡើង ដែលមានផលប៉ះពាល់អវិជ្ជមានដល់សេដ្ឋកិច្ច និងប្រជាជនរបស់យើង”។ ដើម្បីទប់ស្កាត់ផលប៉ះពាល់ទាំងនេះ រាជរដ្ឋាភិបាលបានដាក់ចេញវិធានការដើម្បីកាត់បន្ថយការចំណាយសម្រាប់អ្នកប្រើប្រាស់ និងអាជីវកម្ម។ យោងតាមឯកឧត្តមរដ្ឋមន្ត្រី បានឱ្យដឹងថា កម្ពុជាបានបន្ថយពន្ធនាំចូល និងអាករលើផលិតផលប្រេង និងឧស្ម័ន ដើម្បីការពារការកើនឡើងនៃតម្លៃជាសកលពីការបញ្ជូនទៅទីផ្សារក្នុងស្រុកទាំងស្រុង។

រដ្ឋាភិបាលកម្ពុជាក៏បានលុបចោលពន្ធនាំចូលលើឧបករណ៍អគ្គិសនីមួយចំនួន រួមទាំងចង្រ្កានអគ្គិសនី ដើម្បីលើកទឹកចិត្តប្រជាជនឱ្យផ្លាស់ប្តូរពីការប្រើប្រាស់ឧស្ម័ន។ ទោះបីជាមានការប្រែប្រួលថាមពលជាសកលក៏ដោយ ក៏កម្ពុជាអាចរក្សាតម្លៃអគ្គិសនីឱ្យនៅកម្រិតជិតមុនពេលមានជំងឺកូវីដ-១៩ ដែលគាំទ្រដោយចំណែកថាមពលកកើតឡើងវិញកាន់តែច្រើនឡើងនៅក្នុងល្បាយថាមពលរបស់ប្រទេស។

ឯកឧត្តម កែវ រតនៈ បានកត់សម្គាល់ថា ប្រភពថាមពលកកើតឡើងវិញ ជាពិសេសថាមពលវារីអគ្គិសនី និងថាមពលព្រះអាទិត្យ ឥឡូវនេះមានចំនួនប្រហែល ៦៤% នៃសមត្ថភាពផលិតអគ្គិសនីដែលបានដំឡើងរបស់កម្ពុជា ដែលលើសពីគោលដៅក្នុងតំបន់របស់អាស៊ានដែលមានថាមពលកកើតឡើងវិញ ៤៥% នៅត្រឹមឆ្នាំ២០៣០។

កម្ពុជាកំពុងមានគោលបំណងបង្កើនតួលេខនេះឱ្យបានដល់យ៉ាងហោចណាស់ ៧០% នៅត្រឹមឆ្នាំ២០៣០។
ឯកឧត្តមបានមានប្រសាសន៍ថា ការពង្រីកថាមពលកកើតឡើងវិញនេះនឹងគាំទ្រដល់គោលដៅអភិវឌ្ឍន៍ប្រកបដោយចីរភាពរយៈពេលវែងរបស់កម្ពុជា ដោយកាត់បន្ថយការបំភាយឧស្ម័នកាបូន ខណៈដែលជួយកាត់បន្ថយថ្លៃថាមពលសម្រាប់ប្រជាជន និងឧស្សាហកម្ម។ ដោយមើលហួសពីកិច្ចខិតខំប្រឹងប្រែងជាតិ ឯកឧត្តមរដ្ឋមន្ត្រីបានគូសបញ្ជាក់ពីការគាំទ្ររបស់កម្ពុជាចំពោះការធ្វើសមាហរណកម្មថាមពលក្នុងតំបន់កាន់តែស៊ីជម្រៅតាមរយៈគំនិតផ្តួចផ្តើមបណ្តាញអគ្គិសនីអាស៊ាន។ ឯកឧត្តមបានកត់សម្គាល់ថា កម្ពុជាកំពុងធ្វើការយ៉ាងជិតស្និទ្ធជាមួយដៃគូអាស៊ាន រួមទាំងប្រទេសសិង្ហបុរី ដើម្បីជំរុញការតភ្ជាប់អគ្គិសនីឆ្លងកាត់ព្រំដែន និងសម្រួលដល់ការផ្ទេរថាមពលស្អាតនៅទូទាំងតំបន់។ បច្ចុប្បន្ន កម្ពុជានាំចូលអគ្គិសនីពីប្រទេសជិតខាង រួមទាំងវារីអគ្គិសនីពីប្រទេសឡាវ និងអគ្គិសនីរហូតដល់ ២៥០មេហ្គាវ៉ាត់ពីប្រទេសវៀតណាមក្នុងអំឡុងពេលមានតម្រូវការខ្ពស់បំផុត។

ឯកឧត្តមរដ្ឋមន្ត្រីបានសង្កត់ធ្ងន់ថា ការភ្ជាប់ទំនាក់ទំនងក្នុងតំបន់បានក្លាយជាសមាសធាតុសំខាន់មួយនៃយុទ្ធសាស្ត្រសន្តិសុខថាមពលរបស់កម្ពុជា។ ឯកឧត្តមបានមានប្រសាសន៍ថា “ភាពធន់ គឺជាសសរស្តម្ភមួយនៃគោលនយោបាយថាមពលរបស់យើង ហើយយើងឃើញថា បណ្តាញក្នុងស្រុកដែលធន់ត្រូវបានបង្កើននៅពេលដែលយើងមានការតភ្ជាប់គ្នា”។

ដោយឆ្លុះបញ្ចាំងពីការផ្លាស់ប្តូរថាមពលរបស់កម្ពុជា ឯកឧត្តម កែវ រតនៈ បានកត់សម្គាល់ថា ប្រទេសនេះពីមុនពឹងផ្អែកស្ទើរតែទាំងស្រុងលើប្រេងម៉ាស៊ូត និងប្រេងឥន្ធនៈធ្ងន់ដែលនាំចូលសម្រាប់ការផលិតអគ្គិសនី ប៉ុន្តែចាប់តាំងពីពេលនោះមក កម្ពុជាបានទទួលវឌ្ឍនភាពគួរឱ្យកត់សម្គាល់ឆ្ពោះទៅរកប្រភពថាមពលដែលស្អាត និងមានភាពចម្រុះជាងមុន។ ឯកឧត្តមបានគូសបញ្ជាក់ថា “នេះជាហេតុផលមួយដែលកម្ពុជាកំពុងឈរយ៉ាងរឹងមាំប្រឆាំងនឹងការប៉ះទង្គិចជាសកលទាក់ទងនឹងការផលិត និងការប្រើប្រាស់អគ្គិសនី”៕

ដោយ៖ យា ចិន្តាខន្តី