AKP ភ្នំពេញ ថ្ងៃទី១២ ខែមិថុនា ឆ្នាំ២០២៦--ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប នៃក្រសួងធនធានទឹក​ និងឧតុនិយម កាលពីថ្ងៃទី១១ ខែមិថុនា ឆ្នាំ២០២៦ បានជួបប្រជុំពិភាក្សាជាមួយអាជ្ញាធរឃុំជាប់តំបន់បឹងទន្លេសាប នៃស្រុកថ្មគោល ខេត្តបាត់ដំបង ដើម្បីចុះពិនិត្យព្រំតំបន់៣​ ដើម្បីផ្ទៀងផ្ទាត់ជាមួយព័ត៌មានទិន្នន័យដែលមាននៅលេីផែនទី​ និងនៅទីតាំងមូលដ្ឋានជាក់ស្តែង។

ឯកឧត្តមអគ្គលេខាធិការអាជ្ញាធរទន្លេសាប បានលើកឡើងថា ការជួបប្រជុំពិភាក្សាជាមួយអាជ្ញាធរ និងការចុះទៅពិនិត្យផ្ទាល់ បានផ្តោតទៅលើការអាស្រ័យផល របស់ប្រជាពលរដ្ឋ​ឱ្យមានប្រសិទ្ធភាពក្នុងតំបន់ដែលរាជរដ្ឋាភិបាលអនុញ្ញាតសំដៅលេីកកម្ពស់ជីវភាពគ្រួសារ និងធានាបាននូវសន្តិសុខស្បៀងរួមចំណែកទ្រទ្រង់សេដ្ឋកិច្ចជាតិ​ និងចុះពិនិត្យព្រំតំបន់៣​ ដើម្បីផ្ទៀងផ្ទាត់ជាមួយព័ត៌មានទិន្នន័យដែលមាននៅលេីផែនទី​ និងនៅទីតាំងមូលដ្ឋានជាក់ស្តែង ព្រមទាំងបន្តចុះពិនិត្យ​ការថែទាំ​ បាញ់ថ្នាំ​ និងបង់លេខសម្គាល់បង្គោលកំណត់ព្រំតំបន់៣ ការពារព្រៃលិចទឹកក្នុងភូមិសាស្ត្រ ឃុំតាពូន តាម៉ឺន ជ្រោយស្ដៅ និងឃុំបឹងព្រីង ស្រុកថ្មគោល ខេត្តបាត់ដំបង។

ការចុះពិនិត្យព្រំតំបន់៣ នេះមានកិច្ចសហការចូលរួមពីអភិបាលរងស្រុក​ ក្រុមប្រឹក្សាឃុំ មេឃុំ អនុប្រធានការិយាល័យកសិកម្មស្រុក ប្រធានភូមិបាលស្រុក រួមជាមួយមេភូមិ អនុភូមិដែលមានការពាក់ព័ន្ធសរុប ២១នាក់។

ដោយ៖ ណយ នឿន (ប្រភព៖ អាជ្ញាធរទន្លេសាប)