AKP បន្ទាយមានជ័យថ្ងៃទី១១ខែមិថុនាឆ្នាំ២០២៦--វិស័យកសិកម្មនៅក្នុងស្រុកមង្គលបូរី បានឈានចូលដល់របត់ថ្មីមួយទៀត តាមរយៈការលេចរូបរាងឡើងនូវសហគមន៍កសិកម្មទំនើបផ្នែកដំណាំស្រូវជាលើកដំបូង បន្ទាប់ពីទទួលបានជោគជ័យលើសហគមន៍កសិកម្មទំនើបផ្នែកបន្លែកន្លងមក។

ការបង្កើតសហគមន៍ថ្មីនេះ មិនត្រឹមតែជាការបើកទំព័រប្រវត្តិសាស្ត្រនៃការដាំដុះរួមគ្នាប៉ុណ្ណោះទេ ប៉ុន្តែជាការឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់រាជរដ្ឋាភិបាល ក៏ដូចជាក្រសួងកសិកម្ម រុក្ខាប្រមាញ់ និងនេសាទ ក្នុងការដោះស្រាយបញ្ហាប្រឈម និងលើកស្ទួយជីវភាពពុកម៉ែបងប្អូនកសិករដោយផ្ទាល់។

 នៅក្នុងពិធីសម្ពោធដាក់ឱ្យដំណើរការជាផ្លូវការនូវ សហគមន៍កសិកម្មទំនើបដំណាំស្រូវ «មង្គលបូរីជោគជ័យ» កាលពីថ្ងៃទី១០ ខែមិថុនា ឆ្នាំ២០២៦ ម្សិលមិញនេះ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារចុះមូលដ្ឋានស្រុកអូរជ្រៅ តំណាងក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានមានប្រសាសន៍សង្កត់ធ្ងន់យ៉ាងស៊ីជម្រៅទៅលើទស្សនវិស័យ និងគោលន យោបាយគន្លឹះនៃគំរូកសិកម្មថ្មីនេះ។

ថ្លែងទៅកាន់បងប្អូនកសិកររាប់រយនាក់ដែលបានចូលរួមយ៉ាងកុះករ ឯកឧត្តម ឃឹម ហ្វីណង់ បានបញ្ជាក់ថា រាជរដ្ឋាភិ បាលកម្ពុជាជានិច្ចកាលតែងតែរួមសុខរួមទុក្ខ និងតាមដានយ៉ាងយកចិត្តទុកដាក់ចំពោះជីវភាពរស់នៅរបស់ប្រជាកសិករ។ 

ឯកឧត្តមបានលើកឡើងថា កសិករខ្នាតតូចតែងតែជួបប្រទះហានិភ័យខ្ពស់ ទាំងលើបញ្ហាតម្លៃដើមផលិតកម្ម ការប្រែ ប្រួលអាកាសធាតុ និងការប្រកួតប្រជែងលើទីផ្សារ។ហេតុទើបក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវយុទ្ធសាស្ត្រ «សហគមន៍កសិកម្មទំនើប» នេះឡើង ដើម្បីធ្វើជាខ្នងបង្អែកដ៏រឹងមាំ ជួយកាត់បន្ថយរាល់ហានិភ័យទាំងឡាយ និងធានាថាការធ្វើកសិកម្មរបស់បងប្អូននឹងទទួលបានផលចំណេញត្រឡប់មកវិញជាអតិបរមា។

«ការចងក្រងគ្នាជាសហគមន៍កសិកម្មទំនើប មិនមែនគ្រាន់តែជាការប្រមូលផ្តុំមនុស្សនោះទេ ប៉ុន្តែវាគឺជាការរួមរស់ជាមួយគ្នា រួមគិត រួមធ្វើ រួមទទួលខុស ត្រូវ និងបែងចែកផលចំណេញរួមគ្នា។ នេះជាយន្តការដោះស្រាយបញ្ហាជីវភាពកសិករប្រកបដោយចីរភាព និងជួយឱ្យកសិករដើរទាន់ការវិវត្តនៃសេដ្ឋកិច្ចទីផ្សារសេរី»។នេះជាប្រសាសន៍ របស់ ឯកឧត្តម ឃឹម ហ្វីណង់។

យោងតាមប្រសាសន៍របស់ឯកឧត្តមអនុរដ្ឋលេខាធិការ ការផ្លាស់ប្តូរទម្លាប់ពីការធ្វើកសិកម្មលក្ខណៈគ្រួសារ ដាច់ ដោយឡែកពីគ្នា មកជាការធ្វើកសិកម្មលក្ខណៈរួមខ្នាតធំ តាមរយៈសហគមន៍កសិកម្មទំនើប មានសារសំខាន់ជាយុទ្ធសាស្ត្រកាត់បន្ថយថ្លៃដើមផលិតយ៉ាងច្រើន តាមរយៈការបញ្ជាទិញធាតុចូលកសិកម្ម (ពូជ ជី ថ្នាំ) ក្នុងបរិមាណច្រើន និងការប្រើប្រាស់គ្រឿងចក្ររួមគ្នា។ពង្រឹងបច្ចេកទេស និងគុណភាព ការអនុវត្តស្តង់ដារតែមួយ ឆ្លើយតប ទៅនឹងតម្រូវការទីផ្សារជាក់លាក់។

ការធានាទីផ្សារ និងស្ថិរភាពតម្លៃ មានអំណាចក្នុងការចរចាជាមួយក្រុមហ៊ុនប្រមូលទិញ ដោយមានកិច្ចសន្យាច្បាស់លាស់ មិនបារម្ភរឿងឈ្មួញកណ្តាលបង្អាប់ថ្លៃ។ការទទួល បានទុន និងការគាំទ្រ ងាយស្រួលក្នុងការទទួលបានឥណទានដែលមានអត្រាការប្រាក់ទាប និងការគាំទ្របច្ចេកទេសផ្ទាល់ពីមន្ត្រីជំនាញកសិកម្ម។  

ការលេចរូបរាងឡើងនៃសហគមន៍កសិកម្មទំនើបដំណាំស្រូវ «មង្គលបូរីជោគជ័យ» ដែលមានទីស្នាក់ការស្ថិតនៅភូមិគោកព្នៅ ឃុំបន្ទាយនាង ស្រុកមង្គលបូរី ត្រូវបានគេមើលឃើញថាជាការបោះជំហានដ៏ធំមួយ។ នេះជាសហគមន៍កសិកម្មទំនើបទី៤ របស់ខេត្តបន្ទាយមានជ័យ ប៉ុន្តែជាសហគមន៍ផ្នែកដំណាំស្រូវ «ដំបូងគេបង្អស់» នៅក្នុស្រុកមង្គលបូរី ដែលជាជង្រុកស្រូវដ៏សំខាន់មួយ។ ចំនួនសមាជិក  ៥២០ គ្រួសារ (មកពី ១០ ឃុំជុំវិញ) ផ្ទៃដីដាំដុះរួម  ១,៥៥០ ហិកតា ។ ប្រភេទកសិផលគន្លឹះ ស្រូវពូជសែនក្រអូប, ស្រង៉ែ, និង អូអឹម (OM)។ រចនាសម្ព័ន្ធដឹកនាំ ក្រុមប្រឹក្សាភិបាល ៩ នាក់ និងគណៈកម្មាធិការត្រួតពិនិត្យ ៣ នាក់ ។  

ព្រឹត្តិការណ៍សម្ពោធនេះ មិនត្រឹមតែជាការអបអរសាទរចំពោះសមិទ្ធផលថ្មីប៉ុណ្ណោះទេ ប៉ុន្តែជាការប្តេជ្ញាចិត្តរួមគ្នារវាងរាជរដ្ឋាភិបាល អាជ្ញាធរដែនដី និងប្រជាកសិករ ក្នុងការប្រែក្លាយវាលស្រែស្រុកមង្គលបូរី ឱ្យទៅជាតំបន់ផលិតកម្មស្រូវប្រកបដោយសក្តានុពលខ្ពស់ បង្កើនប្រាក់ចំណូល និងនាំមកនូវភាពញញឹមប្រកបដោយក្តីសង្ឃឹមជូនដល់គ្រួសារកសិករខ្មែរគ្រប់រូប៕

ដោយ ៖ឈុនសារ៉ាត