AKP កំពង់ចាម ថ្ងៃទី១០ ខែមិថុនា ឆ្នាំ២០២៦-- ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម នាព្រឹកថ្ងៃទី១០ ខែមិថុនា ឆ្នាំ២០២៦នេះបានដឹកនាំកិច្ចប្រជុំរៀបចំផែនការការពារសន្តិសុខ សណ្ដាប់ធ្នាប់សាធារណៈ ក្នុងការត្រៀមលក្ខណៈ ការដាក់សម្ពោធឱ្យប្រើប្រាស់ជាផ្លូវការ នូវ កំណាត់ផ្លូវជាតិលេខ៧ ចាប់ពីចំណុចបំបែកស្គន់ រហូតដល់ក្រុងកំពង់ចាម ក្រោយពីបានបញ្ចប់នូវគម្រោងពង្រីក និងលើកកម្ពស់គុណភាពផ្លូវជាតិលេខ៧ ជាបួនគន្លងដែលមានសួនច្បារនៅកណ្តាលទ្រូងផ្លូវ។

ថ្លែងក្នុងកិច្ចប្រជុំឯកឧត្តមអភិបាលខេត្ត បានឱ្យដឹងថា ពិធីដាក់សម្ពោធជាផ្លូវការនេះនឹងត្រូវប្រារព្ធធ្វើនៅថ្ងៃទី០៧ ខែកក្កដា ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណា ចក្រកម្ពុជា ដែលអាចមានអ្នកចូលរួមប្រមាណជា ៧ ០០០ នាក់។

ឯកឧត្តម អ៊ុន ចាន់ដា បញ្ជាក់ថា ដើម្បីឱ្យកម្មវិធីប្រព្រឹត្តទៅបានល្អ បញ្ហាដែលផ្តោតសំខាន់នោះគឺការការពារសន្តិសុខសណ្តាប់ធ្នាប់សាធារណៈ ដែលបានធ្វើការណែនាំ និង បានដាក់បញ្ជាយ៉ាងម៉ឺងម៉ាត់ដល់កងកម្លាំងប្រដាប់អាវុធទាំង ៣ ប្រភេទ រួមទាំងអាជ្ញាធរពាក់ព័ន្ធ ទាំងអស់ ត្រូវ ត្រៀមលក្ខណៈសម្បត្តិឱ្យគ្រប់គ្រាន់ នឹងសហការគ្នា ក្នុងការ ចូលរួមការពារ សន្តិសុខសណ្តាប់ធ្នាប់ សាធារណៈ ឱ្យមានល្អ និងមានប្រសិទ្ធភាពបំផុត ដើម្បីធានា ឱ្យបាននូវសន្តិសុខនិងសុវត្ថិភាពដល់ ប្រមុខថ្នាក់ដឹកនាំក៏ដូចជាថ្នាក់ដឹកនាំដែលអញ្ជើញចូលរួមក្នុងពិធីនេះប្រកបដោយ សុខសុវត្ថិភាព ពិសេសលើផ្នែកសម្របសម្រួលចរាចរណ៍ តាម គោលដៅ ចរាចរណ៍ និងពង្រាយកម្លាំងការពារសុវត្ថិភាព ។

ឯកឧត្តមអភិបាលខេត្ត បានបញ្ជាក់បន្ថែមដែរថា ចំពោះក្រុម ពិធីការនៃកម្មវិធីការងារត្រូវបែងចែកតួនាទី ឲ្យបានច្បាស់លាស់ក្នុងការសម្របសម្រួល តាមទីតាំងឈរជើងហើយមន្ទីរសុខាភិ បាលត្រូវត្រៀមក្រុមគ្រូពេទ្យចល័ត និងរថយន្តសង្គ្រោះបន្ទាន់ ដើម្បីប្រចាំការជួយ សង្គ្រោះបឋមជានិច្ច។

ឯកឧត្តម អ៊ុន ចាន់ដា បានបញ្ជាក់ថា គម្រោងពង្រីកផ្លូវជាតិលេខ៧ (ពីវង្វង់មូលស្គន់ ដល់ក្រុងកំពង់ចាម)នេះគឺជាសមិទ្ធផលប្រវត្តិសាស្ត្រថ្មីមួយទៀតសម្រាប់ខេត្តកំពង់ចាម ដែលជាសរសៃឈាមសេដ្ឋកិច្ចដ៏សំខាន់ ជួយសម្រួលដល់ការធ្វើដំណើរ និងការដឹកជញ្ជូនឱ្យកាន់តែលឿនរហ័ស។ ហើយពិធីសម្ពោធជាផ្លូវការនឹងប្រព្រឹត្តទៅនៅថ្ងៃទី០៧ ខែកក្កដា ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕

ដោយ ឆាយ ម៉ុត