AKP បន្ទាយមានជ័យ ថ្ងៃទី ១០ ខែមិថុនា ឆ្នាំ២០២៦--បន្ទាប់ពីការខិតខំប្រឹងប្រែងរៀបចំផែនការយ៉ាងយកចិត្តទុកដាក់ ទីបំផុត «សហគមន៍កសិកម្មទំនើបមាន់ស្រែ» នៅតំបន់ជំរំជនភៀសសឹក ភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ ត្រូវបានបង្កើតឡើងជាផ្លូវការហើយ ដែលនេះគឺជាក្តីសង្ឃឹមថ្មីសម្រាប់បងប្អូនពលរដ្ឋក្នុងការស្តារជីវភាពឱ្យកាន់តែប្រសើរឡើង។

ថ្លែងក្នុងពិធីសម្ពោធកាលពីរសៀលថ្ងៃទី០៩ ខែមិថុនា ឆ្នាំ២០២៦ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារចុះមូលដ្ឋានស្រុកអូរជ្រៅ បានគូសបញ្ជាក់ពីសារសំខាន់នៃការបង្កើតសហគមន៍នេះថា គឺជាយុទ្ធសាស្ត្រគន្លឹះដើម្បីផ្លាស់ប្តូរទម្លាប់ពីការធ្វើកសិកម្មបែបគ្រួសារធម្មតា ទៅជាកសិកម្មដែលមានសហគ្រិនភាព និងមានទីផ្សារច្បាស់លាស់។   

សហគមន៍កសិកម្មទំនើបដ៏ថ្មីសន្លាងនេះកំពុងទទួលបានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋ។ គិតត្រឹមពេលនេះ មានគ្រួសារជាង ៦០០គ្រួសារ បានចុះឈ្មោះចូលជាសមាជិកក្នុងជំហានដំបូង។ ទោះជាយ៉ាងណាក៏ដោយ ក្រុមការងាររំពឹងទុកថា ចំនួននេះនឹងកើនឡើងដល់ ១,០០០គ្រួសារ នៅពេលដែលដំណើរការចុះឈ្មោះត្រូវបានបិទបញ្ចប់នាពេលខាងមុខ។

ដើម្បីធានាឱ្យបានថា ការចិញ្ចឹមមាន់នេះទទួលបានជោគជ័យ និងមាននិរន្តរភាព ក្រសួងកសិកម្មបានរៀបចំនូវកញ្ចប់គាំទ្រយ៉ាងពេញលេញជូនដល់សមាជិកនីមួយៗ រួមមានហេដ្ឋារចនាសម្ព័ន្ធ ទ្រុងចិញ្ចឹមមាន់តាមលក្ខណៈស្តង់ដារចំនួន ១។ដើមទុនផលិតកម្ម ពូជកូនមាន់ស្រែអាយុ ២១ថ្ងៃ ចំនួន ១០០ក្បាល។សុខភាពសត្វ ការគាំទ្រវ៉ាក់សាំងការពារជំងឺគ្រប់ប្រភេទ។ចំណីអាហារ ការផ្គត់ផ្គង់ចំណីសម្រាប់ចិញ្ចឹមក្នុងវគ្គដំបូង។ការបណ្តុះបណ្តាល ការបង្រៀនបច្ចេកទេសចិញ្ចឹម និងការចុះតាមដានជាប់ជាប្រចាំពីមន្ត្រីជំនាញ។ការធានាទីផ្សារ ការចុះកិច្ចសន្យាធានាទិញយកវិញក្នុងតម្លៃសមរម្យនៅពេលប្រមូលផល។

ការបង្កើតសហគមន៍កសិកម្មទំនើបនេះ មិនត្រឹមតែជាការដោះស្រាយបញ្ហាជីវភាពចំពោះមុខប៉ុណ្ណោះទេ ប៉ុន្តែថែមទាំងជាការកសាងមូលដ្ឋានគ្រឹះនៃសេដ្ឋកិច្ចមូលដ្ឋាន ដែលអាចឱ្យប្រជាពលរដ្ឋមានសមត្ថភាពផលិតខ្លួនឯង មានទីផ្សារលក់ចេញច្បាស់លាស់ និងឈានទៅរកភាពស្វ័យគ្រប់គ្រងផ្នែកសេដ្ឋកិច្ចនៅពេលអនាគត៕

ដោយ ឈុន សារ៉ាត