AKP បន្ទាយមានជ័យ ថ្ងៃទី០៧ ខែមិថុនា ឆ្នាំ២៩២៦ -- ថ្នាក់ដឹកនាំព្រឹទ្ធសភា និងមន្ត្រីជំនាញ បានអំពាវនាវយ៉ាងទទូចដល់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ និងប្រជាពលរដ្ឋទាំងអស់ មិនត្រឹមតែចូលរួមដាំកូនឈើដើម្បីបង្កើនគម្របបៃតងប៉ុណ្ណោះទេ ប៉ុន្តែត្រូវរួមគ្នាថែទាំកូនឈើទាំងនោះឱ្យរស់រានមានជីវិត និងលូតលាស់រឹងមាំ ដើម្បីជាប្រយោជន៍ដល់បរិស្ថានជាតិ និងការរស់នៅរបស់មនុស្សជំនាន់ក្រោយ ស្របតាមនិរន្តរភាពបរិស្ថាន។   

ការជំរុញបែបនេះ បានធ្វើឡើងនៅក្នុងពិធីដាំកូនឈើ ដើម្បីអបអរសាទរទិវាបរិស្ថានពិភពលោក និងទិវាបរិស្ថានជាតិ ខួបលើកទី៣០ ក្រោមប្រធានបទ «សំណល់សូន្យ» (៥ មិថុនា ១៩៩៦ - ៥ មិថុនា ២០២៦) កាលពីរសៀលថ្ងៃសុក្រ ទី៥ ខែមិថុនា ឆ្នាំ២០២៦ ម្សិលមិញនេះ ដែលបានប្រព្រឹត្តទៅនៅក្នុងឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ។     

ពិធីដ៏មានសារៈសំខាន់នេះ ត្រូវបានរៀបចំឡើងដោយមន្ទីរបរិស្ថានខេត្តបន្ទាយមានជ័យ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឈើយ ចាន់ណា លេខាធិការគណ:កម្មការទី៧ព្រឹទ្ធសភា និងជាលេខាធិការក្រុមសមាជិកព្រឹទ្ធសភាប្រចាំភូមិភាគទី៤ ដោយមានការអញ្ជើញចូលរួមពី ឧត្តមសេនីយ៍ទោ កែវ សេងឡាយ មេបញ្ជាការរង បញ្ជាការដ្ឋានរថក្រោះអគ្គបញ្ជាការ និងឯកឧត្តម ហ៊ូ ប៊ុនហេងសមាជិកក្រុមប្រឹក្សាខេត្ត រួមទាំងលោក លោកស្រី ថ្នាក់ដឹកនាំ មន្ត្រីជំនាញនៃមន្ទីរបរិស្ថានខេត្ត-ស្រុក លោកប្រធានក្រុមប្រឹក្សាស្រុក អភិបាលរងស្រុក និងមន្ត្រីរាជការនៃអង្គភាពចំណុះរដ្ឋបាលស្រុកព្រះនេត្រព្រះយ៉ាងច្រើនកុះករ។

នៅក្នុងឱកាសនោះ ឯកឧត្តម ឈើយ ចាន់ណា បានថ្លែងសុន្ទរកថាដោយលើកបង្ហាញយ៉ាងស៊ីជម្រៅអំពីសារប្រយោជន៍មិនអាចកាត់ថ្លៃបាននៃដើមឈើ ដោយឯកឧត្តមបានគូសបញ្ជាក់ថា ដើមឈើគឺជាខ្យល់ដង្ហើមនៃភពផែនដី ជាប្រភពទ្រទ្រង់ជីវិតមនុស្ស សត្វ ជួយរក្សាលំនឹងធម្មជាតិ ទប់ស្កាត់ការប្រែប្រួលអាកាសធាតុ និងជួយកាត់បន្ថយគ្រោះធម្មជាតិនានា។

ដើម្បីឱ្យយុទ្ធនាការដាំកូនឈើនេះទទួលបានផ្លែផ្កាពិតប្រាកដ និងមិនមែនជាការដាំជានិមិត្តរូប ឯកឧត្តមលេខាធិការគណៈកម្មការទី៧ព្រឹទ្ធសភា បានសង្កត់ធ្ងន់ និងដាក់ចេញនូវការណែនាំសំខាន់ៗថា«ការដាំកូនឈើ គឺជារឿងមួយដ៏ប្រសើរ ប៉ុន្តែអ្វីដែលរឹតតែសំខាន់ជាងនេះទៅទៀតនោះ គឺការបន្តថែទាំ បោចស្មៅ និងស្រោចទឹកកូនឈើដែលបានដាំរួចទាំងនោះ ឱ្យមានជីវិតរស់រាន និងលូតលាស់ធំធាត់ទៅថ្ងៃអនាគត។ យើងត្រូវរួមគ្នាផ្លាស់ប្តូរទម្លាប់ពីការគ្រាន់តែដាំ មកជាការដាំប្រកបដោយការទទួលខុសត្រូវខ្ពស់»។

ទន្ទឹមនឹងការលើកកម្ពស់គម្របបៃតង ឯកឧត្តម ឈើយ ចាន់ណា ក៏បានរំលេចបន្ថែមអំពីអត្ថន័យនៃប្រធានបទ «សំណល់សូន្យ» នៃទិវាបរិស្ថានឆ្នាំនេះ ដោយបានដាស់តឿនដល់បងប្អូនប្រជាពលរដ្ឋ និងអាជ្ញាធរមូលដ្ឋាន ឱ្យបង្កើនការយកចិត្តទុកដាក់លើការគ្រប់គ្រងកាកសំណល់ ការកាត់បន្ថយការប្រើប្រាស់ផ្លាស្ទិក និងការវេចខ្ចប់ទុកដាក់សំរាមឱ្យបានត្រឹមត្រូវ ដើម្បីកសាងភូមិ-ឃុំ មានភាពខៀវស្រស់បំព្រង គ្មានការបំពុល និងមានសោភ័ណភាពទាក់ទាញ។

សកម្មភាពដាំកូនឈើនាឱកាសនោះ មិនត្រឹមតែជាការចូលរួមអបអរសាទរទិវាបរិស្ថានជាតិនោះទេ ប៉ុន្តែវាក៏ជាសារចលនាបំផុសគំនិត និងមនសិការស្រឡាញ់បរិស្ថាន ដល់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋគ្រប់រូប ក្នុងស្រុកព្រះនេត្រព្រះ ក៏ដូចជាទូទាំងខេត្តបន្ទាយមានជ័យ ឱ្យស្ម័គ្រចិត្តចូលរួមការពារធនធានធម្មជាតិ និងបរិស្ថានរស់នៅជុំវិញខ្លួន ចាប់ពីពេលនេះតទៅ ដើម្បីការអភិវឌ្ឍប្រកបដោយចីរភាព និងបន្សល់ទុកនូវកេរមរតកបៃតងដ៏មានតម្លៃសម្រាប់កូនចៅជំនាន់ក្រោយ៕

ដោយ ឈុន សារ៉ាត