AKP បន្ទាយមានជ័យ ថ្ងៃទី០៦ ខែមិថុនា ឆ្នាំ២០២៦ -- បន្ទាប់ពីការឃាត់ខ្លួន និងឃុំខ្លួននៅក្នុងប្រទេសថៃអស់រយៈពេលជាច្រើនថ្ងៃ ពលករខ្មែរចំនួន ១២២នាក់ (ស្រី ៤៤នាក់ និងកុមារ ១៤នាក់) ត្រូវបានអាជ្ញាធរថៃបញ្ជូនត្រឡប់មកមាតុភូមិវិញតាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ កាលពីរសៀលថ្ងៃទី០៥ ខែមិថុនា ឆ្នាំ២០២៦។ ក្នុងឱកាសនោះ អាជ្ញាធរកម្ពុជាបានទទួលស្វាគមន៍ដោយក្តីមេត្តាធម៌ និងមានការយកចិត្តទុកដាក់យ៉ាងកក់ក្តៅ។ ពិធីទទួលបងប្អូនពលករនេះ មានការអញ្ជើញចូលរួមផ្ទាល់ពីឯកឧត្តម ប៉ាន់ខែម ប៊ុនថន ប្រធានក្រុមការងាររាជរដ្ឋាភិបាលកម្ពុជាចុះមូលដ្ឋានក្រុងប៉ោយប៉ែត ឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត លោក គាត ហ៊ុល អភិបាលក្រុងប៉ោយប៉ែត ព្រមទាំងមន្ត្រីពាក់ព័ន្ធជាច្រើនរូបទៀត។

លោកឧត្តមសេនីយ៍ត្រី អ៊ី ចំរើន បានថ្លែងឱ្យដឹងថា ដោយអនុវត្តតាមគោលនយោបាយមនុស្សធម៌របស់រាជរដ្ឋាភិបាល ភ្លាមៗក្រោយពីទទួលបានពលករពីភាគីថៃ កម្លាំងសមត្ថកិច្ចបានផ្តល់នូវអាហារសម្រន់ រួមមាននំប៉័ង និងទឹកបរិសុទ្ធ ដើម្បីសម្រួលដល់ការនឿយហត់របស់ពួកគាត់។ លោកនាយប៉ុស្តិ៍បានបញ្ជាក់អំពីមូលហេតុនៃការបញ្ជូនពលករទាំងនេះថា «ពលករទាំងអស់នេះ ត្រូវបានអាជ្ញាធរថៃចាប់ខ្លួនដោយសារការស្នាក់នៅ និងធ្វើការងារដោយខ្វះឯកសារច្បាប់ត្រឹមត្រូវ។ ក្នុងនោះមានទាំងអាជីវករខ្មែរដែលលក់ដូរនៅផ្សាររុងក្លឿរ អ្នកដែលឆ្លងដែនខុសច្បាប់ក្បែរព្រំដែន និងពលករដែលធ្វើការងារចំការតាមបន្ទាត់ព្រំដែន ដោយត្រូវបានអាជ្ញាធរថៃឃាត់ខ្លួនរយៈពេលពី ១៥ ទៅ ២០ថ្ងៃ ទើបបញ្ជូនត្រឡប់មកកម្ពុជាវិញ»។ ក្រោយពីបញ្ចប់ការសាកសួរព័ត៌មាន និងបំពេញបែបបទតាមនីតិវិធី កម្លាំងជំនាញបានរៀបចំរថយន្តដឹកជញ្ជូនពលករទាំងអស់ទៅកាន់មណ្ឌលសំចតបណ្តោះអាសន្ន ដើម្បីរៀបចំបញ្ជូនពួកគាត់ឱ្យទៅដល់លំនៅដ្ឋានកំណើតវិញដោយសុវត្ថិភាព។

ក្នុងឱកាសនោះ ថ្នាក់ដឹកនាំក្រុមការងារ ក៏បានឆ្លៀតឱកាសអប់រំណែនាំដល់បងប្អូនពលករទាំងអស់ឱ្យមានការប្រុងប្រយ័ត្នខ្ពស់ បញ្ឈប់ការចាញ់បោកមេខ្យល់ និង សូមឱ្យបងប្អូនប្រជាពលរដ្ឋមានការប្រុងប្រយ័ត្នចំពោះការអូសទាញពីសំណាក់មេខ្យល់ ដែលនាំឱ្យមានហានិភ័យទាំងផ្លូវច្បាប់ និងសុវត្ថិភាពផ្ទាល់ខ្លួន។ លើកទឹកចិត្តដល់បងប្អូនឱ្យស្វែងរកការងារធ្វើនៅក្នុងប្រទេសកម្ពុជា ដែលបច្ចុប្បន្នមានឱកាសការងារច្រើនកំពុងរង់ចាំ និងមានការគាំទ្រពីគោលនយោបាយអភិវឌ្ឍន៍របស់រាជរដ្ឋាភិបាល។ ទង្វើនេះបង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាលកម្ពុជា ដែលតែងតែនៅក្បែរ និងដោះស្រាយទុក្ខលំបាករបស់ប្រជាពលរដ្ឋគ្រប់ពេលវេលា ទោះបីជាពួកគាត់ស្ថិតក្នុងកាលៈទេសៈបែបណាក៏ដោយ៕

ដោយ៖ ឈុន សារ៉ាត