AKP ភ្នំពេញ ថ្ងៃទី០៤ ខែមិថុនា ឆ្នាំ២០២៦ -- ទីភ្នាក់ងារសារព័ត៌មានជាតិ(NNA) ដែលគ្រប់គ្រងដោយរដ្ឋរបស់ប្រទេសលីបង់ បានរាយការណ៍ថាបុគ្គលិកសង្គ្រោះបន្ទាន់ម្នាក់ត្រូវបានសម្លាប់កាលពីថ្ងៃពុធ នៅក្នុងការវាយប្រហារដោយយន្តហោះគ្មានមនុស្សបើករបស់អ៊ីស្រាអែលនៅភាគខាងត្បូងប្រទេសលីបង់ បើទោះបីជាមានបទឈប់បាញ់គ្នាជាបន្តបន្ទាប់រវាងភាគីទាំងពីរក៏ដោយ។

ទីភ្នាក់ងារសារព័ត៌មាននេះបាននិយាយថា ការវាយប្រហារនេះបានកំណត់គោលដៅទៅលើសង្កាត់ al-Ain នៃទីក្រុងអារ៉ាប់សាលីម ក្នុងស្រុកណាបាទី ដោយបានសម្លាប់បុគ្គលិកសង្គ្រោះបន្ទាន់ម្នាក់ដែលមានទំនាក់ទំនងជាមួយសមាគមកាយរឹទ្ធិរីសាឡា។

ទីភ្នាក់ងារសារព័ត៌មាន NNA បានរាយការណ៍ថា ការវាយប្រហារដោយយន្តហោះគ្មានមនុស្សបើករបស់អ៊ីស្រាអែលលើកទីពីរ ក្រោយមកបានវាយប្រហារសង្កាត់ឡាបបាណេ នៅក្នុងទីក្រុងដដែល។

មិនមានរបាយការណ៍ភ្លាមៗអំពីអ្នកស្លាប់ និងរបួស ឬការខូចខាតបន្ថែមទេ។

ការវាយប្រហារនេះបានកើតឡើងនៅមួយថ្ងៃបន្ទាប់ពីមន្ត្រីលីបង់ និងអ៊ីស្រាអែលបានធ្វើកិច្ចចរចាជុំទីបួនដែលឧបត្ថម្ភដោយសហរដ្ឋអាមេរិកនៅទីក្រុងវ៉ាស៊ីនតោន ដែលមានគោលបំណងរក្សាបទឈប់បាញ់ និងដោះស្រាយបញ្ហាសន្តិសុខដែលនៅសេសសល់។

អ៊ីស្រាអែលបានបន្តការវាយប្រហារតាមអាកាសស្ទើរតែរាល់ថ្ងៃ និងការវាយលុកលើដីនៅលីបង់ បើទោះបីជាមានបទឈប់បាញ់គ្នាដែលចូលជាធរមាននៅថ្ងៃទី១៧ ខែមេសា ហើយក្រោយមកត្រូវបានពង្រីករហូតដល់ដើមខែកក្កដាក៏ដោយ។

យោងតាមក្រសួងសុខាភិបាលលីបង់ បានឱ្យដឹងថា ការវាយប្រហាររបស់អ៊ីស្រាអែលចាប់តាំងពីថ្ងៃទី០២ ខែមីនា បានសម្លាប់មនុស្ស៣.៤៦៨នាក់ និងរបួស ១០.៥៧៧នាក់ផ្សេងទៀតនៅទូទាំងប្រទេស។

អ៊ីស្រាអែលនៅតែបន្តកាន់កាប់តំបន់ជាច្រើននៅភាគខាងត្បូងប្រទេសលីបង់ រួមទាំងទឹកដីដែលកាន់កាប់អស់ជាច្រើនទសវត្សរ៍កន្លងមក ក៏ដូចជាតំបន់ដែលរឹបអូសបានក្នុងអំឡុងពេលមានជម្លោះឆ្នាំ២០២៣-២៤ ខណៈដែលកងកម្លាំងរបស់ខ្លួនក៏បានរុលទៅមុខជាច្រើនគីឡូម៉ែត្រចូលទៅក្នុងទឹកដីលីបង់ក្នុងអំឡុងពេលអរិភាពបច្ចុប្បន្ន៕

ដោយ៖ យា ចិន្ដាខន្ដី (ប្រភព៖ AA-AKP)