AKP ភ្នំពេញ ថ្ងៃទី០៣ ខែមិថុនា ឆ្នាំ២០២៦ -- សារព័ត៌មាន Financial Times បានរាយការណ៍កាលពីថ្ងៃអង្គារថា សហរដ្ឋអាមេរិកកំពុងពិភាក្សាអំពីថា តើត្រូវដាក់ពង្រាយអាវុធនុយក្លេអ៊ែរនៅក្នុងបណ្តារដ្ឋអឺរ៉ុបជាសមាជិកអង្គការណាតូបន្ថែមទៀតឬអត់។

មន្ត្រីសហរដ្ឋអាមេរិកបានបង្ហាញសញ្ញាបើកចំហចំពោះការដាក់ពង្រាយបន្ថែមលើសពីប្រទេសចំនួនប្រាំមួយដែលមានស្រាប់ ដែលមានយន្តហោះទម្លាក់គ្រាប់បែកដែលមានសមត្ថភាពនុយក្លេអ៊ែរ។ នេះបើយោងតាមការលើកឡើងរបស់មនុស្សបីនាក់ដែលត្រូវបានជូនដំណឹងអំពីកិច្ចពិភាក្សានេះ។

សារព័ត៌មាននេះបាននិយាយថា ការអនុវត្តនេះនឹងពាក់ព័ន្ធនឹងប្រទេសជាច្រើនទៀតដើម្បីធ្វើជាម្ចាស់ផ្ទះនៃយន្តហោះដែលហៅថា យន្តហោះដែលមានសមត្ថភាពពីរ (DCA) របស់សហរដ្ឋអាមេរិក ដែលអាចធ្វើការវាយប្រហារដោយនុយក្លេអ៊ែរ ខណៈដែលព្រមានថា កិច្ចព្រមព្រៀងដើម្បីពង្រីកការធ្វើជាម្ចាស់ផ្ទះនុយក្លេអ៊ែររបស់សហរដ្ឋអាមេរិកមិនទាន់មកដល់នៅឡើយទេ។

របាយការណ៍នេះបាននិយាយថា ប្រទេសនានានៅផ្នែកខាងកើតរបស់អង្គការណាតូ រួមទាំងប្រទេសប៉ូឡូញ និងរដ្ឋបាល់ទិកមួយចំនួន មានចំណាប់អារម្មណ៍ក្នុងការធ្វើជាម្ចាស់ផ្ទះមូលដ្ឋាន DCA ដោយបន្ថែមថា កិច្ចពិភាក្សាកំពុងដំណើរការនៅក្នុងបណ្តាញអង្គការណាតូ។

ទីភ្នាក់ងារសារព័ត៌មានរ៉យទ័រមិនអាចផ្ទៀងផ្ទាត់របាយការណ៍នេះភ្លាមៗបានទេ។ សេតវិមាន ក្រសួងការពារជាតិ និងអង្គការណាតូ មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

លោក អ៊ែលប្រ៊ីដ ខូលប៊ី ប្រធានគោលនយោបាយរបស់មន្ទីរបញ្ចកោណ ធ្លាប់បាននិយាយជាសាធារណៈថា សហរដ្ឋអាមេរិកនឹងបន្តប្រើប្រាស់អាវុធនុយក្លេអ៊ែររបស់ខ្លួន ដើម្បីការពារសមាជិកអង្គការណាតូ បើទោះបីជាសម្ព័ន្ធមិត្តអឺរ៉ុបនាំមុខលើកងកម្លាំងធម្មតាក៏ដោយ។

ប្រធានាធិបតីសហរដ្ឋអាមេរិក លោក ដូណាល់ ត្រាំ និងជំនួយការជាច្រើនរបស់លោក បានរិះគន់សម្ព័ន្ធមិត្តអឺរ៉ុបចំពោះការមិនចំណាយគ្រប់គ្រាន់ទៅលើយោធារបស់ពួកគេ និងពឹងផ្អែកលើសហរដ្ឋអាមេរិកសម្រាប់ការការពារបែបធម្មតា៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)