AKP ភ្នំពេញ ថ្ងៃទី០៣ ខែមិថុនា ឆ្នាំ២០២៦ -- ប្រភពព័ត៌មានបាននិយាយថាទីប្រឹក្សាសន្តិសុខជាតិកូរ៉េខាងត្បូង លោក វី ស៊ុង-អ៊ាក គ្រោងនឹងជួបពិភាក្សាជាមួយអនុរដ្ឋមន្ត្រីការបរទេសសហរដ្ឋអាមេរិក លោក អេលលីសិន ហ៊ូកឃើរ ដែលកំពុងបំពេញទស្សនកិច្ចនៅកូរ៉េខាងត្បូងកាលពីថ្ងៃអង្គារដោយអ្នកទាំងពីរទំនងជាពិភាក្សាគ្នាអំពីការជំរុញរបស់ទីក្រុងសេអ៊ូលក្នុងការសាងសង់នាវាមុជទឹកដើរដោយថាមពលនុយក្លេអ៊ែរ។

យោងតាមប្រភពព័ត៌មានបានឱ្យដឹងថា លោក វី និងលោក ហ៊ូកឃើរអនុរដ្ឋមន្ត្រីការបរទេសទទួលបន្ទុកកិច្ចការនយោបាយ នឹងជួបគ្នានៅការិយាល័យឈឹងវ៉ាដេ នៅម៉ោង ២:០០នាទីរសៀល ដើម្បីពិភាក្សាអំពីបញ្ហាជាច្រើនដែលមិនទាន់សម្រេច ដែលទំនងជារួមទាំងការជំរុញរបស់ទីក្រុងសេអ៊ូលក្នុងការធានាសិទ្ធិអំណាចកាន់តែច្រើនក្នុងការបង្កើនសារធាតុអ៊ុយរ៉ាញ៉ូម និងកែច្នៃឡើងវិញនូវឥន្ធនៈនុយក្លេអ៊ែរដែលបានប្រើប្រាស់សម្រាប់នាវាមុជទឹកដើរដោយថាមពលនុយក្លេអ៊ែរដែលខ្លួនបានគ្រោងទុក។

ពួកគេបានកត់សម្គាល់ថា ការពិភាក្សានេះក៏អាចស៊ើបអង្កេតទៅលើផែនការរបស់សម្ព័ន្ធមិត្តក្នុងការផ្ទេរការគ្រប់គ្រងប្រតិបត្តិការក្នុងសម័យសង្គ្រាមលើកងទ័ពកូរ៉េពីទីក្រុងវ៉ាស៊ីនតោនទៅទីក្រុងសេអ៊ូលផងដែរ។

ក្នុងការដឹកនាំគណៈប្រតិភូសហរដ្ឋអាមេរិក លោក ហ៊ូកឃើរ បានទៅដល់ប្រទេសកូរ៉េខាងត្បូងកាលពីមួយថ្ងៃមុន ខណៈដែលសម្ព័ន្ធមិត្តទាំងពីរគ្រោងនឹងចាប់ផ្តើមកិច្ចចរចាបន្តលើកិច្ចព្រមព្រៀងដែលសម្រេចបានដោយលោកប្រធានាធិបតី លី ជេម្យុង និងប្រធានាធិបតីសហរដ្ឋអាមេរិកលោក ដូណាល់ ត្រាំ កាលពីខែតុលា ស្តីពីផែនការរបស់ទីក្រុងសេអ៊ូលក្នុងការសាងសង់នាវាមុជទឹកដើរដោយថាមពលនុយក្លេអ៊ែរ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)