AKP ភ្នំពេញ ថ្ងៃទី0១ ខែមិថុនា ឆ្នាំ២០២៦--ក្នុងយុទ្ធនាការប្រឆាំងព័ត៌មានក្លែងក្លាយដែលធ្វើឡើងដោយក្រសួងព័ត៌មានស្តីពី «និយាយថាទេចំពោះព័ត៌មានក្លែងក្លាយ» ជំហានទី២ មន្រ្ដីជាន់ខ្ពស់ក្រសួងព័ត៌មានបានធ្វើការណែនាំ និងអំពាវនាវដល់យុវជន និងសិស្សានុសិស្សឱ្យបង្កើនការយល់ដឹង ក្នុងការញែកឱ្យដាច់រវាងព័ត៌មានពិត និងព័ត៌មានក្លែងក្លាយ ដើម្បីទប់ស្កាត់ការបំភាន់ ការភ័យខ្លាច និងការបង្កចលាចល ដែលអាចបង្កគ្រោះថ្នាក់ធ្ងន់ធ្ងរដល់សង្គមជាតិ។

ថ្លែងក្នុងពិធីផ្សព្វផ្សាយយុទ្ធនាការ”និយាយថាទេចំពោះព័ត៌មានក្លែងក្លាយ” ជំហ៊ានទី២ នាព្រឹកថ្ងៃទី១ ខែមិថុនា ឆ្នាំ២០២៦ នៅវិទ្យាល័យសម្តេច ហ៊ុនសែន ភ្នំពេញថ្មី ក្នុងរាជធានីភ្នំពេញ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានលើកឡើងថា សិស្សានុសិស្សត្រូវតែចេះសង្កេតមើលថាតើព័ត៌មានដែលយើងទទួលបានតាមរយៈបណ្តាញសង្គម ឬតាមបណ្តាញសារព័ត៌មានណាមួយ ថាតើអាចយកជាការបានឬទេ។ ឯកឧត្ដមបានបញ្ជាក់ថា យុវជនត្រូវចេះថ្លឹងថ្លែង ហើយពិចារណាបានត្រឹមត្រូវទើបមិនត្រូវធ្លាក់ក្នុងប្រភពព័ត៌មានក្លែងក្លាយដែលវាមិនត្រឹមតែយកជាការពុំបានទេ តែនៅបង្កគ្រោះថ្នាក់ដល់បញ្ហាសង្គជាតិបានទៀតផង។ ឯកឧត្ដមអ្នកនាំពាក្យក្រសួងព័ត៌បានបញ្ជាក់ប្រាប់ដល់សិស្សានុសិស្សផងដែរអំពីការប្រើប្រាស់ទូរស័ព្ទស្មាតហ្វូនបច្ចុប្បន្នឱ្យមានការប្រុងប្រយ័តុ្ននូវការទទួលព័ត៌មានក្លែងក្លាយ។ ឯកឧត្ដមបានសង្កត់ធ្ងន់ថា៖ «យុវជនត្រូវចេះការពារខ្លួនពីព័ត៌មានក្លែងក្លាយ ជឿជាក់តែលើប្រភពផ្លូវការ និងមិនត្រូវចែករំលែកព័ត៌មានមិនពិត ដែលអាចបង្កគ្រោះថ្នាក់ដល់ខ្លួនឯង និងសង្គមជាតិ»។

ជាមួយគ្នានេះ លោក ហែម ស៊ីណារ៉េត ប្រធានមន្ទីរអប់រំយុវជន និងកីឡារាជធានីភ្នំពេញបានថ្លែងបញ្ជាក់ថាយុទ្ធនាការប្រឆាំងព័ត៌មានក្លែងក្លាយដែលបានធ្វើការផ្សព្វផ្សាយដល់សិស្សានុសិស្ស ពិតជារឿងមួយចាំបាច់ដែលមិនអាចមើលរំលងបានទេ។ លោកបានបន្ដថា ការរលើកកម្ពស់នៃចំណេះដឹងផ្នែកព័ត៌មាននេះគឺបានចូលរួមធ្វើឱ្យយុវជនដែលជាពលរដ្ឋជំនាន់ក្រោយបានយល់ដឹង និងប្រឆាំងរាល់ព័ត៌មានក្លែងក្លាយក្នុងយុគសម័យឌីជីថល ដែលជាផ្នែកមួយពង្រឹងលើសន្តិសុខសង្គម និងការអភិវឌ្ឍន៍សង្គមជាតិ។

លោកប្រធានមន្ទីរបានបញ្ជាក់បន្ថែមថា ការប្រឈមនឹងព័ត៌មានក្លែងក្លាយវាជាផ្នែកមួយអាចបង្កការប៉ះពាល់ដល់ការសិក្សា ប៉ះទង្គិចផ្លូវចិត្ត សតិអារម្មណ៍ បង្កការបាក់បែកសាមគ្គីភាព ការបាត់បង់សីលធម៌សង្គម ហើយពេលខ្លះទៀតអាចបង្កនូវអំពើហិង្សាដល់សង្គម ដែលជាគ្រោះថ្នាក់មួយត្រូវតែស្វែងយល់ និងទប់ស្កាត់។ លោកបានឱ្យដឹងទៀតថា មន្ទីរអប់រំយុវជន និងកីឡារាជធានីភ្នំពេញ យល់ឃើញថាការលើកកម្ពស់ព័ត៌មាន អក្ខរកម្មព័ត៌មាន និងអក្ខរកម្មឌីជីថល ចាំបាច់សម្រាប់សិស្សានុសិស្ស ឱ្យចេះគិត ឱ្យចេះយល់ដឹងជារឿងមួយចាំបាច់មិនអាចមើលរំលងបានឡើយ។

ក្នុងឱកាសនោះ តំណាងយុវជន ដែលជាសិស្សវិទ្យាល័យសម្តេច ហ៊ុនសែន ភ្នំពេញថ្មី គឺលោក ហ៊ឺន សុខហេង បានកត់សម្គាល់ឃើញថា យុទ្ធនាការនេះ ពិតជាមានសារៈសំខាន់ខ្លាំងណាស់ ជាពិសេសក្នុងពេលដែលវិស័យព័ត៌មាន និងបច្ចេកវិទ្យាជឿនលឿន យុវជន យុវនារី មិនអាចរំលងការប្រើប្រាស់មធ្យោបាយឌីជីថលក្នុងការចែកចាយព័ត៌មាន និងការសិក្សារៀនសូត្របានឡើយ។ យុវជនរូបនេះបានបន្ដទៀតថា ព័ត៌មានក្លែងក្លាយ បានជះឥទ្ធិពលអវិជ្ជមានជាច្រើនដល់យុវជន និងប្រជាជន មានដូចជា រំខាន ដល់ការសិក្សារៀនសូត្ររបស់សិស្ស ធ្វើឱ្យខាតបង់ពេលវេលា និងប្រាក់កាស ប៉ះពាល់សុខភាពផ្លូវចិត្ត និង អាចឈានដល់ការកើតជំងឺបាក់ទឹកចិត្ត ប៉ះពាល់ដល់កិត្តិយស និងសេចក្តីថ្លៃថ្នូរបស់បុគ្គល បង្កឱ្យមានការ រើសអើង និងអំពើហិង្សា ហើយអាចឈានដល់ការបែកបាក់មិត្តភាព និងសាមគ្គីភាពទៀតផង៕

ដោយ៖ មករា, រូបថត៖ឡុង ដេវីត