‎AKP បន្ទាយមានជ័យ ថ្ងៃទី២៨ ខែឧសភា ឆ្នាំ២០២៦-- យុវសិស្សនៅស្រុកព្រះនេត្រព្រះ ខេត្តបន្ទាយមានជ័យ បានទទួលនូវសមិទ្ធផលអប់រំថ្មីដ៏មានតម្លៃ តាមរយៈពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សា៧ខ្នង ស្មើនឹង២៧បន្ទប់ ដែលជាជំនួយឧបត្ថម្ភពីសមាគមនិកាយសាសនាចក្រនៃព្រះយេស៊ូគ្រឹស្ទនៃពួកបរិសុទ្ធថ្ងៃចុងក្រោយ។

ពិធីនេះប្រព្រឹត្តទៅក្រោមអធិបតីភាពរបស់ឯកឧត្តម ប្លែក វ៉ារី ប្រធានក្រុមប្រឹក្សាខេត្ត និងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ដោយមានការចូលរួមពីលោក ម៉ាក បូល័រ (Mr. Mark Bowler) និងលោកស្រី អានេត បូល័រ (Annette Bowler) តំណាងសមាគមនិកាយសាសនាចក្រនៃព្រះយេស៊ូគ្រឹស្ទ ព្រមទាំងអាជ្ញាធរមូលដ្ឋាន លោកគ្រូអ្នកគ្រូ និងសិស្សានុសិស្សយ៉ាងច្រើនកុះករ នៅសាលាបឋមសិក្សាកន្ត្រប់ ឃុំភ្នំលៀប ស្រុកព្រះនេត្រព្រះ នាព្រឹកថ្ងៃទី២៨ ខែឧសភា ឆ្នាំ២០២៦នេះ។

ថ្លែងក្នុងឱកាសនោះ ឯកឧត្តម អ៊ុ រាត្រី បានកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះសមាគមនិកាយសាសនាចក្រនៃព្រះយេស៊ូគ្រឹស្ទនៃពួកបរិសុទ្ធថ្ងៃចុងក្រោយ ដែលបានចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក្នុងការកសាងហេដ្ឋារចនាសម្ព័ន្ធអប់រំ។ ឯកឧត្តមអភិបាលខេត្តបានគូសបញ្ជាក់ថា សមិទ្ធផលនេះគឺជាកម្លាំងចលករដ៏សំខាន់ ក្នុងការធានាដល់ការសិក្សារៀនសូត្ររបស់កូនចៅប្រជាពលរដ្ឋនៅតំបន់ជនបទឱ្យមានបរិយាកាសសិក្សាដ៏ល្អប្រសើរ។

ជាមួយគ្នានោះ ឯកឧត្តម អ៊ុ រាត្រី បានក្រើនរម្លឹកយ៉ាងម៉ឺងម៉ាត់ថា ការអប់រំគឺជាគន្លឹះនៃភាពជោគជ័យ។ សូមក្មួយៗទាំងអស់ត្រូវចៀសឱ្យឆ្ងាយពីគ្រឿងញៀន និងល្បែងស៊ីសងគ្រប់ប្រភេទ ដែលជាអន្ទាក់បំផ្លាញអនាគត។ សូមប្អូនៗខិតខំប្រឹងប្រែងរៀនសូត្រឱ្យពូកែ ដើម្បីក្លាយជាទំពាំងស្នងឫស្សីដ៏មានសមត្ថភាព សម្រាប់កសាងអនាគតដ៏ភ្លឺស្វាងសម្រាប់ខ្លួនឯង ក្រុមគ្រួសារ និងប្រទេសជាតិ។

ជាការឆ្លើយតប លោក ម៉ាក បូល័រ (Mr. Mark Bowler) បានបង្ហាញពីក្តីរីករាយដែលសមាគមបានចូលរួមចំណែកក្នុងការកែលម្អគុណភាពជីវិត និងការសិក្សារបស់កុមារកម្ពុជា។ លោកបានបញ្ជាក់ថា ការកសាងអគារសិក្សានេះ គឺជាបំណងប្រាថ្នារបស់សមាគមក្នុងការជួយលើកកម្ពស់វិស័យអប់រំ និងផ្តល់ឱកាសឱ្យសិស្សានុសិស្សទទួលបានការសិក្សាក្នុងលក្ខខណ្ឌសមរម្យ។

សូមបញ្ជាក់ថាការសម្ពោធដាក់ឱ្យប្រើប្រាស់អគារសិក្សាទាំង ២៧ បន្ទប់នេះ មិនត្រឹមតែជាការផ្តល់នូវទីកន្លែងសិក្សាដ៏រឹងមាំប៉ុណ្ណោះទេ ប៉ុន្តែវាក៏ជាសក្ខីភាពនៃកិច្ចសហប្រតិបត្តិការដ៏ល្អរវាងរដ្ឋបាលខេត្ត និងអង្គការដៃគូអន្តរជាតិ ក្នុងការរួមគ្នាអភិវឌ្ឍធនធានមនុស្សនៅក្នុងខេត្តបន្ទាយមានជ័យឱ្យកាន់តែប្រសើរឡើងថែមទៀត៕

ដោយ ឈុន សារ៉ាត