AKP បន្ទាយមានជ័យ ថ្ងៃទី២៨ ខែឧសភា ឆ្នាំ២០២៦ --  រដ្ឋបាលស្រុកអូរជ្រៅ បានបើកយុទ្ធនាការទ្រង់ទ្រាយធំតាមរយៈវេទិកាផ្សព្វផ្សាយស្តីពីគោលនយោបាយ «ភូមិ ឃុំ សង្កាត់ មានសុវត្ថិភាព» ដោយផ្តោតសំខាន់លើការកសាងមូលដ្ឋានគ្រឹះនៃសន្តិសុខ និងសណ្តាប់ធ្នាប់ ដើម្បីជាកម្លាំងចលករជំរុញកំណើនសេដ្ឋកិច្ច និងការអភិវឌ្ឍនៅតាមមូលដ្ឋានឱ្យមានប្រសិទ្ធភាពខ្ពស់។

កាលពីថ្ងៃពុធ ទី២៧ ខែឧសភា ឆ្នាំ២០២៦ នៅវិទ្យាល័យយាងដង្គុំ ឃុំអូរបីជាន់ វេទិកាផ្សព្វផ្សាយនេះត្រូវបានរៀបចំឡើងក្រោមអធិបតីភាពដ៏ខ្ពង់ខ្ពស់របស់ លោក តាន់ ស្វាង ប្រធានក្រុមប្រឹក្សាស្រុក និងលោក កែវ តារារស្មី អភិបាលនៃគណៈអភិបាលស្រុកអូរជ្រៅ ដោយមានការចូលរួមពីមន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និងសិស្សានុសិស្សសរុប ២០៩នាក់។ ក្នុងឱកាសនោះ លោក កែវ តារារស្មី អភិបាលស្រុកអូរជ្រៅ បានគូសបញ្ជាក់យ៉ាងមុតមាំពីអត្ថន័យនៃគោលនយោបាយនេះថា មិនមែនគ្រាន់តែជាការងារសន្តិសុខធម្មតានោះទេ ប៉ុន្តែគឺជាការបង្កើតនូវបរិយាកាសអំណោយផលសម្រាប់ជីវភាពរស់នៅរបស់ប្រជាពលរដ្ឋ។

លោកអភិបាលស្រុកបានមានប្រសាសន៍ថា «គោលនយោបាយ ភូមិ ឃុំ សង្កាត់ មានសុវត្ថិភាព គឺជាឆ្អឹងខ្នងនៃការអភិវឌ្ឍមូលដ្ឋាន។ នៅពេលដែលភូមិឃុំរបស់យើងគ្មានគ្រឿងញៀន គ្មានល្បែងស៊ីសង គ្មានអំពើចោរកម្ម និងមានសណ្តាប់ធ្នាប់ល្អ ទើបការអភិវឌ្ឍនានាអាចដំណើរការទៅដោយរលូន ប្រជាពលរដ្ឋមានភាពកក់ក្តៅ និងមានចិត្តជឿជាក់ក្នុងការប្រកបរបរចិញ្ចឹមជីវិត»។

លោក កែវ តារារស្មី បានបន្តអំពាវនាវយ៉ាងទទូចដល់គ្រប់ភាគីពាក់ព័ន្ធ ចាប់ពីអាជ្ញាធរមូលដ្ឋាន កងកម្លាំងមានសមត្ថកិច្ច រហូតដល់ប្រជាពលរដ្ឋ និងសិស្សានុសិស្ស ត្រូវចាត់ទុកគោលនយោបាយនេះជា «ភារកិច្ចរួម»។ លោកបានសង្កត់ធ្ងន់លើចំណុចសំខាន់ៗមួយចំនួន ដែលសិស្សានុសិស្សត្រូវក្លាយជាទូតសុច្ឆន្ទៈក្នុងការជៀសឱ្យឆ្ងាយពីគ្រឿងញៀន និងការជួបជុំដែលបង្កអសន្តិសុខ។ កងកម្លាំង និងអាជ្ញាធរភូមិ-ឃុំ ត្រូវយកចិត្តទុកដាក់ខ្ពស់ក្នុងការដោះស្រាយបញ្ហាជូនប្រជាពលរដ្ឋឱ្យបានទាន់ពេលវេលា។ ប្រជាពលរដ្ឋត្រូវចូលរួមសហការផ្តល់ព័ត៌មានដល់អាជ្ញាធរនៅពេលជួបប្រទះភាពមិនប្រក្រតីនានា។

វេទិកានេះមិនត្រឹមតែជាការផ្សព្វផ្សាយច្បាប់នោះទេ ប៉ុន្តែជាការបើកឱកាសឱ្យមានការសន្ទនាដោយផ្ទាល់រវាងអាជ្ញាធរ និងប្រជាពលរដ្ឋ ដែលនេះ គឺជាយន្តការដ៏សំខាន់ក្នុងការកសាងទំនុកចិត្ត និងពង្រឹងទំនាក់ទំនងរដ្ឋបាល-ពលរដ្ឋឱ្យកាន់តែជិតស្និទ្ធ។ ការប្តេជ្ញាចិត្តរបស់រដ្ឋបាលស្រុកអូរជ្រៅនាពេលនេះ ត្រូវបានគេរំពឹងថានឹងក្លាយជាកម្លាំងរុញច្រានមួយ ដើម្បីធ្វើឱ្យភូមិសាស្ត្រក្នុងស្រុកកាន់តែមានសន្តិសុខ សុវត្ថិភាព និងភាពរីកចម្រើនប្រកបដោយចីរភាព៕

ដោយ៖ ឈុន សារ៉ាត