AKP ភ្នំពេញ ថ្ងៃទី២៧ ខែឧសភា ឆ្នាំ២០២៦ -- តំណាងក្រុមហ៊ុនកូរ៉េចំនួន៥ គ្រោងបំពេញទស្សនកិច្ចនៅកម្ពុជា នាពេលខាងមុខនេះ ដើម្បីស្វែងរកឱកាសវិនិយោគនៅកម្ពុជា ។

ក្នុងជំនួបពិភាក្សាការងាររវាងឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ លោក Lee Mooncheol នាយកប្រតិបត្តិក្រុមហ៊ុន Aerobi Co., Ltd និងលោក Song Young-Ho គ្រូបង្វឹកកីឡាវាយសី នៅស្ថានទូតកម្ពុជា ក្នុងទីក្រុងសេអ៊ូល ក្រោមការសម្របសម្រួលរបស់លោក Kim Yun Tae នាយកសារមន្ទីរពហុវប្បធម៌កូរ៉េ កាលពីថ្ងៃទី២៦ ខែឧសភា ឆ្នាំ២០២៦ លោក Kim បានសម្តែងសេចក្តីសោមន្សរីករាយដែលមានឱកា សអញ្ជើញមកស្ថានទូតសាជាថ្មី ។ 

លោក Kim ក៏បានជម្រាបពីវឌ្ឍនភាពនៃការងារសហការ ក្នុងការស្វែងរកអ្នកវិនិយោគកូរ៉េ ដើម្បីទៅសិក្សាពីឱកាសវិនិយោគក្នុងប្រទេសកម្ពុជា ដែលជាលទ្ធផលលោកមានគម្រោងដឹកនាំក្រុមហ៊ុនចំនួន៥ ទៅកាន់ប្រទេសកម្ពុជាជាជំហានដំបូង នៅខែមិថុនា ឆ្នាំ២០២៦ ខាងមុខ ។ ក្នុងអំឡុងពេលទស្សនកិច្ចរបស់ក្រុមអ្នកវិនិយោគកូរ៉េនៅកម្ពុជាខាងមុខ លោក Kim ក៏បានសំណូមពរឲ្យស្ថានទូតជួយសម្របសម្រួលជំនួបជាមួយក្រសួង-ស្ថាប័ន និងក្រុមហ៊ុនជំនាញពាក់ព័ន្ធ ដើម្បីពិភាក្សាអំពីកិច្ចសហប្រតិបត្តិការ និងសិក្សាបន្ថែមពីឱកាសវិនិយោគជាមួយគ្នានាពេលអនាគត។

ជាកិច្ចឆ្លើយតប ឯកអគ្គរាជទូតកម្ពុជានៅកូរ៉េ បានថ្លែងអំណរគុណ លោក Kim ដែលតែងតែសហការ សម្រប សម្រួលការងារ និងណែនាំក្រុមហ៊ុនមួយចំនួនដើម្បីស្វែងយល់បន្ថែមពីឱកាសវិនិយោគក្នុងប្រទេសកម្ពុជានាពេលកន្លងមក ។ 

ឯកអគ្គរាជទូតបានជម្រាបជូនភាគីក្រុមហ៊ុនកូរ៉េថា ស្ថានទូតនឹងជួយសម្របសម្រួលដំណើរទស្សនកិច្ចទៅកាន់ប្រទេសកម្ពុជា និងសំណើសុំជួបជាមួយភាគីពាក់ព័ន្ធកម្ពុជា និងបន្តគាំទ្រក្រុមហ៊ុនឱ្យទទួលបានផ្លែផ្កាក្នុងដំណើរទស្សនកិច្ចការងារនាពេលឆាប់ៗខាងមុខ៕

ដោយ៖ ប៊ុនរិទ្ធ