AKP ភ្នំពេញ ថ្ងៃទី២៦ ខែឧសភា ឆ្នាំ២០២៦–លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិកាជាតិប្រយុទ្ធប្រឆាំងអំពើជួញដូរមនុស្សមានប្រសាសន៍ថា ពិភពលោកបច្ចុប្បន្នបទល្មើសឧក្រិដ្ឋកាន់តែធ្ងន់ធ្ងរ កាន់តែសាហាវ កាន់តែស្មុគស្មាញ កាន់តែសកម្ម និងរីកសាយភាយយ៉ាងឆាប់រហ័ស ហើយការរំលោភបំពាន អំពើហិង្សា ការកេងប្រវ័ញ្ច ការជួញដូរមនុស្ស គឺជាឱកាសរបស់ពួកឧក្រិដ្ឋជន។

ការលើកឡើងរបស់លោកជំទាវ ជូ ប៊ុនអេង យ៉ាងដូច្នេះ ក្នុងពិធីបើកសិក្ខាសាលាស្តីពីវិធានការបង្ការទប់ស្កាត់អំពើជួញមនុស្សគ្រប់ទម្រង់ និងទេសន្តរប្រវេសន៍សម្រាប់អ្នកសារព័ត៌មាន និងអ្នកពាក់ព័ន្ធ នៅទីស្តីការក្រសួងព័ត៌មាន ព្រឹកថ្ងៃទី២៦ ខែឧសភា ឆ្នាំ២០២៦ ក្រោមវត្តមានចូលរួមរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន។

លោកជំទាវរដ្ឋលេខាធិការបានគូសបញ្ជាក់ថា សារជាតិរបស់ឧក្រិដ្ឋជនគឺការប្រព្រឹត្តបទឧក្រិដ្ឋដោយមិនលើកលែង ខណៈដែលព្រះរាជាណាចក្រកម្ពុជាប្រឈមនឹងការដោះស្រាយបញ្ហាមួយចំនួនក្នុងពេលតែមួយ រួមមាន ការឆបោកតាមប្រព័ន្ធអនឡាញជាដើម ដែលបញ្ហានៃការឆបោកតាមប្រព័ន្ធអនឡាញនេះបើតាមលោកជំទាវ ជូ ប៊ុនអេង ថាស្ទើរតែគ្រប់ប្រទេសគេបានចង្អុលមករកកម្ពុជា ជាពិសេសគឺប្រទេសនៅក្នុងតំបន់តែម្តង ដែលប្រទេសនីមួយៗគេព្យាយាមយកឧត្តមភាពថាប្រទេសរបស់គេស្អាតស្អំ ហើយថាកម្ពុជាគឺជាប្រភពនៃឧក្រិដ្ឋកម្ម ក៏ប៉ុន្តែបើយើងក្រឡេកមើលទៅឧក្រិដ្ឋកម្មនេះគឺមិនបានបង្កឡើងដោយជនជាតិកម្ពុជានោះទេ ព្រោះតាំងពីដើមឡើយដែលយើងបានស្រាវជ្រាវរកឃើញកាលពីឆ្នាំ២០២២បន្ទាប់ពីការផ្សាយរបស់កាសែតអាល់ចាហ្ស៊ីរ៉ា ដែលបានផ្សព្វផ្សាយថាកម្ពុជាមានឧក្រិដ្ឋកម្មឆបោកតាមប្រព័ន្ធអនឡាញតាំងតែពីយើងមិនទាន់ស្គាល់ថាការឆបោកតាមប្រព័ន្ធអនឡាញនេះមានរូប ភាពយ៉ាងដូចម្តេចផង ដែលនៅពេលនោះលោកជំទាវក៏ជាអ្នកប្រកែកគេយ៉ាងខ្លាំងចំពោះបញ្ហានេះម្នាក់ដែរ រហូតដល់គេបានដាក់លោកជំទាវទៅក្នុងបញ្ជីខ្មៅទៅហើយ ដោយចោទប្រកាន់លោកជំទាវថាគឺជាអ្នកការពារពួកឧក្រិដ្ឋជនឆបោកតាមប្រព័ន្ធអនឡាញ ខណៈដែលលោកជំទាវពុំបានដឹង ពុំបានយល់ពីការឆបោកនេះពិតប្រាកដមែនកាលពីពេលនោះ ដោយមើលឃើញត្រឹមតែការឆបោកថាដាក់ប្រាក់វិនិយោគទៅទទួលបានការប្រាក់មកវិញខ្ពស់ តែត្រង់គេថាអំពើឆបោកនេះវាពាក់ព័ន្ធរហូតដល់ទៅអាយុជីវិតមនុស្ស ឬបំផ្លាញដល់សេដ្ឋកិច្ចក្នុងតម្លៃរាប់រយ រាប់ពាន់លានដុល្លារ គឺយើងអត់បានដឹង អត់បានយល់ទេ តែឥឡូវយើងបានយល់ពីរឿងនេះយ៉ាងច្បាស់ ដែលវាមិនមែនជារឿងធម្មតាទេ គេយកទឹកដីកម្ពុជាធ្វើជាកន្លែងប្រព្រឹត្តបទល្មើស ដោយសារតែពីមុនយើងពុំទាន់បានយល់ បានដឹងរឿងនេះនៅឡើយធ្វើឱ្យប្រទេសនីមួយៗឆ្លើយដាក់កម្ពុជា ខណៈដែលពួកគេកំពុងស្ថិតក្នុងស្ថានភាពប្រកួតប្រជែងផ្នែកសេដ្ឋកិច្ច ដែលពួកគេព្យាយាមលើកកម្ពស់ប្រទេសរបស់ពួកគេ ហើយឆ្លៀតបង្អាប់យើងដើម្បីកុំឱ្យយើងរីកចម្រើនលឿនពេក៕

ដោយ៖ ចាន់ សុភឿន