AKPកំពង់ធំថ្ងៃទី២៦ខែឧសភាឆ្នាំ២០២៦--លោកសាយ គឹមឡមអភិបាលស្រុកស្ទោងបានលើកឡើងថាសំណង់ហេដ្ឋារចនាសម្ព័ន្ធ សមិទ្ធផលច្រើនស្អេកស្កះក្នុងវត្ត គឺជាការរួបរួមសាមគ្គីនិងលះបង់ខ្ពស់របស់ប្រជាពុទ្ធបរិស័ទចំណុះជើងវត្តក្នុងពិធីសម្ពោធកាត់ខ្សែបូរដាក់ឱ្យប្រើប្រាស់សមិទ្ធផលនានានៅក្នុងវត្តទួលព្រះស្រី ស្ថិតនៅក្នុងឃុំសំព្រោជ ស្រុកស្ទោង ខេត្តកំពង់ធំនាព្រឹកថ្ងៃទី២៦ ខែឧសភា ឆ្នាំ២០២៦ ។

ទន្ទឹមនឹងនេះលោកអភិបាលស្រុកបានអំពាវនាវដល់ពុទ្ធបរិស័ទចំណុះជើងវត្តជិតឆ្ងាយត្រូវបន្តវប្បធម៌ដ៏ល្អផូរផង់នេះដើម្បីឱ្យវត្តអារាម កាន់តែរីកចម្រើនជាពិសេសតម្កល់ព្រះពុទ្ធសាសនាឱ្យបានរុងរឿងគ្រប់៥០០០ព្រះវស្សាតាមពុទ្ធានុញ្ញាត ហើយត្រូវធ្វើការអភិវឌ្ឍវត្តអារាមតាមប្លង់មេច្បាស់លាស់ជាពិសេសទៀតជាទីអារាមដែលខៀវស្រស់បំព្រងដោយធម្មជាតិរុក្ខជាតិសួនច្បារចម្រុះពណ៌និងជាទីមនោរម្យរបស់ពុទ្ធបរិស័ទ។

លោកអភិបាលស្រុកក៍បានក្រើនរំលឹកដល់ព្រះគ្រូចៅអធិការ លោកអាចារ្យគណៈកម្មការវត្តគ្រប់វត្ត និងមន្ត្រីការិយាល័យជំនាញពាក់ព័ន្ធ ត្រូវពិនិត្យបានហ្មត់ចត់និងច្បាស់លាស់បំផុតក្នុងការយក បរិវេណវត្តអារាមធ្វើចេតិយជាលក្ខណៈបុគ្គលដែលបានធ្វើឱ្យប៉ះពាល់ដល់អារម្មណ៍ពុទ្ធបរិស័ទ អាចក្លាយជាទម្រង់សំណង់អាណាធិបតេយ្យថែមទៀត ហើយលោកនិងឱ្យសហការីធ្វើជំរឿនចេតិយនៅតាមបណ្ដាវត្តអារាមនានាឱ្យបានជាក់លាក់បំផុត។

ជាមួយគ្នានេះដែរលោកអភិបាលស្រុកបានលើកទឹកចិត្តដល់យុវជន សិស្សានុសិស្សត្រូវខិតខំសិក្សារៀនសូត្រឱ្យអស់ពីលទ្ធភាពដើម្បីក្លាយជាទំពាំងស្នងឬស្សីក្នុងបរិបទបច្ចេកវិទ្យាទំនើបដើម្បីជ្រោងសេដ្ឋកិច្ចជាតិឱ្យបានរឹងមាំ ជាមូលធនមនុស្សក្នុងការការពារមរណភាពទឹកដីពីសត្រូវឈ្លានពានថែមទៀតហើយឪពុកម្ដាយ អាណាព្យាបាលត្រូវជំរុញនិងលើកទឹកចិត្តការសិក្សានេះឱ្យបានទូលំទូលាយ បន្តតាមដានការសិក្សារៀនសូត្ររបស់កូនចៅ ឱ្យក្លាយជាមនុស្សប្រកបដោយសីលធម៌ គុណធម៌ ចាកផុតពីអបាយមុខនិងក្មេងទំនើង។

លោក សាយ គឹមឡម អភិបាលស្រុកស្ទោងបានអំពាវនាវដល់ប្រជាពលរដ្ឋក្នុងមូលដ្ឋានជាពិសេសសិស្សានុសិស្សនិងយុវជនត្រូវ បន្តធ្វើពហិការទំនិញឬផលិតផលរបស់ប្រទេសសៀម និងលើកកម្ពស់ ផលិតផលក្នុងស្រុក ផលិតផលនៅក្នុងមូលដ្ឋានដើម្បីចូលរួមចំណែកយ៉ាងធំធេង ក្នុងការលើកកម្ពស់សេដ្ឋកិច្ចមូលដ្ឋាន សេដ្ឋកិច្ចជាតិទាំងមូលថែមទៀត។
សូមបញ្ជាក់ថាក្នុងឱកាសនេះលោកអភិបាលស្រុកស្ទោង ព្រមទាំងសហការីនិងព្រះមន្ត្រីសង្ឃ សាលាអនុគណស្រុកបានចូលរួមបុណ្យនូវបច្ច័យចំនួន២លាន១២ម៉ឺនរៀលនិង១០ដុល្លារអាមេរិក៕

ដោយ៖ ស៊ុម វណ្ណា