AKP ភ្នំពេញ ថ្ងៃទី២៦ ខែឧសភា ឆ្នាំ២០២៦ -- ប៉ាគីស្ថានមានទំនុកចិត្តថាសហរដ្ឋអាមេរិក និងអ៊ីរ៉ង់អាចចុះហត្ថលេខាលើកិច្ចព្រមព្រៀងបណ្ដោះអាសន្នមួយ ដើម្បីបញ្ចប់ជម្លោះនៅក្នុងសប្តាហ៍នេះ។ នេះបើយោងតាមប្រភពព័ត៌មានរដ្ឋាភិបាលប៉ាគីស្ថានដែលបានដឹងពីបញ្ហានេះបានប្រាប់សារព័ត៌មានអាណាដូលូកាលពីថ្ងៃចន្ទ។

ប្រភពព័ត៌មានរដ្ឋាភិបាលប៉ាគីស្ថានមួយបាននិយាយថា «ការចុះហត្ថលេខាលើកិច្ចព្រមព្រៀងនេះ ត្រូវបានគេរំពឹងទុកនៅថ្ងៃណាមួយក្នុងសប្តាហ៍នេះ ដោយសារភាគីទាំងពីរនៅមិនទាន់យល់ស្របគ្នាលើបញ្ហាប្រតិបត្តិការតែមួយចំនួនប៉ុណ្ណោះ»។

ប្រភពព័ត៌មាននោះបានបន្ថែមថា «វាមិនមែនជាប្រភេទនៃការជាប់គាំងនោះទេ» ដោយបាននិយាយថា ភាគីទាំងពីរបានព្រមព្រៀងជាគោលការណ៍ហើយទៅលើសេចក្តីព្រាងកិច្ចព្រមព្រៀង «តែមួយទំព័រ» ខណៈដែលនៅតែបន្តកិច្ចពិភាក្សាទៅលើបញ្ហាប្រតិបត្តិការទាក់ទងនឹងការបើកច្រកសមុទ្រហ័រមុសឡើងវិញ និងការបញ្ចប់ការបិទផ្លូវកងទ័ពជើងទឹកអាម៉េរិកដែលកំណត់គោលដៅកំពង់ផែអ៊ីរ៉ង់។

យោងតាមប្រភពព័ត៌មាន បានឱ្យដឹងថា ភាពខុសគ្នាដែលនៅសល់ទាក់ទងនឹងការអនុវត្តជាជាងគោលការណ៍នយោបាយទូលំទូលាយ។

ប្រភពព័ត៌មានមួយបាននិយាយថា «ជម្លោះសំខាន់នៅពេលនេះ គឺវត្តមានយោធារបស់កងកម្លាំងអាម៉េរិកនៅជិតដែនទឹកអ៊ីរ៉ង់ សូម្បីតែបន្ទាប់ពីបញ្ចប់ការបិទផ្លូវក៏ដោយ»។

ប្រភពព័ត៌មាននោះបានបន្ថែមថា ទីក្រុងវ៉ាស៊ីនតោនចង់រក្សាវត្តមានយោធានៅក្នុងតំបន់ ខណៈដែលទីក្រុងតេអេរ៉ង់ចង់បានសេណារីយ៉ូមុនសង្គ្រាម។

ប្រភពព័ត៌មានបាននិយាយថា ប៉ាគីស្ថានរួមជាមួយអ្នកសម្របសម្រួលក្នុងតំបន់ កំពុងស្វែងរករូបមន្តសម្របសម្រួលដើម្បីភ្ជាប់ភាពខុសគ្នាដែលនៅសេសសល់៕

ដោយ៖ យា ចិន្ដាខន្ដី (ប្រភព៖ AA-AKP)