AKP ភ្នំពេញ ថ្ងៃទី២៦ ខែឧសភា ឆ្នាំ២០២៦ -- ប្រព័ន្ធផ្សព្វផ្សាយអ៊ីរ៉ង់បាននិយាយកាលពីថ្ងៃចន្ទថា គណៈប្រតិភូជាន់ខ្ពស់អ៊ីរ៉ង់មួយក្រុម ដែលដឹកនាំដោយប្រធានសភាអ៊ីរ៉ង់ លោក ម៉ូហាំម៉ាដ បាកកឺ កាលីបាហ្វ (Mohammad Bagher Qalibaf) រួមទាំងរដ្ឋមន្ត្រីការបរទេសអ៊ីរ៉ង់ លោក អាបាស់ អារ៉ាកឈី (Abbas Araghchi) បានទៅដល់រដ្ឋធានីដូហារបស់ប្រទេសកាតា។

ទីភ្នាក់ងារសារព័ត៌មានរដ្ឋ IRNA បានរាយការណ៍ថា ដំណើរទស្សនកិច្ចនេះ គឺជាផ្នែកមួយនៃកិច្ចខិតខំប្រឹងប្រែងផ្នែកការទូតដឹកនាំដោយប៉ាគីស្ថាន ដើម្បីបញ្ចប់ជម្លោះដែលកំពុងបន្តរវាងទីក្រុងតេអេរ៉ង់ និងទីក្រុងវ៉ាស៊ីនតោន។

ទីភ្នាក់ងារសារព័ត៌មានរដ្ឋ IRNA បាននិយាយថា កិច្ចពិគ្រោះយោបល់នឹងត្រូវបានធ្វើឡើងជាមួយមន្ត្រីជាន់ខ្ពស់កាតាទៅលើទិដ្ឋភាពទាក់ទងនឹងកិច្ចចរចាដើម្បីបញ្ចប់ជម្លោះ។

ភាពតានតឹងក្នុងតំបន់បានកើនឡើងចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារប្រឆាំងនឹងអ៊ីរ៉ង់កាលពីខែកុម្ភៈ។ ទីក្រុងតេអេរ៉ង់បានសងសឹកវិញដោយការវាយប្រហារដែលកំណត់គោលដៅទៅលើអ៊ីស្រាអែល ក៏ដូចជាសម្ព័ន្ធមិត្តរបស់សហរដ្ឋអាមេរិកនៅឈូងសមុទ្រ រួមជាមួយនឹងការបិទច្រកសមុទ្រហ័រមុស។

បទឈប់បាញ់បានចូលជាធរមាននៅថ្ងៃទី០៨ ខែមេសា តាមរយៈការសម្របសម្រួលរបស់ប៉ាគីស្ថាន ហើយក្រោយមកត្រូវបានពង្រីកដោយប្រធានាធិបតីអាម៉េរិកលោក ដូណាល់ ត្រាំ (Donald Trump) ដោយគ្មានពេលកំណត់៕

ដោយ៖ យា ចិន្ដាខន្ដី (ប្រភព៖ AA-AKP)