AKP ឧត្តរមានជ័យ ថ្ងៃទី២៦ ខែឧសភា ឆ្នាំ២០២៦--លោក អ៊ុន សុភ័ក្រ អភិបាលរងនៃគណៈអភិបាលខេត្តឧត្តរមានជ័យ នៅថ្ងៃចន្ទទី២៥ ខែឧសភា ឆ្នាំ២០២៦បានដឹកនាំកិច្ចប្រជុំត្រួតពិនិត្យវឌ្ឍនភាពការងារ លើការកែសម្រួលតាមអនុសាសន៍ក្នុងរបាយការណ៍អាជ្ញាធរសវនកម្មជាតិ សម្រាប់ការិយបរិច្ឆេទ២០២៥ និងឆ្នាំពាក់ព័ន្ធ សម្រាប់កម្រិតរដ្ឋបាលក្រុង ស្រុក និងមន្ទីរ អង្គភាពជុំវិញខេត្ត។

លោក អ៊ុន សុភ័ក្រ បានថ្លែងថា ការអនុវត្តន៍ការងារប្រកបដោយតម្លាភាព គណនេយ្យភាព និងការគោរពតាមអនុសាសន៍របស់អាជ្ញាធរសវនកម្មជាតិ គឺជាកាតព្វកិច្ចដ៏សំខាន់របស់រដ្ឋបាលថ្នាក់ក្រោមជាតិ ដើម្បីធានាបាននូវប្រសិទ្ធភាពក្នុងការគ្រប់គ្រងទ្រព្យសម្បត្តិរដ្ឋ ។ហេតុនេះរដ្ឋបាលក្រុង ស្រុក ត្រូវសហការជាបន្ទាន់ជាមួយការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុក ចុះធ្វើការស្រង់ទិន្នន័យជាក់ស្តែងចំពោះករណីដែលបានរកឃើញដោយសវនករជាតិ។ នេះគឺជាការឆ្លើយតប និងដោះស្រាយឱ្យបានទាន់ពេលវេលានូវរាល់របកគំហើញរបស់លេខាធិការដ្ឋានសវនកម្មជាតិ សំដៅធានាបាននូវភាពត្រឹមត្រូវ ច្បាស់លាស់ និងការគ្រប់គ្រងរបស់រដ្ឋបាលក្រុង ស្រុក ប្រកបដោយប្រសិទ្ធភាពខ្ពស់។ រដ្ឋបាលក្រុង ស្រុក ត្រូវចាត់កម្លាំងជំនាញចុះអនុវត្តការងារនេះឱ្យបានឆាប់រហ័សបំផុត ស្របតាមស្មារតីនៃអង្គប្រជុំ និងនីតិវិធីច្បាប់ជាធរមាន ៕ 

ដោយ ទិត ស្រ៊