AKP ឧត្តរមានជ័យ ថ្ងៃទី២៦ ខែឧសភា ឆ្នាំ២០២៦--ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ នៅថ្ងៃទី២៥ ខែឧសភា ឆ្នាំ២០២៦បានអញ្ជើញចូលរួមជាវាគ្មិនកិត្តិយសក្នុងកម្មវិធីធ្វើបាឋកថា ចែករំលែកបទពិសោធន៍ ពាក់ព័ន្ធការដឹកនាំ និងការគ្រប់គ្រងការអនុវត្តន៍គោលនយោបាយ ភូមិ ឃុំ សង្កាត់ មានសុវត្ថិភាព ដល់សិស្សនគរបាលចំនួន១៦៨នាក់ ដែលកំពុងសិក្សាបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី២០ លើកទី១ នៅសាលានគរបាលជាតិភូមិភាគ៤ ខេត្តសៀមរាប។

ឯកឧត្តម មាន ចាន់យ៉ាដា បានថ្លែងថា ការអនុវត្តន៍គោលនយោបាយ ភូមិ ឃុំ សង្កាត់ មានសុវត្ថិភាព ទាមទារឱ្យមានការចូលរួម សហការ និងការទទួលខុសត្រូវខ្ពស់ពីគ្រប់ភាគីពាក់ព័ន្ធ ជាពិសេសកងកម្លាំងនគរបាលជាតិ ដែលជាកម្លាំងស្នូលក្នុងការថែរក្សាសន្តិសុខ សណ្តាប់ធ្នាប់សង្គម និងជាបង្អែកដ៏រឹងមាំរបស់ប្រជាពលរដ្ឋ។

ឯកឧត្តមបានលើកឡើងបន្ថែមថា មន្ត្រីនគរបាលមានតួនាទីយ៉ាងសំខាន់ ក្នុងការតាមដានសភាពការណ៍នៅមូលដ្ឋាន សហការជាមួយអាជ្ញាធរពាក់ព័ន្ធ និងកសាងទំនុកចិត្តជាមួយប្រជាពលរដ្ឋ ដើម្បីរួមគ្នាបង្ការ និងបង្ក្រាបបទល្មើសនានា ដូចជា បញ្ហាគ្រឿងញៀន ល្បែងស៊ីសង និងអំពើចោរកម្មផ្សេងៗទៀត ។

ឯកឧត្តមអភិបាលខេត្ត ក៏បានផ្តល់ការលើកទឹកចិត្តដល់សិក្ខាកាមទាំងអស់ ឱ្យខិតខំប្រឹងប្រែងសិក្សារៀនសូត្រ ទាំងផ្នែកទ្រឹស្តី ជំនាញវិជ្ជាជីវៈ និងវិន័យការងារ ដើម្បីក្លាយជាមន្ត្រីនគរបាលជាតិដែលមានសមត្ថភាព គុណធម៌ និងទទួលបានការជឿទុកចិត្តពីប្រជាពលរដ្ឋ ពេលចេញទៅបំពេញភារកិច្ចការពារសន្តិសុខ សណ្តាប់ធ្នាប់សង្គម ប្រកបដោយប្រសិទ្ធភាពខ្ពស់ ៕ 

ដោយ ទិត ស្រ៊