AKP កំពង់ឆ្នាំង ថ្ងៃទី២៦ ខែឧសភា ឆ្នាំ២០២៦--ឯកឧត្តម ស៊ុន សុវណ្ណារិទ្ធិ អភិបាលខេត្ដកំពង់ឆ្នាំងបានបើកកិច្ចប្រជុំ និងសំណេះសំណាលជាមួយក្រុមប្រឹក្សាក្រុង ស្រុក ឃុំ សង្កាត់ គណៈកម្មាធិការប្រតិបត្តិ និងថ្នាក់ដឹកនាំមន្ទីរអង្គភាពជុំវិញខេត្តផងដែរ ។ពិធីនេះធ្វើនៅសាលប្រជុំសាលាខេត្តកំពង់ឆ្នាំងកាលពីថ្ងៃទី២៥ ខែឧសភា ឆ្នាំ២០២៦ ដោយមានការអញ្ជើញចូលរួមពី អភិបាលរងខេត្ត លោក លោកស្រី ថ្នាក់ដឹកនាំមន្ទីរស្ថាប័នពាក់ព័ន្ធ នាយករដ្ឋបាលសាលាខេត្ដ មេបញ្ជាការកងកម្លាំងទាំងបី និងលោកអភិបាលក្រុងស្រុកផងដែរ។

ក្នុងឱកាសនោះ ឯកឧត្តម ស៊ុន សុវណ្ណារិទ្ធិ បានលើកឡើងថា គោលបំណងនៃកិច្ចប្រជុំនេះ ដើម្បីពិនិត្យ ពិភាក្សា និង អនុម័តលើរបាយការណ៍វឌ្ឍនភាពសង្ខេបរបស់សមាគមគណៈកម្មាធិការប្រតិបត្តិក្រុមប្រឹក្សា ក្រុង ស្រុក ឃុំ សង្កាត់ និងបទបង្ហាញលើការបង្កើតឱ្យមានអង្គការមួយ ដែលតំណាង និងការពារផលប្រយោជន៍រួម របស់ក្រុមប្រឹក្សាក្រុង ស្រុក ឃុំ សង្កាត់ នៅក្នុងខេត្ត ដើម្បីលើកកម្ពស់គុណភាពជីវភាពរស់នៅ និងសុខុមាលភាពរបស់ប្រជាពលរដ្ឋ តាមរយៈអភិបាលកិច្ចតាមបែបវិមជ្ឈការ និងវិសហមជ្ឈការ ព្រមទាំងអភិវឌ្ឍសមត្ថភាពបង្កើនប្រសិទ្ធភាព នៃការផ្ដល់សេវាជូនប្រជាពលរដ្ឋនៅមូលដ្ឋាន ។

ទន្ទឹមនឹងនេះ ឯកឧត្ដមបានបន្តថា ក្រោមការដឹកនាំរបស់រាជរដ្ឋាភិបាលដែលមានសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានផ្តល់អនុសាសន៍ឲ្យមានការចុះជួបប្រាស្រ័យឱ្យកាន់តែជិតជាប្រចាំជាមួយប្រជាពលរដ្ឋនៅតាមមូលដ្ឋាន ដើម្បីស្វែងយល់ពីសុខទុក្ខ និងស្តាប់មតិយោបល់ សំណូមពរ បញ្ហាប្រឈមទាំងឡាយ ក៏ដូចជាចូលរួមជួយពង្រឹងការអនុវត្តន៍តួនាទីរបស់ក្រុមប្រឹក្សាឃុំ-សង្កាត់ ការផ្តល់សេវាសាធារណៈ ការងារអភិវឌ្ឍន៍មូលដ្ឋានប្រកបដោយប្រសិទ្ធភាពខ្ពស់ សម្រាប់ជាប្រយោជន៍ដល់ប្រជាជនទាំងអស់ ដោយមិនមានការប្រកាន់និន្នាការនយោបាយឡើយ។

នៅក្នុងឱកាសនោះដែរ ឯកឧត្តមអភិបាលខេត្តក៏បានជម្រុញដល់មន្ត្រីពាក់ព័ន្ធឱ្យខិតខំប្រឹងប្រែងក្នុងការអនុវត្តន៍ភារកិច្ចឱ្យបានត្រឹមត្រូវ និងសម្រេចបានលទ្ធផលយ៉ាងល្អប្រសើរជាបន្តបន្ទាប់ ចំពោះសមាគមប្រត្តិបត្តិក្រុមប្រឹក្សាក្រុង ស្រុក ឃុំ សង្កាត់ គឺជាមធ្យោបាយដ៏សំខាន់មួយសម្រាប់រដ្ឋបាលថ្នាក់ក្រោមជាតិ បានរួមគា្នបញ្ចេញសំឡេង បានពិភាក្សាជាមួយក្រសួង ស្ថាប័ន របស់រាជរដ្ឋាភិបាល ការអនុវត្តន៍គោលនយោបាយ រៀបចំការងារផ្នែកសន្តិសុខ និងសណ្តាប់ធ្នាប់ក្នុងពិធីជួបជាមួយក្រុមប្រឹក្សានៅក្នុងមូលដ្ឋានរបស់ខ្លួននឹងការអភិវឌ្ឍន៍៕ 

ដោយ បៃ ស៊ីថុន