AKP ភ្នំពេញ ថ្ងៃទី២៦ ខែឧសភា ឆ្នាំ២០២៦--ឯកឧត្ដម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានគូសបញ្ជាក់ថា ក្នុងរយៈពេល៤ ខែ ឆ្នាំ២០២៦នេះ ការនាំចេញទំនិញរបស់កម្ពុជា មានតម្លៃប្រមាណ២៣ពាន់លានដុល្លារ ដែលនេះជាសញ្ញាមួយបង្ហាញថា សេដ្ឋកិច្ចកម្ពុជាមានការរីកចម្រើន។ ការគូសបញ្ជាក់របស់ឯកឧត្ដមបែបនេះ ក្នុងវេទិកាពិភាក្សាស្ដីពី “សេដ្ឋកិច្ចកម្ពុជា ឆ្នាំ២០២៦” ដែលរៀបចំដោយសមាគមអ្នកសារព័ត៌មានកម្ពុជា-ចិន នារសៀលថ្ងៃទី២៥ ខែឧសភា ឆ្នាំ២០២៦ នៅរាជធានីភ្នំពេញ។

ឯកឧត្ដម ប៉ែន សុវិជាតិ បានថ្លែងបញ្ជាក់ថា យោងតាមការព្យាករណ៍របស់ធនាគារអភិវឌ្ឍន៍អាស៊ី(ADB) និងធនាគារពិភពលោក(WB) បានឱ្យដឹងថា ក្នុងឆ្នាំ២០២៦នេះ សេដ្ឋកិច្ចកម្ពុជា នឹងមានកំណើនក្នុងអត្រា ៤,៥ ភាគរយ ហើយការព្យាករណ៍នេះ អាចនឹងមានកំណើន ដោយសារតែការនាំចេញរបស់កម្ពុជាមានការកើនឡើង ដូចជាការនាំចេញសម្លៀកបំពាក់ និងស្បែកជើង ការនាំចេញកាបូបធ្វើដំណើរ គ្រឿងបរិក្ខារមួយចំនួន និងទំនិញថ្មីមួយចំនួនដូចជា សំបកកង់រថយន្ដ គ្រឿងសង្ហារឹម គ្រឿងអគ្គិសនី ។ល។ ដែលបានចូលរួមក្នុងកំណើននេះ។

ឯកឧត្ដមរដ្ឋលេខាធិការបានបញ្ជាក់ផងដែរថា៖ «តាមរយៈការកើនឡើងនៃការនាំចេញនេះ ក្រសួងពាណិជ្ជកម្ម បានខិតខំប្រឹងប្រែងពង្រីកទីផ្សារថ្មីៗ ហើយកម្ពុជានៅតែចាត់ទុកថា ចិនជាដៃគូដ៏រឹងមាំ និងមានទីផ្សារធំ ដែលការនាំចេញកសិផលទៅប្រទេសចិន និងការនាំចេញទៅប្រទេសផ្សេងទៀតនៅលើសកលលោក នៅតែមានជំហររឹងមាំដោយសារតែទីផ្សារនៅតែត្រូវការទំនិញរបស់កម្ពុជា»។

ជាមួយគ្នានេះដែរ លោកជំទាវ ហ៊ុន ដានី រដ្ឋលេខាធិការ និងជាអ្នកនាំពាក្យក្រសួងទេសចរណ៍បានលើកឡើងថា នៅក្នុងឆ្នាំ២០២៥ កន្លងទៅនេះ កម្ពុជា ទទួលបានភ្ញៀវទេសចរអន្ដរជាតិប្រមាណ ៥,៦លាននាក់ ហើយទទួលបានចំណូលចាក់ចូលក្នុងសេដ្ឋកិច្ចជាតិប្រមាណ ៣ ៨៧៨ លានដុល្លារ ខណៈទេសចរជាតិប្រមាណ ២៦លាននាក់ និងផ្ដល់ឱកាសការងារដោយផ្ទាល់ដល់បងប្អូនប្រជាពលរដ្ឋកម្ពុជាជាង ៤០ម៉ឺននាក់ ដែលបានរួមចំណែកក្នុងផលិតផលក្នុងស្រុកសរុបជាង ៩ភាគរយ។ លោកជំទាវបានឱ្យដឹងដែរថា សម្រាប់ស្ថានភាពវិស័យទេសចរណ៍កម្ពុជា ក្នុងរយៈពេល៤ខែ ឆ្នាំ២០២៦នេះ ទាក់ទងនឹងភ្ញៀវទេសចរអន្ដរជាតិគឺមិនសូវមានលក្ខណៈល្អប្រសើរនោះទេ បើប្រៀបធៀបទៅនឹងរយៈពេលដូចគ្នា កាលពីឆ្នាំ២០២៥កន្លងទៅ ដោយសារតែបញ្ហាប្រឈមសេដ្ឋកិច្ចសកល និងបញ្ហាសង្គ្រាមនៅមជ្ឈិមបូព៌ា ដែលកើតឡើងរវាងសហរដ្ឋអាមេរិក អ៊ីស្រាអែល និងអីរ៉ង់។

លោកជំទាវរដ្ឋលេខាធិការបានអះអាងថា សម្រាប់ឆ្នាំ២០២៦ នេះ ក្រសួងទេសចរណ៍ បានដាក់ចេញនូវទិសដៅ និងមធ្យោបាយ ដើម្បីដោះស្រាយនូវបញ្ហាដែលបានកើតឡើង ដោយដាក់ចេញនូវគោលនយោបាយ ក្នុងការជំរុញអនុវត្ដន៍ និងសហការជាមួយគ្រប់ផ្នែក គ្រប់វិស័យ និងភាគីពាក់ព័ន្ធទាំងអស់ ផ្ដោតលើសសរស្ដម្ភក្នុងក្របខ័ណ្ឌយុទ្ធសាស្រ្ដនៃកិច្ចសហប្រតិបត្តិការចំនួន៦ ក្នុងនោះ រួមមាន ទី១ កិច្ចសហប្រតិបត្ដិការថ្នាក់ជាតិជាមួយគ្រប់ក្រសួង ស្ថាប័នទាំងអស់ ទី២ កិច្ចសហប្រតិបត្ដិការថ្នាក់ក្រោមជាតិជាមួយរដ្ឋបាលរាជធានី ខេត្ដទាំងអស់ ទី៣ កិច្ចសហប្រតិបត្ដិការជាមួយវិស័យឯកជន ទី៤ កិច្ចសហប្រតិបត្ដិការជាអន្ដរជាតិ ទី៥ កិច្ចសហប្រតិបត្ដិការជាមួយអ្នកសារព័ត៌មាន និងប្រព័ន្ធផ្សព្វផ្សាយជាតិ និងអន្ដរជាតិ និងទី៦ គឺកិច្ចសហប្រតិបត្តិការជាមួយនឹងបុគ្គលម្នាក់ៗ ដែលអាចចូលរួមជួយផ្សព្វផ្សាយពីវិស័យទេសចរណ៍របស់កម្ពុជា។

លោកជំទាវរដ្ឋលេខាធិការបានបន្ថែមថា ដើម្បីលើកកម្ពស់ និងជំរុញឱ្យវិស័យទេសចរណ៍មានការអភិវឌ្ឍរីកចម្រើននោះ ក្រសួងទេសចរណ៍ បានដាក់ចេញនូវគោលការណ៍គន្លឹះក្នុងការផ្សព្វផ្សាយក្រៅប្រទេស និងការសិក្សាទីផ្សារទេសចរណ៍, ពង្រឹងគុណភាពឧស្សាហកម្មទេសចរណ៍, ការពង្រឹងគុណភាពផលិតផលទេសចរណ៍ឱ្យសម្បូរបែប បង្កើតអ្វីដែលថ្មី និងទាក់ទាញ, ការសម្រួលការធ្វើដំណើរ និងការតភ្ជាប់ ដែលក្រសួងទេសចរណ៍កំពុងតែដាក់ចេញនូវយុទ្ធនាការ នៃការអនុវត្ដសាកល្បង ការលើកលែងទិដ្ឋាការធ្វើដំណើរដល់ពលរដ្ឋចិន ដែលកាន់លិខិតឆ្លងដែន PR ទាំងអស់ បានធ្វើដំណើរចូលមកស្នាក់នៅក្នុងប្រទេសកម្ពុជា ចាប់ផ្ដើមដំណើរការពីថ្ងៃទី១៥ ខែមិថុនា រហូតដល់ថ្ងៃទី១៥ ខែតុលា ឆ្នាំ២០២៦។ 

លោកជំទាវ ហ៊ុន ដានី រដ្ឋលេខាធិការ និងជាអ្នកនាំពាក្យក្រសួងទេសចរណ៍បានបញ្ជាក់បន្ថែមទៀតថា៖ «ចំណុចមួយទៀត ការពង្រឹង និងជំរុញទេសចរណ៍ក្នុងស្រុក និងការបង្កើតព្រឹត្ដិការណ៍ទេសចរណ៍ថ្មីៗ ដើម្បីឆ្លើយតបបញ្ហាប្រឈមពីខាងក្រៅ ហើយប្រែក្លាយបញ្ហាប្រឈមដែលកំពុងកើតឡើងឱ្យទៅជាឱកាស ក្នុងនោះ រៀបចំព្រឹត្ដិការណ៍ទស្សនាកម្ពុជាក្នុងរដូវកាលបៃតង ក្នុងការជំរុញដល់ប្រជាពលរដ្ឋ និងអ្នកទេសចរក្នុងស្រុកឱ្យដើរកម្សាន្ដ កាន់តែច្រើន រួមជាមួយការបង្កើតព្រឹត្ដិការណ៍ទេសចរណ៍កីឡា ព្រឹត្ដិការណ៍ទេសចរណ៍សិល្បៈ វប្បធម៌ និងព្រឹត្ដិការណ៍ទេសចរណ៍ផ្សេងៗ ដើម្បីឱ្យមានចរន្ដសាច់ប្រាក់ដើរនៅក្នុងស្រុក»។

ទាក់ទងនឹងស្ថានភាពសេដ្ឋកិច្ចនេះដែរ ឯកឧត្ដម សួន សុផល អគ្គលេខាធិការរង គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជាបានឱ្យដឹងថា សម្រាប់សេដ្ឋកិច្ចកម្ពុជា ក្នុងឆ្នាំ២០២៦នេះ នៅតែដំណើរការជាធម្មតា ដោយសារតែគម្រោងវិនិយោគក្នុងឆ្នាំ២០២៤ និងឆ្នាំ២០២៥ គម្រោងទាំងអស់នោះ គឺបានធ្វើសកម្មភាពផលិត និងនាំចេញ និងជាកត្ដាជំរុញឱ្យមានកំណើនកើនឡើង ដែលអ្នកវិនិយោគក្នុងស្រុក និងអ្នកវិនិយោគបរទេសកំពុងតែធ្វើសកម្មភាពផលិត និងវិនិយោគជាធម្មតា។ ឯកឧត្ដមបានបន្ដថា ក្នុងរយៈពេល៤ ខែ ឆ្នាំ២០២៦នេះ កម្ពុជា នៅតែរក្សាបានលំហូរទុនវិនិយោគក្នុងចន្លោះពី ២,៥ពាន់លានដុល្លារ ទៅ ៣ពាន់លានដុល្លារ បើទោះបីជាបច្ចុប្បន្ននេះ មានការថមថយបន្ដិចក្ដី តែបើមើលទៅលើសម្មតិកម្មក្នុងឆ្នាំ២០២៥ នៅតែមានសកម្មភាព ដែលជាកត្ដាផ្ដល់នូវទុកទុកចិត្ដសម្រាប់ការវិនិយោគក្នុងឆ្នាំ២០២៦។ ឯកឧត្ដមបានសង្កត់ធ្ងន់ថា៖ «ប្រសិនបើការវិនិយោគនៅតែមានសកម្មភាព និងដំណើរការជាប្រក្រតីនោះ យើងនៅរក្សាបាននូវកំណើន និងរួមចំណែកដល់ការនាំចេញក្នុងការជួយអភិវឌ្ឍន៍សេដ្ឋកិច្ចកម្ពុជាបន្ថែមទៀត»។ 

ក្នុងឱកាសនោះ ឯកឧត្ដមអគ្គលេខាធិការរង ក៏បានបង្ហាញនូវសុទិដ្ឋិនិយមថា សេដ្ឋកិច្ចកម្ពុជា ក្នុងឆ្នាំ២០២៦នេះ សុខភាពនៃវិនិយោគនៅកម្ពុជា នៅតែល្អ និងនៅតែរក្សាបាននូវភាពធន់ ហើយកម្ពុជា នឹងបន្ដខិតខំពង្រឹងនូវប្រសិទ្ធភាព ភាពប្រកួតប្រជែង ដើម្បីផ្ដល់នូវទំនុកដល់អ្នកវិនិយោគ ធ្វើយ៉ាងណាដើម្បីឱ្យអ្នកវិនិយោគទាំងអស់នោះ ជ្រើសរើយកប្រទេសកម្ពុជាធ្វើជាទីតាំងនៃការវិយោគរបស់ខ្លួន៕

ដោយ៖ រិទ្ធី