AKP ត្បូងឃ្មុំ ថ្ងៃទី២០ ខែឧសភា ឆ្នាំ២០២៦--រដ្ឋបាលខេត្តត្បូងឃ្មុំ នៅរសៀលថ្ងៃទី១៩ ខែឧសភា ឆ្នាំ២០២៦  បានបើកកិច្ចប្រជុំផ្សព្វផ្សាយផែនការ ស្តីពីការបន្តនិរន្តភាពយុទ្ធនាការបោសសម្អាត ការឆបោកតាមប្រពន្ធបច្ចេកវិទ្យា Online Scam ក្រោមអធិបតីភាពឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ មានការអញ្ជើញពីសំណាក់ឯកឧត្តម ឡុង ធាម ប្រធានក្រុមប្រឹក្សាខេត្ត និងឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ ព្រមទាំងមានការអញ្ជើញចូលរួមពីស្ថាប័នតុលាការ និងថ្នាក់ដឹកនាំគ្រប់ជាន់ថ្នាក់ចំណុះឱ្យរដ្ឋបាលខេត្ត កងកម្លាំងទាំង៣ ព្រមទាំងវិស័យឯកជន ដោយធ្វើឡើងនៅសាលប្រជុំសាលាខេត្តត្បូងឃ្មុំ។

ក្នុងឱកាសនោះ ឯកឧត្តម ប៉ែន កុសល្យ អភិបាលខេត្តត្បូងឃ្មុំ គូសបានបញ្ជាក់ថា ក្នុងកិច្ចប្រជុំផ្សព្វផ្សាយនាថ្ងៃនេះ គឺមិនត្រឹមតែបានផ្តល់ចំណេះដឹងបន្ថែមប៉ុណ្ណោះទេ តែមានសារៈប្រយោជន៍សម្រាប់កិច្ចការងារក្នុងការអនុវត្តបន្តបន្ទាប់ទៀតដើម្បីឈានឆ្ពោះទៅការលុបបំបាត់ជនឱកាសនិយមប្រព្រឹត្តអំពើឆបោកតាមប្រព័ន្ធបច្ចេកវិទ្យានេះផងដែរ។ ក្នុងកិច្ចការងារបង្ក្រាបការឆបោកតាមប្រព័ន្ធបច្ចេកវិទ្យា (Online Scams) ខេត្តត្បូងឃ្មុំយើង បានបើកយុទ្ធនាការបោសសម្អាតយ៉ាងស្រាក់ស្រាំ ក្នុងនោះបានធ្វើការបិទនៅទីតាំងមួយចំនួនដែលបានរកឃើញនៅការបង្កប់ការបោកតាមប្រពន្ធបច្ចេកវិទ្យានេះផងដែរ ដោយទទួលបានសេចក្តីណែនាំពីរាជរដ្ឋាភិបាលកម្ពុជា ក៏ដូចជាក្រសួងមហាផ្ទៃ។

ឯកឧត្តមអភិបាលខេត្តបានបន្ថែមថា យើងក៏បានធ្វើការចុះពិនិត្យនៅតាមផ្ទះសំណាក់ សណ្ឋាគារ ដែលមានការសង្ស័យថា អាចមានការលាក់បង្កប់នៅឧក្រិដ្ឋជន ឆបោកតាមអនឡាញ ហើយក៏បានធ្វើការឃាត់ខ្លួនជនសង្ស័យមួយ មិនមានលិខិតឆ្លងដែនស្របច្បាប់ ដែលសមត្ថកិច្ចដាក់ការសង្ស័យថាបានលួចឆ្លងដែនខុសច្បាប់ និងបន្តអនុវត្តទៅតាមនីតិវិធីច្បាប់។

ជាមួយគ្នានោះ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានកោតសរសើរ និងវាយតម្លៃខ្ពស់ ចំពោះកម្លាំងចម្រុះទាំងអស់ចំណុះឱ្យរដ្ឋបាលខេត្តត្បូងឃ្មុំទាំងមូល ដែលបានសហការគ្នាបានយ៉ាងល្អ ក្នុងការអនុវត្តចុះបង្ក្រាប និងធ្វើរដ្ឋបាលចំហ ពាក់ព័ន្ធលើកិច្ចការងារនេះ។

ឯកឧត្តមរដ្ឋលេខាធិការក៏បានធ្វើការណែនាំដល់គណៈបញ្ជាការឯកភាពខេត្ត ក៏ដូចជាអាជ្ញាធរមូលដ្ឋានត្រូវធ្វើការត្រួតពិនិត្យ តាមដានឱ្យបានហ្មត់ចត់ ដោយធ្វើយ៉ាងណាកុំឱ្យឧក្រិដ្ឋជនឆបោកតាមអនឡាញ អាចមានឱកាសក្នុងការប្រើប្រាស់ទីតាំង ឬតំបន់ណាមួយក្នុងខេត្តដើម្បីប្រព្រឹត្តបទល្មើសឆបោកតាមបច្ចេកវិទ្យាអនឡាញស្គេមនេះ ព្រោះក្រុមឧក្រិដ្ឋជនទាំងនោះគឺបង្ករគ្រោះថ្នាក់ខ្លាំងណាស់មិនថាក្នុងមូលដ្ឋាន ក្នុងសង្គមប៉ុណ្ណោះទេ ប៉ុន្តែធ្វើឱ្យបាត់បង់មុខមាត់កម្ពុជាលើឆាកអន្តរជាតិផងដែរ។

ឯកឧត្តមរដ្ឋលេខាធិការបានបន្តថា បច្ចុប្បន្នបច្ចេកវិទ្យាកាន់តែទំនើប ជាពិសេសបញ្ញាសិប្បនិម្មិត (AI) បាននឹងកំពុងវាយលុកខ្លាំងទូទាំងសកលលោក ហើយ AI នេះគឺជាអាវុធមុខពីរ ដែលអាចជួយជាប្រយោជន៍សម្រាប់មនុស្សជាតិផង និងជាមហន្តរាយរបស់មនុស្សជាតិផងដែរ។ ដូចដែលអ្វីដែលយើងបានឃើញនាពេលបច្ចុប្បន្ននេះ បញ្ហាការឆបោកតាមប្រព័ន្ធបច្ចេកវិទ្យាអនឡាញ គឺឧក្រិដ្ឋជន ភាគច្រើនប្រើប្រាស់ បញ្ញាសិប្បនិម្មិត (AI) ដើម្បីបម្លែងរូបភាព ឬវីដេអូផ្សេងៗ បង្កជាភាពចលាចលក្នុងសង្គម បោកប្រាស់លុយកាក់ប្រជាពលរដ្ឋ ក្នុងនោះបានប្រើប្រាស់ AI ជាការល្បួងលួងលោម ជាតួអង្គបញ្ចុះបញ្ចូលក្នុងន័យបោកប្រាស់តាមរបៀបស្នេហា បោកប្រាស់តាមរបៀបគំរាមកំហែង បោកប្រាស់តាមរបៀបផ្តល់ឱកាសការងារទទួលបានប្រាក់ខែខ្ពស់ បោកប្រាស់ទំនុកចិត្តផ្សេងៗ ដូចនេះដើម្បីទប់ស្កាត់បញ្ហានេះរាជរដ្ឋាភិបាលបានដាក់ចេញវិធានការក្តៅគគុកដើម្បីធ្វើយ៉ាងណាបោសសម្អាតឱ្យអស់នៅក្រុមឧក្រិដ្ឋជនឆបោកទាំងនោះ។

បើយោងតាមរបាយការណ៍របស់លោកឧត្តមសេនីយ៍ទោ ចិន នី ស្នងការនៃស្នងការដ្ឋាននគរបាលខេត្តត្បូងឃ្មុំបានបង្ហាញថា តាមបទបញ្ជាការរបស់រដ្ឋបាលខេត្តត្បូងឃ្មុំ ក្រោមការសម្របសម្រួលនីតិវិធីពីតំណាងអយ្យការអមសាលាដំបូងខេត្ត និងសហការជាមួយកម្លាំងជំនាញនៃអគ្គស្នងការដ្ឋាននគរបាលជាតិ បានបើកយុទ្ធនាការទ្រង់ទ្រាយធំ ចុះត្រួតពិនិត្យ ស្រាវជ្រាវ និងបង្ក្រាបទីតាំងសង្ស័យពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ព្រមទាំងរឹតបន្តឹងការអនុវត្តអនុក្រឹត្យលេខ ០៣ ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ។

ជាលទ្ធផលបានធ្វើប្រតិបត្តិការបង្ក្រាបចំនួន២លើក ឃាត់ខ្លួនមនុស្សសរុប៦៥៩នាក់ (ស្រី១៨៩ នាក់) ក្នុងនោះមានជនជាតិ ចិន វៀតណាម មីយ៉ានម៉ា និងជនជាតិខ្មែរមួយចំនួន។ បច្ចុប្បន្នកម្លាំងចម្រុះនៃរដ្ឋបាលខេត្តត្បូងឃ្មុំ បានបំពាក់កាមេរ៉ាសុវត្ថិភាពក្នុងទីតាំងទាំង៩កន្លែង និងស្ថិតនៅក្នុងបន្ទប់ស្ថានការណ៍ ដើម្បីរង់ចាំការតភ្ជាប់ប្រព័ន្ធ Server តាមដានភូមិសាស្ត្រទាំងនោះ២៤ម៉ោងលើ២៤ម៉ោង៕

ដោយ AKP