AKP បន្ទាយមានជ័យ ថ្ងៃទី១៩ ខែឧសភា ឆ្នាំ២០២៦-- សកម្មភាពមនុស្សធម៌ដែលស្តែងចេញពីការគិតគូរ និងមិនបោះបង់ពលរដ្ឋណាម្នាក់ចោល នៅតែបន្តសកម្មភាពយ៉ាងសកម្ម។ នាព្រឹកថ្ងៃអង្គារ ទី១៩ ខែឧសភា ឆ្នាំ២០២៦ នេះ លោក កែវ ប៊ុនយឿន ប្រធានកិត្តិយសអនុសាខាកាកបាទក្រហមកម្ពុជាស្រុករួមជាមួយលោក ហឿន វីរៈ ប្រធានអនុសាខាកាកបាទក្រហមកម្ពុជាស្រុក ព្រះនេត្រព្រះ សហការី និងលោកមេឃុំ បានចុះជួបសំណេះសំណាល និងនាំយកអំណោយស្បៀងអាហារឧបត្ថម្ភជូនប្រជាពលរដ្ឋដែលមានជីវភាពខ្វះខាតចំនួន ៥០គ្រួសារ រស់នៅក្នុងឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ដើម្បីជួយសម្រាលបន្ទុកជីវភាពប្រចាំថ្ងៃ។

ក្នុងឱកាសដ៏មានអត្ថន័យនោះ លោក ហឿន វីរៈ បានពាំនាំនូវប្រសាសន៍ផ្តាំផ្ញើសេចក្ដីនឹករឭក និងការសាកសួរសុខទុក្ខយ៉ាងជ្រាលជ្រៅបំផុតពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធានកាកបាទក្រហមកម្ពុជាឯកឧត្តម ឌិត ទីណា ប្រធានកិត្តិយសសាខាកាកបាទក្រហមកម្ពុជាខេត្តបន្ទាយមានជ័យ។

លោកប្រធានអនុសាខាបានគូសបញ្ជាក់ថា ថ្នាក់ដឹកនាំគ្រប់លំដាប់ថ្នាក់តែងតែនៅជាប់ជាមួយប្រជាពលរដ្ឋគ្រប់កាលៈទេសៈ ដោយឈរលើគោលការណ៍គ្រឹះទីណាមានទុក្ខលំបាក ទីនោះមានកាកបាទក្រហមកម្ពុជា និង កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោល។ ទន្ទឹមនឹងនេះ លោកក៏បានសង្កត់ធ្ងន់ថា ក្រុមការងារតែងតែគិតគូរពីសុខទុក្ខរបស់បងប្អូនប្រជាពលរដ្ឋគ្រប់ពេលវេលា ដោយមិនប្រកាន់និន្នាការយោបាយ ជាតិសាសន៍ ឬពណ៌សម្បុរអ្វីឡើយ។

ក្រៅពីការចែកអំណោយស្បៀងអាហារ លោកអនុប្រធានគណៈកម្មាធិការសាខាក៏បានផ្តល់ការណែនាំយ៉ាងម៉ឺងម៉ាត់ដល់បងប្អូនប្រជាពលរដ្ឋ ឱ្យបង្កើនការប្រុងប្រយ័ត្នខ្ពស់លើកត្តាពីរចម្បងគ្រោះធម្មជាតិ (ខ្យល់កន្ត្រាក់ និងរន្ទះ) ដោយសារបច្ចុប្បន្នស្ថិតក្នុងរបត់បម្រែបម្រួលអាកាសធាតុ ដែលអាចបង្កឱ្យមានភ្លៀងធ្លាក់លាយឡំជាមួយផ្គររន្ទះ និងខ្យល់កន្ត្រាក់ ដូច្នេះសូមពលរដ្ឋពិនិត្យ និងចងរឹតពង្រឹងរចនាសម្ព័ន្ធផ្ទះសម្បែងឱ្យបានរឹងមាំ។ គ្រោះអគ្គិភ័យត្រូវគ្រប់គ្រង និងប្រើប្រាស់ចរន្តអគ្គិសនី ព្រមទាំងភ្លើងចង្ក្រានឱ្យបានហ្មត់ចត់បំផុត ដើម្បីបង្ការ និងទប់ស្កាត់គ្រោះអគ្គិភ័យដែលអាចកើតឡើងជាយថាហេតុ។

ដើម្បីធានាបាននូវសុខុមាលភាពមាំមួន ថ្នាក់ដឹកនាំអនុសាខាក៏បានចែករំលែកនូវវិធានការថែទាំសុខភាព និងការរស់នៅតាមគន្លងប្រក្រតីភាពថ្មី រួមមានបន្តចូលរួមទប់ស្កាត់ការឆ្លងរីករាលដាលនៃជំងឺនានា ដូចជាជំងឺកូវីដ-១៩, ផ្ដាសាយបក្សី (H5N1), គ្រុនចាញ់, និងគ្រុនឈីក-គ្រុនឈាម ដោយត្រូវរស់នៅមានអនាម័យ និងគេងក្នុងមុងជានិច្ច។ ត្រូវកាត់បន្ថយអាហារដែលមានរសជាតិ ផ្អែមពេក ប្រៃពេក និងខ្លាញ់ពេក ព្រមទាំងកាត់បន្ថយការពិសារភេសជ្ជៈកំប៉ុង។ ផ្ទុយទៅវិញ ត្រូវងាកមកហាត់ប្រាណជាប្រចាំ និងអនុវត្តតាមការណែនាំរបស់ក្រសួងសុខាភិបាល។

ថ្នាក់ដឹកនាំបានលើកទឹកចិត្ត និងជំរុញឱ្យបងប្អូនប្រជាពលរដ្ឋខិតខំដាំដុះដំណាំរួមផ្សំ បន្លែបង្ការ និងចិញ្ចឹមសត្វឱ្យអស់លទ្ធភាពតាមដែលអាចធ្វើទៅបាន ដើម្បីទ្រទ្រង់ជីវភាពគ្រួសារឱ្យកាន់តែមានលក្ខណៈប្រសើរឡើង និងមាននិរន្តរភាព៕

ដោយ ឈុន សារ៉ាត