AKP ភ្នំពេញ ថ្ងៃទី១៩ ខែឧសភា ឆ្នាំ២០២៦-- លោក Samuel Munzele Maimbo អនុប្រធានធនាគារពិភពលោកទទួលបន្ទុកផ្នែកលទ្ធកម្ម និងថវិកា អមដំណើរដោយឯកឧត្តមបណ្ឌិត សាន វឌ្ឍនា រដ្ឋលេខាធិការនៃក្រសួងអប់រំ យុវជន និងកីឡា ថ្ងៃទី១៨ ខែឧសភា ឆ្នាំ២០២៦ បានអញ្ជើញធ្វើទស្សនកិច្ចនៅវិទ្យាស្ថានបច្ចេកវិទ្យាកម្ពុជា ដើម្បីពិនិត្យមើលទៅលើគម្រោងកែលម្អការអប់រំឧត្តមសិក្សាទី២ ដែលជាគម្រោងកិច្ចសហប្រតិបត្តិការរវាងក្រសួងអប់រំ យុវជន និងកីឡា និងធនាគារពិភពលោក។

ក្នុងឱកាសដំណើរទស្សនកិច្ចនេះ ឯកឧត្តមសាស្ត្រាចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជាបានបង្ហាញជូនប្រតិភូពីវឌ្ឍនភាពនៃការកែលម្អកម្មវិធីសិក្សា ការអភិវឌ្ឍហេដ្ឋារចនាសម្ព័ន្ធរូបវន្ត និងការស្រាវជ្រាវ ដើម្បីអភិវឌ្ឍក្នុងក្របខណ្ឌនៃការអនុវត្តគម្រោងកែលម្អការអប់រំឧត្តមសិក្សាទី២។ ជាមួយគ្នានេះប្រតិភូធនាគារពិភពលោកក៏បានអញ្ជើញទស្សនកិច្ចនៅតាមមន្ទីរពិសោធន៍សំខាន់ៗ និងបានទស្សនាស្នាដៃ និងលទ្ធផលនៃការស្រាវជ្រាវ ដើម្បីអភិវឌ្ឍមួយចំនួនដែលមានសក្ដានុពលសម្រាប់ទីផ្សារពាណិជ្ជកម្ម និងវិស័យឧស្សាហកម្ម។

បើតាមនាយកវិទ្យាស្ថានបច្ចេកវិទ្យាកម្ពុជា គម្រោងកែលម្អការអប់រំឧត្តមសិក្សាទី២ ដែលជាគម្រោងនៃកិច្ចសហប្រតិបត្តិការរវាងក្រសួងអប់រំ យុវជន និងកីឡា និងធនាគារពិភពលោកនេះមានគោលដៅ៖ ១. កែលម្អគុណភាព និងភាពឆ្លើយតបនៃការអប់រំឧត្តមសិក្សាឆ្ពោះទៅទទួលបានការទទួលស្គាល់គុណភាពពីខាងក្រៅដោយទីផ្សារការងារ និងស្ថាប័នវាយតម្លៃគុណភាពកម្រិតជាតិ តំបន់ និងអន្តរជាតិ។ ២. លើកកម្ពស់គុណភាព និងសមត្ថភាព នៃការស្រាវជ្រាវសម្រាប់កសាងថ្នាលបណ្ដុះអ្នកស្រាវជ្រាវ និងផលិតលទ្ធផលស្រាវជ្រាវ ដែលប្រើប្រាស់ដោយឧស្សាហកម្ម សហគមន៍ និង/ឬ ស្ថាប័នរដ្ឋ និង៣. ពង្រឹងអភិបាលកិច្ចរបស់អនុវិស័យ និងគ្រឹះស្ថានឧត្តមសិក្សាដើម្បីធានាបាននូវស្វ័យភាព តម្លាភាព គណនេយ្យភាព ប្រសិទ្ធភាព និងនិរន្តរភាពក្នុងការអភិវឌ្ឍឧត្តមសិក្សា។

គួរបញ្ជាក់ដែរថា គម្រោងនេះបានផ្ដល់ការវិនិយោគផ្ទាល់ដល់អគ្គនាយកដ្ឋានឧត្តមសិក្សា និងគ្រឹះស្ថានឧត្តមសិក្សាសាធារណៈគោលដៅចំនួន៩ និងគាំទ្រដល់គ្រឹះស្ថានឧត្តមសិក្សារដ្ឋ និងឯកជនផ្សេងទៀត ដើម្បីកែលម្អកម្មវិធីអប់រំ និងអភិបាលកិច្ច ព្រមទាំងផ្ដល់ថវិកាគាំទ្រសម្រាប់ធ្វើការស្រាវជ្រាវក្នុងរូបភាពប្រកួតប្រជែង៕

ដោយ៖ ចាន់ សុភឿន (ប្រភព៖ ក្រសួងអប់រំ)