AKP ភ្នំពេញ ថ្ងៃទី១៩ ខែឧសភា ឆ្នាំ២០២៦ -- មន្ត្រីប៉ាគីស្ថាន និងកាតាកាលពីថ្ងៃចន្ទ បានពិភាក្សាអំពីកិច្ចខិតខំប្រឹងប្រែងជាបន្តបន្ទាប់ ដើម្បីស្តារឡើងវិញនូវកិច្ចចរចាដែលជាប់គាំងរវាងសហរដ្ឋអាមេរិក និងអ៊ីរ៉ង់ ដែលមានគោលបំណងបញ្ចប់សង្គ្រាម។ នេះបើយោងតាមក្រសួងការបរទេសប៉ាគីស្ថាន។

សេចក្តីថ្លែងការណ៍របស់ក្រសួងការបរទេសប៉ាគីស្ថាន បាននិយាយថា រដ្ឋមន្ត្រីការបរទេសប៉ាគីស្ថាន លោក អ៊ីស្សាក ដារ (Ishaq Dar) បានធ្វើការសន្ទនាតាមទូរស័ព្ទជាមួយរដ្ឋមន្ត្រីការបរទេសកាតា លោក ម៉ូហាំម៉េដ ប៊ីន អាប់ឌុលឡាហ្ស៊ីស អាល់-ឃូឡៃហ្វី (Mohammed bin Abdulaziz Al-Khulaifi) ដើម្បីពិភាក្សាអំពីស្ថានភាពក្នុងតំបន់ដែលកំពុងវិវត្ត និងបញ្ហាដែលមានផលប្រយោជន៍ទៅវិញទៅមក។

ការទំនាក់ទំនងចុងក្រោយបំផុតនេះ បានកើតឡើងនៅមួយថ្ងៃបន្ទាប់ពីរដ្ឋមន្ត្រីក្រសួងមហាផ្ទៃប៉ាគីស្ថាន លោក ម៉ូស៊ីន ណាកវី (Mohsin Naqvi)បានទៅបំពេញទស្សនកិច្ចនៅទីក្រុងតេអេរ៉ង់ និងបានជួបជាមួយមេដឹកនាំកំពូលអ៊ីរ៉ង់ រួមទាំងលោកប្រធានាធិបតី ម៉ាសូដ ប៉េហ្សេសគីអាន់ (Masoud Pezeshkian) ក្នុងកិច្ចខិតខំប្រឹងប្រែងដើម្បីនាំភាគីជម្លោះទាំងពីរមកកាន់តុចរចា។

សេចក្តីថ្លែងការណ៍នេះបាននិយាយថា «ភាគីទាំងពីរបានគូសបញ្ជាក់ពីសារៈសំខាន់នៃកិច្ចសន្ទនា និងការចូលរួមការទូតក្នុងការដោះស្រាយបញ្ហាប្រឈមក្នុងតំបន់»។

លោក ដារ បានបញ្ជាក់សារជាថ្មីនូវការប្តេជ្ញាចិត្តរបស់ប៉ាគីស្ថានក្នុងការជំរុញគោលបំណងរួមនៃសន្តិភាព ស្ថិរភាព និងវិបុលភាពនៅក្នុងតំបន់និងលើសពីនេះ។

នាយករដ្ឋមន្ត្រីប៉ាគីស្ថាន លោក ស្សេបាស់ ស្សារីហ្វ (ShehbazSharif) ក៏បានពិភាក្សាអំពីការអភិវឌ្ឍនៅមជ្ឈិមបូព៌ាជាមួយនាយករដ្ឋមន្ត្រីនិងរដ្ឋមន្ត្រីការបរទេសកាតា លោក ស្សេក ម៉ូហាំម៉េដ ប៊ីន អាប់ឌុលរ៉ាម៉ាន់ អាល់ ថានី (Sheikh Mohammed bin Abdulrahman Al Thani)ក្នុងអំឡុងពេលនៃកិច្ចសន្ទនាតាមទូរស័ព្ទកាលពីថ្ងៃអាទិត្យ៕

ដោយ៖ យា ចិន្ដាខន្ដី (ប្រភព៖ AA-AKP)