AKP ភ្នំពេញ ថ្ងៃទី១៩ ខែឧសភា ឆ្នាំ២០២៦ -- យោធានីហ្សេរីយ៉ាបាននិយាយកាលពីថ្ងៃចន្ទថា យ៉ាងហោចណាស់មានយុទ្ធជនរដ្ឋអ៊ីស្លាម (IS) ចំនួន ២០នាក់ត្រូវបានសម្លាប់នៅក្នុងប្រតិបត្តិការរួមគ្នារវាងកងកម្លាំងនីហ្សេរីយ៉ា និងសហរដ្ឋអាមេរិកនៅក្នុងរដ្ឋប័រណូ ភាគឦសាននៃប្រទេសនីហ្សេរីយ៉ា។

នៅក្នុងសេចក្តីថ្លែងការណ៍មួយ អ្នកនាំពាក្យយោធា លោក សាម៉ៃឡា យូបា (Samaila Uba) បាននិយាយថា ប្រតិបត្តិការនេះត្រូវបានអនុវត្តន៍នៅក្នុងតំបន់មេតេឡេ នៃរដ្ឋប័រណូ ដែលជាផ្នែកមួយនៃកិច្ចខិតខំប្រឹងប្រែងប្រឆាំងភេរវកម្មដែលកំពុងបន្តនៅក្នុងតំបន់។

លោក យូបា បាននិយាយថា ការវាយប្រហារទាំងនេះបានកើតឡើងបន្ទាប់ពីការសម្លាប់លោក អាប៊ូ ប៊ីលអាល់ អាល់ មីនូគី (Abu-Bilal al-Minuki) ដែលយោធាបានលើកឡើងថាជាមេបញ្ជាការលំដាប់ទី២ របស់ក្រុម IS។

យោងតាមសេចក្តីថ្លែងការណ៍បានឱ្យដឹងថា ប្រតិបត្តិការនេះត្រូវបានធ្វើឡើងក្រោមភាពជាដៃគូប្រឆាំងភេរវកម្ម និងការចែករំលែកព័ត៌មានស៊ើបការណ៍សម្ងាត់ដែលទើបបង្កើតថ្មីរវាងប្រទេសនីហ្សេរីយ៉ា និងសហរដ្ឋអាមេរិក ដែលមានគោលបំណងរុះរើបណ្តាញភេរវករដែលកំពុងប្រតិបត្តិការនៅក្នុងតំបន់។

យោធាបាននិយាយថា ការវាយប្រហារទាំងនេះត្រូវបានចាប់ផ្តើមបន្ទាប់ពីការឃ្លាំមើលបានរកឃើញការប្រមូលផ្តុំ និងចលនារបស់ពួកសកម្មប្រយុទ្ធដែលសង្ស័យ ដោយយោធាបានបន្ថែមថា ប្រតិបត្តិការដែលកំពុងបន្តមានបំណងធ្វើឱ្យបណ្តាញភេរវករចុះខ្សោយ និងបដិសេធមិនឱ្យក្រុមប្រដាប់អាវុធក្លាយជាកន្លែងសុវត្ថិភាពនៅក្នុងប្រទេសនីហ្សេរីយ៉ា៕

ដោយ៖ មូល មិនា (ប្រភព៖ ស៊ីនហួ)