AKP ភ្នំពេញ ថ្ងៃទី១៩ ខែឧសភា ឆ្នាំ២០២៦ -- អង្គការអន្តរជាតិសម្រាប់អន្តោប្រវេសន៍ (IOM) បាននិយាយកាលពីថ្ងៃចន្ទថា ជនអន្តោប្រវេសន៍សរុបចំនួន ៧៤១នាក់ត្រូវបានបញ្ជូនត្រឡប់ទៅប្រទេសលីប៊ីវិញចាប់ពីថ្ងៃទី១០ ដល់ថ្ងៃទី១៦ ខែឧសភា បន្ទាប់ពីត្រូវបានស្ទាក់ចាប់នៅសមុទ្រខណៈពេលកំពុងព្យាយាមឆ្លងទៅកាន់ឆ្នេរសមុទ្រអឺរ៉ុប។

អង្គការនេះបាននិយាយថា ជនអន្តោប្រវេសន៍ទាំងនោះត្រូវបានចុះពីលើកប៉ាល់នៅក្នុងទីក្រុងឆ្នេរសមុទ្រជាច្រើននៅពេលពួកគេត្រឡប់មកវិញប៉ុន្តែមិនបានផ្តល់ព័ត៌មានលម្អិតអំពីសញ្ជាតិ ឬអាយុរបស់ពួកគេទេ។

ការស្ទាក់ចាប់បានបង្ហាញពីសកម្មភាពជាបន្តបន្ទាប់នៃការប៉ុនប៉ងធ្វើចំណាកស្រុកមិនទៀងទាត់តាមបណ្តោយផ្លូវសមុទ្រមេឌីទែរ៉ាណេ ដែលជាផ្លូវចំណាកស្រុកដ៏គ្រោះថ្នាក់បំផុតមួយរបស់ពិភពលោក។ អង្គការអន្តរជាតិបានព្រមានម្តងហើយម្តងទៀតអំពីហានិភ័យដែលជនអន្តោប្រវេសន៍ប្រឈមមុខក្នុងអំឡុងពេលធ្វើដំណើរទាំងនេះ។

យោងតាមអង្គការ IOM បានឱ្យដឹងថា ចាប់តាំងពីដើមឆ្នាំ២០២៦ មកជនអន្តោប្រវេសន៍ចំនួន ៦.៨១១នាក់ត្រូវបានស្ទាក់ចាប់ និងបញ្ជូនត្រឡប់ទៅប្រទេសលីប៊ីវិញ ហើយ ៨២២នាក់ត្រូវបានរាយការណ៍ថាស្លាប់​​ និងបាត់ខ្លួននៅលើផ្លូវសមុទ្រមេឌីទែរ៉ាណេ គិតត្រឹមថ្ងៃទី១៦ ខែឧសភា៕

ដោយ៖ មូល មិនា (ប្រភព៖ ស៊ីនហួ)