AKP ភ្នំពេញ ថ្ងៃទី១៩ ខែឧសភា ឆ្នាំ២០២៦--នៅទីបញ្ជាការតំបន់ប្រតិបត្តិការសឹករងកណ្តាល យោធភូមិភាគពិសេ បានប្រារព្ធពិធីផ្សព្វផ្សាយសភាពការណ៍ថ្មីៗ អប់រំចិត្រសាស្រ្ត និងពង្រឹងតួនាទី ភារកិច្ច របស់កងយោធពលខេមរភូមិន្ទ ជូននាយទាហាន នាយទាហានរង និងពលទាហានក្រោមឱវាទនា ថ្ងៃទី១៨ ខែឧសភា ឆ្នាំ២០២៦ ក្រោមអធិបតីភាពឯកឧត្តម ឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងកណ្តាល។

ឯកឧត្តម ឧត្តមសេនីយ៍ត្រី នៃ និយម បានផ្សព្វផ្សាយលទ្ធផលនៃកិច្ចប្រជុំអាស៊ាន លើកទី៤៨ នៅទីក្រុងសេប៊ូ សាធារណរដ្ឋហ្វីលីពីន និងបានបញ្ជាក់អំពីការធ្វើសន្និសិទកាសែតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រោយពេលជួបប្រជុំត្រីភាគី ជាមួយឯកឧត្តម ហ្វឺឌីណាន់ រ៉ូម៉ូលដេស ម៉ាកូស ជូញៀ ប្រធានាធិបតីនៃសាធារណរដ្ឋហ្វីលីពីន និងឯកឧត្តម អនុទិន ឆាន់វីរគុលនាយករដ្ឋមន្ត្រី នៃព្រះរាជាណាចក្រថៃឡង់ ដោយសម្ដេចបានបញ្ជាក់យ៉ាងម៉ឺងម៉ាត់ថា៖ កម្ពុជាមិនទទួលស្គាល់ដាច់ខាតនូវការកែប្រែខ្សែបន្ទាត់ព្រំដែនតាមរយៈការប្រើប្រាស់កម្លាំង និងបានទាមទារឲ្យភាគីថៃ ត្រូវតែអនុវត្តជាបន្ទាន់ ក្នុងការវាស់វែងព្រំដែន តាមកិច្ចព្រមព្រៀងដែលមានក្នុងសេចក្តីប្រកាសរួម ស្ដីពីបទឈប់បាញ់កាលពីថ្ងៃទី២៧ ខែធ្នូ ឆ្នាំ ២០២៥កន្លងទៅ។

ឯកឧត្តមមេបញ្ជាការតំបន់ប្រតិបត្តិការសឹករងកណ្តាលបានថ្លែងនូវការសរសើរចំពោះថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់បណ្ដាលកងឯកភាព ការិយាល័យ និងស្ថាប័នចំណុះទាំងអស់ ដែលបានខិតខំបំពេញភារកិច្ចប្រកបដោយស្មារតីទទួលខុសត្រូវខ្ពស់ ដើម្បីបុព្វហេតុជាតិ និងប្រជាជនកម្ពុជា និងបានប្រគល់ភារកិច្ចសំខាន់ៗមួយចំនួនជូនដល់នាយទាហាន នាយទាហានរង និងពលទាហានទាំងអស់ ត្រូវតែស្មោះត្រង់ដាច់ខាតចំពោះជាតិ សាសនា និងព្រះមហាក្សត្រ។

ជាមួយនេះដែរ ឯកឧត្តម ឧត្តមសេនីយ៍ត្រី នៃ និយម ក៏បានក្រើនរំលឹកដល់យោធិនគ្រប់រូប ត្រូវអនុវត្តឱ្យបានម៉ឺងម៉ាត់ តាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងការណែនាំ និងដឹកនាំដោយផ្ទាល់ពីឯកឧត្តម គួច ចំរើន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកណ្តាល ដោយត្រូវចូលរួមយ៉ាងសកម្ម ក្នុងការការពារ សហការ ជាមួយកងកម្លាំងប្រដាប់អាវុធទាំងបី និងអាជ្ញាធរដែនដីគ្រប់លំដាប់ថ្នាក់ ក្នុងការអនុវត្តនូវគោលនយោបាយភូមិ ឃុំ មានសុវត្ថិភាពរបស់រាជរដ្ឋាភិបាលឱ្យមានប្រសិទ្ធភាព៕

ដោយ សំ សាម៉ន (ប្រភព៖ បញ្ជាការកងទ័ពជើងគោក)