AKP ភ្នំពេញ ថ្ងៃទី១៩ ខែឧសភា ឆ្នាំ២០២៦--លោក ខូវ មាស អគ្គលេខាធិការរងអាជ្ញាធរទន្លេសាប នៅថ្ងៃទី១៨ ខែឧសភា ឆ្នាំ២០២៦ បានអញ្ជើញដឹកនាំកិច្ចប្រជុំពិភាក្សាការងារពិនិត្យឯកសារ និងវិភាគគោលនយោបាយកម្មវិធីស្តារប្រព័ន្ធអេកូឡូស៊ី នៅក្នុងអាងទន្លេសាប និងតំបន់ទេសភាពខេត្តសៀមរាប ភ្នំគូលែន។

លោក ខូវ មាស បានលើកឡើងថា ឯកសារ និងវិភាគគោលនយោបាយនោះ រួមបញ្ចូលសម្រាប់គម្រោង “ការស្តារប្រព័ន្ធអេកូឡូស៊ីសម្រាប់ការអភិវឌ្ឍប្រកបដោយចីរភាព នៅក្នុងអាងទន្លេសាប និងតំបន់ទេសភាពខេត្តសៀមរាប ភ្នំគូលែន” ដែលមានការចូលរួមជាមួយជំនាញការជាតិមកពី ក្រសួងបរិស្ថាន ។គោលបំណងនៃកិច្ចប្រជុំពិភាក្សាគឺ ពិភាក្សាពីគោលនយោបាយពហុវិស័យ ដើម្បីពង្រឹងបរិយាកាសគោលនយោបាយសម្រាប់ការគ្រប់គ្រងអាងទឹកបញ្ចូលគ្នា នៅខេត្តសៀមរាប។

សូមជម្រាបជូនថា ក្រសួងបរិស្ថានកំពុងអនុវត្តគម្រោង “ការស្តារប្រព័ន្ធអេកូឡូស៊ីសម្រាប់ការអភិវឌ្ឍប្រកបដោយចីរភាព នៅក្នុងអាងទន្លេសាប និងតំបន់ទេសភាពខេត្តសៀមរាប ភ្នំគូលែន(ERIP)” ក្រោមមូលនិធិបរិស្ថានសកល (GEF) តាមរយៈ UNDP Cambodia៕

ដោយ ណយ នឿន (ប្រភព៖ អាជ្ញាធរទន្លេសាប)