AKP ស្ទឺងត្រែង ថ្ងៃទី១៩ ខែឧសភា ឆ្នាំ២០២៦--ឯកឧត្តម សរ សុពុត្រា អភិបាលខេត្តស្ទឹងត្រែង រួមនឹងមន្ទីរទេសចរណ៍ខេត្ត អាជ្ញាធរក្រុង ស្ទឹងត្រែង និងអ្នកពាក់ព័ន្ធ បានអញ្ជើញទទួលក្បួនរថយន្តទេសចរណ៍ Caravan Tour កម្ពុជា-ចិន នឹងឆ្លងកាត់ខេត្តស្ទឹងត្រែង ឆ្ពោះទៅប្រទេសចិន តាមច្រកទ្វារអន្តរជាតិ ព្រំដែន ត្រពាំងក្រៀល កម្ពុជា-ឡាវ កាលពីថ្ងៃទី១៨ ខែឧសភា ឆ្នាំ២០២៦។

ក្នុងនោះ ខេត្តស្ទឹងត្រែងនឹងក្លាយជាចំណុចសំខាន់មួយក្នុងដំណើរទេសចរណ៍អន្តរជាតិ ខណៈក្បួនរថយន្ត Caravan Tour កម្ពុជា-ចិន នៃកម្មវិធី “Mekong-Lancang River FAM-Trip Discovery” បានធ្វើដំណើរឆ្លងកាត់ខេត្តនេះ ឆ្ពោះទៅកាន់ប្រទេសឡាវ និងបន្តទៅខេត្តយូណាន ប្រទេសចិន។

បើតាមការបញ្ជាក់ពី លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានឱ្យដឹងថា ដំណើរទស្សនកិច្ចតាមក្បួនរថយន្តនេះ នឹងប្រព្រឹត្តទៅចាប់ពីថ្ងៃទី១៨ ខែឧសភា ដល់ថ្ងៃទី០៩ ខែមិថុនា ឆ្នាំ២០២៦ ដោយមានរថយន្តចូលរួមប្រមាណពី៥ ទៅ ១០គ្រឿង។

លោកបានបន្ថែមថា ព្រឹត្តិការណ៍នេះរៀបចំឡើងក្នុងក្របខណ្ឌយុទ្ធនាការ “ឆ្នាំទេសចរណ៍កម្ពុជា-ចិន ២០២៦” ដោយមានការសហការរវាងក្រសួងទេសចរណ៍ និងសមាគមទេសចរណ៍កម្ពុជា ដើម្បីផ្សព្វផ្សាយសក្តានុពលទេសចរណ៍ និងពង្រឹងទំនាក់ទំនងមិត្តភាពរវាងបណ្តាប្រទេសតំបន់មេគង្គ-ឡានឆាង។

សូមបញ្ជាក់ថា បើតាមការគ្រោងទុកនៅថ្ងៃទី៩ខែមិថុនាឆ្នាំ២០២៦ក្បួនរថយន្តទេសចរណ៍ខាងលើនេះ នឹងវិលត្រឡប់មកដល់កម្ពុជាវិញតាមច្រកអន្តរជាតិខេត្តស្ទឹងត្រែងរួចបន្តឆ្ពោះទៅកាន់ខេត្តសៀមរាប៕

ដោយ AKP