AKP តាកែវ ថ្ងៃទី១៩ ខែឧសភា ឆ្នាំ២០២៦--សាខាកាកបាទក្រហមកម្ពុជាខេត្តតាកែវ បាននាំយកអំណោយមនុស្សធម៌ចែកជូនប្រជាពលរដ្ឋរងគ្រោះដោយសារខ្យល់កន្ត្រាក់ចំនួន៧៥គ្រួសារនៅស្រុកត្រាំកក់ខេត្តតាកែវ ក្រោមអធិបតីភាពឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ និងលោកជំទាវ សុខ កែវ ច័ន្ទសារុន ភរិយា ឯកឧត្តមបណ្ឌិតសភាចារ្យ ច័ន្ទ សារុន សមាជិករដ្ឋសភាមណ្ឌលតាកែវ ដោយមានការអញ្ជើញចូលរួមពីអនុប្រធាន សមាជិក សមាជិកាសាខាកាកបាទក្រហមកម្ពុជាខេត្តតាកែវ ប្រធាន អនុប្រធាន សមាជិក សមាជិកាអនុសាខាកាកបាទក្រហមកម្ពុជាស្រុកត្រាំកក់ មេឃុំ ជំទប់ ក្រុមប្រឹក្សាឃុំ ស្មៀនឃុំ នៃឃុំទាំងពីរគឺឃុំតាភេម និងឃុំត្រពាំងធំខាងត្បូង និងបងប្អូនប្រជាពលរដ្ឋរងគ្រោះទាំង៧៥គ្រួសារ។

មានប្រសាសន៍សំណេះសំណាលក្នុងឱកាសនោះ ឯកឧត្តម វ៉ី សំណាង បានពាំនាំនូវការផ្ដាំផ្ញើរសួរសុខទុក្ខពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់ជានិច្ច អំពីសុខទុក្ខដល់បងប្អូនប្រជាពលរដ្ឋដែលរងគ្រោះ និងងាយរងគ្រោះគ្រប់ប្រភេទ នៅគ្រប់ទីកន្លែងដោយមិនប្រកាន់និន្នាការ ពូជសាសន៍ សាសនាអ្វីឡើយ ដូចពាក្យស្លោក ទីណាមានការលំបាកទីនោះមានកាកបាទក្រហមកម្ពុជា។

ឯកឧត្តមបានមានប្រសាសន៍បន្តថា គ្រោះធម្មជាតិនេះវាអាចកើតឡើងគ្រប់ពេលវេលាទាំងអស់ ដែលទាមទារឱ្យអាជ្ញាធរស្រុក-ឃុំ-ភូមិ ត្រូវត្រៀមកម្លាំងប្រជាការពាររួមនឹងកម្លាំងសមត្ថកិច្ច ជួយសង្គ្រោះប្រជាពលរដ្ឋឱ្យបានទាន់ពេលវេលា។ ជាពិសេសប្រសិនបើពួកគាត់ជួបគ្រោះថ្នាក់ខ្យល់កន្ត្រាក់រលំផ្ទះ ត្រូវតែសហការគ្នាក្នុងការជួយជួសជុលផ្ទះជូនពួកគាត់ភ្លាម កុំទុកឱ្យពួកគាត់រស់នៅក្នុងសភាព គ្មានជំរកស្នាក់អាស្រ័យឱ្យសោះ។ប្រជាពលរដ្ឋមានទុក្ខលំបាកក្នុងជីវភាព ឬជួបគ្រោះធម្មជាតិ ក្នុងនាមយើងជាមន្ត្រីដែលជាអ្នកបម្រើប្រជាពលរដ្ឋ ពិសេសមន្ត្រីកាកបាទក្រហម ត្រូវតែចុះជួយប្រជាពលរដ្ឋភ្លាមៗ កុំទុកឱ្យពួកគាត់មានជីវភាពខ្វះខាត កាន់តែធ្ងន់ធ្ងរជាងនេះ។ពោលគឺត្រូវជួយដោះស្រាយទុក្ខលំបាករបស់ពួកគាត់ឱ្យបាន ដោយធ្វើយ៉ាងណាឱ្យប្រជាពលរដ្ឋរងគ្រោះ និងងាយរងគ្រោះ រស់នៅមានជីវភាពសមរម្យគ្រប់គ្រាន់។

ឯកឧត្តម វ៉ី សំណាង ក៏បានថ្លែងប្រាប់បងប្អូនប្រជាពលរដ្ឋថា ប្រទេសជាតិយើងបច្ចុប្បន្ននេះ ក្រោមការដឹកនាំប្រកបដោយភាពស្វាហាប់ និងវៃឆ្លាតរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ធ្វើឱ្យប្រទេសមានការអភិវឌ្ឍរីកចម្រើនលើគ្រប់វិស័យ និងបានទាក់ទាញបណ្ដាអ្នកវិនិយោគក្រុមហ៊ុនធំៗ ឱ្យមករកស៊ីបណ្ដាក់ទុកនៅកម្ពុជាកាន់តែច្រើន ដែលបានបង្កើតឱកាសការងារជូនប្រជាពលរដ្ឋក្នុងមូលដ្ឋាន ឱ្យមានការងារធ្វើ ដើម្បីបង្កើនសេដ្ឋកិច្ចក្នុងគ្រួសារ។ពិសេសចូលរួមកាត់បន្ថយភាពក្រីក្រ និងចំណាកស្រុករបស់ពលរដ្ឋផងដែរ។

តាមរបាយការណ៍ លោក កេត ម៉ៅ អភិបាលនៃគណៈអភិបាលស្រុកត្រាំកក់ បានឱ្យដឹងថាកាលពីល្ងាចថ្ងៃទី១៦ ខែឧសភា ឆ្នាំ២០២៦ មានខ្យល់កន្ត្រាក់បក់បោកចំលំនៅដ្ឋានរបស់បងប្អូនប្រជាពលរដ្ឋ នៅឃុំតាភេមនិងឃុំត្រពាំងធំខាងត្បូងស្រុកត្រាំកក់ខេត្តតាកែវ បណ្ដាលឱ្យផ្ទះប្រជាពលរដ្ឋនៅឃុំតាភេមចំនួន៧១គ្រួសារ និងឃុំត្រពាំងធំខាងត្បូងចំនួន០៤គ្រួសារ មានការខូចខាតផ្ទះសម្បែងយ៉ាងធ្ងន់ធ្ងរ ក្នុងនោះមានផ្ទះខ្លះរលំ ផ្ទះខ្លះរបើកដំបូល និងមានផ្ទះខ្លះទៀតបាក់សសរជាដើម។

អំណោយដែលបានចែកជូនបងប្អូនប្រជាពលរដ្ឋទាំង៧៥គ្រួសារក្នុងពេលនោះ ដោយមួយគ្រួសារៗទទួលបាន អង្ករ២៥គីឡូក្រាម ត្រីខកំប៉ុង១យួរ មី១កេស  ប្រេងឆា១លីត្រ នំ១ប្រអប់ ទឹកត្រី៣ដប ទឹកស៊ីអ៊ីវ៣ដប កន្ទេល១ មុង១ ភួយ១ សារុង១ ក្រម៉ា១ និងថវិកាមួយចំនួនទៀត៕

ដោយ អ៊ុច សៀង