AKP ភ្នំពេញ ថ្ងៃទី១៨ ខែឧសភា ឆ្នាំ២០២៦---
គណៈកម្មការនីតិកម្ម និងយុត្តិធម៌ នៃរដ្ឋសភា (គណៈកម្មការទី៦) បានជំរុញឱ្យស្ថាប័នតុលាការ និងមន្ត្រីយុត្តិធម៌ខេត្តកំពង់ឆ្នាំងបន្តរឹតបន្តឹងការអនុវត្ត ច្បាប់ឱ្យបានម៉ឺងម៉ាត់បំផុត ដើម្បីបង្កើនជំនឿទុកចិត្ត និងរក្សាសន្តិសុខសណ្តាប់ធ្នាប់សាធារណៈជូនប្រជាពលរដ្ឋ។
ជាមួយគ្នានេះ ស្ថាប័នតុលាការ និងមន្ត្រីយុត្តិធម៌ខេត្តកំពង់ឆ្នាំងក៍ត្រូវបង្កើនការយកចិត្តទុកដាក់ និងពង្រឹងសមត្ថភាពផ្នែកឌីជីថល ដើម្បីទប់ស្កាត់ និងបង្ក្រាប
ឱ្យបានទាន់ពេលវេលានូវបទល្មើសបោកប្រាស់តាមប្រព័ន្ធអ៊ីនធឺណិត (Online Scams) ដែលកំពុងរីករាលដាល។
ការថ្លែងនេះធ្វើឡើងក្នុងឱកាសដែល គណៈប្រតិភូគណៈកម្មការទី៦ នៃរដ្ឋសភា ដឹកនាំដោយ ឯកឧត្តម អង្គ វង្ស វឌ្ឍានា ប្រធានគណៈកម្មការ បានអញ្ជើញចុះបំពេញបេសកកម្មការងារ និងជួបពិភាក្សាជាមួយស្ថាប័នតុលាការ ខេត្តកំពង់ឆ្នាំង នាព្រឹកថ្ងៃទី១៨ ខែឧសភា ឆ្នាំ២០២៦ នេះ ដើម្បីតាមដាន និងវាយតម្លៃលើប្រសិទ្ធ ភាពនៃការអនុវត្តច្បាប់ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរ ដ្ឋាភិបាល។

ក្នុងកិច្ចប្រជុំពិភាក្សាការងារជាមួយ ឯកឧត្តម កី ម៉ានេរ៉ា ប្រធានសាលាដំបូ ងខេត្ត និង ឯកឧត្តម ឯក ស៊ុនរស្មី ព្រះរាជអាជ្ញា នៃអយ្យការអមសាលា ដំបូងខេត្ត ស្ថាប័នតុលាការបានបង្ហាញរបាយការណ៍វឌ្ឍនភាពដ៏ល្អប្រសើរលើការងារដោះស្រាយសំណុំរឿងអាទិភាពចំនួន ៤ (ក្មេងទំនើង, គ្រឿងញៀន, គ្រោះថ្នាក់ចរាចរណ៍ និងអត្រានុកូល ដ្ឋាន ដោយ ទទួលបានសរុប ១៩០ សំណុំរឿង ដោយក្នុងនោះបានដោះស្រាយរួចរាល់ស្ទើរទាំងស្រុង ពោលគឺសល់ត្រឹមតែ ១៩ សំណុំរឿង ប៉ុណ្ណោះដែលកំពុងបន្តនីតិវិធី ជាមួយគ្នានេះ សំណុំរឿងរដ្ឋប្បវេណី ស្ថាប័នតុលាការខេត្តក៏បានបន្តចាត់ការដោះស្រាយចំនួន ៩០០ សំណុំរឿង បន្ថែមទៀត។

ទោះបីជាមានវឌ្ឍនភាពល្អក្តីតុលាការខេត្តបានលើកឡើងដោយស្មោះត្រង់នូវបញ្ហាប្រឈមចំពោះមុខ រួមមាន កង្វះខាតឃ្លាំងសម្រាប់រក្សាទុកវត្ថុតាង នៃបទល្មើស និង ភាពយឺតយ៉ាវនៃការបញ្ជូនដីកាកោះហៅ តាមរយៈមន្ទីរប្រៃសណីយ៍ ដែលជាកត្តារាំងស្ទះដល់ល្បឿននៃការកាត់ក្តីផងដែរ។
ឯកឧត្តម អង្គ វង្ស វឌ្ឍានាបានកោតសរសើរចំពោះលទ្ធផលការងារនិងបានផ្តល់អនុសាសន៍ឱ្យស្ថាប័នតុ លាការ ក៏ដូចជាអយ្យការអមសាលាដំបូងខេត្ត បន្តរឹតបន្តឹងការអនុវត្តច្បាប់ឱ្យបានម៉ឺងម៉ាត់បំផុត ដើម្បីបង្កើនជំនឿទុកចិត្ត និងរក្សាសន្តិសុខសណ្តាប់ធ្នាប់សាធារណៈជូនប្រជាពលរដ្ឋ។

ឯកឧត្តមក៏បានសង្កត់ធ្ងន់លើការបង្កើតកិច្ចសហការជិតស្និទ្ធ និងបើកចំហរវាងតុលាការ និងអាជ្ញាធរពាក់ព័ន្ធ ដើម្បីការពារផលប្រយោជន៍និងទ្រព្យសម្បត្តិរបស់សហគមន៍ពីក្រុមឧក្រិដ្ឋជនបច្ចេក វិទ្យា។
ជាការឆ្លើយតប ថ្នាក់ដឹកនាំស្ថាប័នតុលាការ និងអយ្យការខេត្តកំពង់ឆ្នាំង បានបង្ហាញការប្តេជ្ញាចិត្តយ៉ាងមុតមាំក្នុងការបន្តអនុវត្តតាមគោលការណ៍កំណែទម្រង់ច្បាប់ និងប្រព័ន្ធយុត្តិធម៌របស់រាជរដ្ឋាភិបាលឱ្យមានប្រសិទ្ធភាព សមធម៌ និងតម្លាភាពខ្ពស់បំផុត៕

ដោយ៖ ប៊ុនរិទ្ធ, ប្រភព៖ រដ្ឋសភា