AKP ភ្នំពេញ ថ្ងៃទី១៨ ខែឧសភា ឆ្នាំ២០២៦–ឯកឧត្តម តូច ចាន់នី រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ) និងមន្ត្រីជំនាញ​នៃក្រុមការងារបច្ចេកទេសអភិវឌ្ឍន៍កម្លាំងសេវាសង្គមកម្ពុជា នៅថ្ងៃទី១៨​ ខែឧសភា ឆ្នាំ២០២៦ បានទទួលជួបប្រតិភូនៃសាធារណរដ្ឋប្រជាមានិតឡាវ​ ដែលដឹកនាំដោយលោក​ Sophonesay LORPHEANGSY អគ្គនាយករង​ នៃអគ្គនាយកដ្ឋានសុខុមាលភាពសង្គមនៃក្រសួងសុខុមាលភាពសង្គមនិងការងារ។

ឯកឧត្តម រដ្ឋលេខាធិការ តូច ចាន់នី បានលើកឡើងថា ក្នុងជំនួបនេះធ្វេីក្នុងគោលបំណងជជែកពិភាក្សា​ និងចែករំលែកអំពីការពង្រឹងកម្លាំងសេវាសង្គមកិច្ច​នៅកម្ពុជា​ ព្រមទាំងសិក្សាស្វែងយល់អំពីប្រព័ន្ធគ្រប់គ្រងព័ត៌មានកិច្ចការពារកុមារ​ និងការអនុវត្តមុខងារកិច្ចការពារនៅថ្នាក់ក្រោមជាតិ។ ក្នុងឱកាសនេះ​ ឯកឧត្តម​ បានសម្តែងនូវការស្វាគមន៍យ៉ាងកក់ក្តៅចំពោះប្រតិភូឡាវ​ និងបានជម្រាបអំពីស្ថានភាពទូទៅ​នៃប្រទេសកម្ពុជា​ ការពង្រឹងកិច្ចសហប្រតិបត្តការរវាងប្រទេសកម្ពុជា​ និងប្រទេសឡាវ​ ព្រមទាំងគោលនយោបាយ​ និងកម្មវិធីការងាររបស់រាជរដ្ឋាភិបាល​លេីវិស័យសង្គមកិច្ច​ អតីតយុទ្ធជន​ និងយុវនីតិសម្បទា​។ 

ទន្ទឹមគ្នានេះ​ ឯកឧត្តម​ អ៊ុ​ សុផាន់ណារ៉ា​ អគ្គនាយកនៃអគ្គនាយកដ្ឋានសេវាសង្គមកិច្ច​ បានធ្វេីបទបង្ហាញចែករំលែកអំពីបេសកកម្មរបស់ក្រសួង​ ស.អ.យ​, សាវតានៃការងារសង្គមកិច្ច,​ វឌ្ឍនភាពការពង្រឹងកម្លាំងសេវាសង្គមនៅកម្ពុជា​,​ បទពិសោធន៍​, បញ្ហាប្រឈម​ និងទិសដៅបន្តនៃការពង្រឹងកម្លាំងសេវាសង្គមនៅកម្ពុជា។ 

ក្រៅពីជំនួបជាមួយថ្នាក់ដឹកនាំ​ និងមន្ត្រីជំនាញក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ ប្រតិភូឡាវ​ នឹងជួបជាមួយមន្ត្រីសង្គមកិច្ចនៃមន្ទីរ​ ស.អ.យ​ និង​មន្ត្រីទទួលបន្ទុកជាបុគ្គលិកសង្គម​កិច្ច​នៅរដ្ឋបាលស្រុក​ នៃខេត្តសៀមរាប​ ដេីម្បីស្វែងយល់អំពីតួនាទី​ ភារកិច្ច​ និងការអនុវត្តការងារជាក់ស្តែងរបស់បុគ្គលិកសង្គម​ លេីការងារប្រព័ន្ធគ្រប់គ្រងករណី​ Primero និងការផ្តល់សេវាកិច្ចការពារកុមារ ៕

ដោយ៖ ណយ នឿន (ប្រភព៖ក្រសួងសង្គមកិច្ច)